Jeremia 35:1-19
-
Jo-Rekab keto ranyis maber mar luwo chik (1-19)
35 Ma e wach Jehova ma nobiro ne Jeremia e kinde loch Jehoyakim+ wuod Josia, ruodh Juda:
2 “Dhi ir Jo-Rekab+ mondo iwuo kodgi, kae to itergi e od chiemo moro manie od Jehova; kendo imigi divai gimadhi.”
3 Eka ne akawo Jaazania wuod Jeremia wuod Habazinia, owetene, yawuote, kaachiel gi Jo-Rekab duto
4 mi aterogi e od Jehova. Ne akelogi e od chiemo mar yawuot Hanan wuod Igdalia ng’at Nyasaye madier. To odno ne ni e bath od chiemo mar jotelo, e wi od Maaseya wuod Shalum ma ne jarit dhoot.
5 Eka ne aketo e nyim Jo-Rekab okombe madongo gi matindo mopong’ gi divai, mi awachonegi niya: “Madhuru divai.”
6 To ne giwachona niya: “Ok wanamadh divai nikech Jehonadab*+ wuod Rekab kwarwa, nochikowa ni, ‘Kik umadh divai. Yawuotu bende ok onego omadh divai nyaka chieng’.
7 Kendo kik uger udi, kata chuoyo kodhi, kata komo, kata bedo gi puoth divai. To onego udag mana e hembe. Eka unudag aming’a e piny ma unie weloni.’
8 Kuom mano, pod waluwo chike ma Jehonadab wuod Rekab kwarwa nomiyowa, e momiyo wan, mondewa, yawuotwa, kod nyiwa, ok wanyal madho divai.
9 Ok wager udi mondo wadagie, kendo waonge gi puothe mag mzabibu, kata puothe mamoko, kata kodhi.
10 Pod wadak mana e hembe, kendo waluwo chike duto ma Jehonadab* nomiyowa.
11 To ka Nebukadnezar* ruodh Babulon nomonjo pinyni,+ ne wawacho ni, ‘Wadhiuru Jerusalem, mondo kik jolweny mag Kaldea kod Siria omakwa. Mano e momiyo sani wadak Jerusalem kae.’”
12 Wach Jehova ne obiro ne Jeremia niya:
13 “Ma e gima Jehova Nyasach oganda lweny, Nyasach Israel owacho, ‘Dhi iwach ne Jo-Juda gi jo ma odak Jerusalem niya: “Donge ne isayou nyadinwoya mondo uwinj wachna?”+ Jehova owacho.
14 “Jehonadab wuod Rekab ne ochiko nyikwaye ni kik gimadh divai, kendo giseluwo wachno nyaka kawuononi.+ To un asewuoyo kodu nyadinwoya, to udagi winja.+
15 Bende, asebedo ka aoronu jotichna ma jonabi nyadinwoya,+ ka giwachonu ni, ‘Lokreuru uwe yoreu maricho,+ kendo utim gik makare. Kik uluw nyiseche mamoko mondo utinegi. Eka unudag aming’a e piny ma namiyou gi kwereu e ndalo machon.’+ To ne utamoru winja kata chikona itu.
16 Nyikwa Jehonadab wuod Rekab oseluwo chik ma kwargi nomiyogi,+ to ogandani osedagi winja.”’”
17 “Omiyo, ma e gima Jehova Nyasach oganda lweny, Nyasach Israel owacho: ‘Abiro kelo ne Jo-Juda kod jo modak Jerusalem masira ma ne awacho ni adhi kelonegi.+ Nimar asewuoyo kodgi, to gidagi chiko itgi, asiko aluongogi, to gidagi dwoka.’”+
18 Eka Jeremia nowacho ne Jo-Rekab niya: “Ma e gima Jehova Nyasach oganda lweny, Nyasach Israel owacho, ‘Nikech useluwo chike duto ma ne kwaru Jehonadab omiyou, kendo usetimo gik moko duto mana kaka nonyisou,
19 ma e gima Jehova Nyasach oganda lweny, Nyasach Israel owacho: “Kinde duto, nyaka nonwang’ nyakwar Jehonadab* wuod Rekab ma tiyo e nyima.”’”
Weche Moler Piny
^ Iluonge bende ni Jonadab.
^ Iluonge bende ni Jonadab.
^ Iluonge bende ni Nebukadereza.
^ Iluonge bende ni Jonadab.
