Jeremia 34:1-22
34 Ma e wach ma Jehova nonyiso Jeremia e kinde ma Nebukadnezar* ruodh Babulon gi jolwenyne duto, kod pinjeruodhi duto ma ne nie bwo lochne, kaachiel gi ji duto ne kedo gi Jerusalem kod mieche:+
2 “Jehova Nyasach Israel owacho ni, ‘Dhi ir Zedekia+ ruodh Juda mondo iwachne niya: “Ma e gima Jehova wacho, ‘Abiro keto dalani e lwet ruodh Babulon, mi enowang’e gi mach.+
3 Kendo ok ibi tony e lwete, nimar ibiro maki mi teri ire.+ Ubiro nenoru kode wang’ gi wang’, kendo ibiro wuoyo kode achiel kachiel. Adier, ibiro teri e piny Babulon.’+
4 Kata kamano, winj gima Jehova owacho, yaye Zedekia ruodh Juda, ‘Ma e gima Jehova owacho kuomi: “Ok bi negi gi ligangla.
5 Ibiro tho gi kuwe,+ kendo ibiro wang’ni gik mang’we ng’ar mana kaka ne owang’ ne ruodhi ma nokwongoni. Ji biro ywagi ka giwacho ni, ‘Yaye, ruodhwa otho!’ nimar, ‘An e ma asewacho mano,’ Jehova owacho.”’”’”
6 Janabi Jeremia ne owacho wechego duto ne Zedekia ruodh Juda ka en Jerusalem,
7 sa ma ne jolwenj ruodh Babulon kedo gi Jerusalem kod Lakish+ gi Azeka.+ Nimar mier ariyogo kende e miech Juda mochiel motegno ma ne pok gikawo.+
8 Jehova ne owuoyo gi Jeremia bang’ ka ne Zedekia osetimo singruok gi Jo-Jerusalem ni gigony wasumbni maggi,+
9 mondo ng’ato ka ng’ato kuomgi ogony misumbane ma Ja-Hibrania, obed ma dichwo kata ma nyako, mondo kik Ja-Hibrania oti ne Ja-Hibrania wadgi kaka misumba.
10 Omiyo, jotelo duto kod ji duto nowinjo wachno. Mi ng’ato ka ng’ato ma ne otimo singruogno ne ogonyo jatichne ma misumba mi oweye thuolo.
11 To bang’e ne giloko pachgi mi giduoko wasumbnigi ma yande gisegonyo mondo otinegi kendo.
12 Kuom mano, wach Jehova ne obiro ne Jeremia kowuok kuom Jehova niya:
13 “Jehova Nyasach Israel owacho ni, ‘Ne atimo singruok gi kwereu+ chieng’ ma ne agologi e piny Misri, ka ma ne otuegie kaka wasumbni.+ Mi awachonegi niya:
14 “E giko higa mar abiriyo, ng’ato ka ng’ato kuomu onego ogony owadgi ma Ja-Hibrania ma ne ong’iewo, kendo mosetiyone kuom higni auchiel. Obiro gonye mondo obed thuolo.”+ To kwereu ne odagi winja kata chikona itgi.
15 Yande uselokoru mutimo gima long’o e wang’a kuom gonyo oweteu ma ne tiyonu ka wasumbni, kendo ne utimo singruok e ot miluongo gi nyinga.
16 To bang’e, ne uchako uloko pachu muketho nyinga+ ka ne uduoko wasumbniu ma chwo kod ma mon mondo gitinu kendo.’
17 “Kuom mano, ma e gima Jehova owacho: ‘Ne achikou mondo ugony oweteu kod jo ma udakgo, to ne udagi winja.+ E momiyo, abiro weyou mondo ligangla, tuo malich, kod kech otieku,+ kendo abiro miyo pinjeruodhi duto obwogi ka giwinjo gima otimorenu,’+ Jehova owacho.
18 Ma e gima biro timore ne jo ma ok orito singruokna, kendo ma ok otimo kaka ne gikuongorena chieng’ ma ne ging’ado nyaroya diriyo mi gikalo e diere,+
19 tiende ni, jotend Juda, jotend Jerusalem, jodong od ruoth, jodolo, kod ji duto e pinyno ma nokalo e dier nyaroyano:
20 Abiro chiwogi e lwet wasikgi gi jo ma dwaro negogi, ringregi biro bedo chiemb winy ma fuyo e kor polo kod ondiegi mag piny.+
21 Abiro chiwo Zedekia ruodh Juda kaachiel gi jotende e lwet wasikgi kod jo ma dwaro negogi, kendo e lwet jolwenj ruodh Babulon+ moseweyo kedo kodu.’+
22 “‘Adier, abiro golo chik,’ Jehova owacho, ‘kendo giniduog monjo dalani, gibiro kedo kode, mi ginikawe, kendo giniwang’e gi mach;+ anami mier mag Juda odong’ gunda ma onge ng’at modakie.’”+
Weche Moler Piny
^ Iluonge bende ni Nebukadereza.
