Jeremia 36:1-32
36 Koro e higa mar ang’wen mar loch Jehoyakim+ wuod Josia ruodh Juda, wach Jehova ne obiro ne Jeremia niya:
2 “Kaw buk modol indikie weche duto ma asewacho e wi Israel, e wi Juda+ kod e wi ogendni duto.+ Inindik weche ma asewachoni chakre chieng’ ma ne awuoyo kodi e ndalo Josia, nyaka kawuononi.+
3 Samoro ka Jo-Juda owinjo masiche ma achano kelonegi, ginyalo weyo yoregi maricho, mi awenegi kethogi kod richogi.”+
4 Eka Jeremia noluongo Baruk+ wuod Neria, mi onyise weche duto ma Jehova nosewachone, kendo Baruk ne ondikogi e buk modol.+
5 Bang’e, Jeremia ne onyiso Baruk niya: “Sani otueya, kendo ok anyal donjo e od Jehova.
6 Omiyo, adwaro ni wang’ni sa ma ji tueyo chiemo, idhi isom weche manie buk modol mondo giwinj gik moko duto ma Jehova osenyisa, kendo ma asewachoni mi indiko. Onego itim kamano e od Jehova ka ma ji duto nyalo winjie, moriwo nyaka Jo-Juda duto mobiro koa e miechgi.
7 Samoro di po ka gilokore mi giweyo yoregi maricho kendo kwayo Jehova mondo okechgi. Nimar Jehova nigi mirima mager gi ogandani.”
8 Omiyo, Baruk wuod Neria notimo duto ma janabi Jeremia ne ochike ni otim. Ne osomo buk modol ma ne oting’o weche Jehova gi dwol maduong’ e od Jehova.+
9 Koro e higa mar abich mar loch Jehoyakim+ wuod Josia ruodh Juda, dwe mar ochiko, ji duto ma ne ni Jerusalem, kod ji duto ma nobiro Jerusalem koa e mier madongo mag Juda, ne ochako tueyo e nyim Jehova.+
10 Eka Baruk ne odonjo e od Jehova, e ot ma iye mar Gemaria+ wuod Shafan+ jandiko, ma ne nie laru ma malo but dho rangach manyien mar od Jehova,+ mi osomo e nyim ji duto ma ne ni kanyo weche duto ma ne ni e buk modol ma Jeremia ne onyise ni ondiki.
11 Ka ne Mikaya wuod Gemaria wuod Shafan owinjo weche Jehova ma ne osom e buk modolno,
12 ne odhi e od ruoth, modonjo e ot ma iye mar jagoro. Jotelo duto ne ni kanyo, ne gin Elishama+ jagoro, Delaya wuod Shemaya, Elnathan+ wuod Akbor,+ Gemaria wuod Shafan, Zedekia wuod Hanania, gi jotelo mamoko duto.
13 Kae to Mikaya ne onyisogi weche duto ma ne owinjo ka Baruk osomo e nyim ji koa e buk modol.
14 Eka jotelogo ne ooro Jehudi wuod Nethania wuod Shelemia wuod Kushi ir Baruk niya: “Bi gi buk modol ma ne isomo e nyim jicha.” Omiyo, Baruk wuod Neria nokawo buk modolno modhigo irgi.
15 Jotelogo ne okwaye niya: “Bedie piny mondo isomnwa weche manie buk modolno.” Eka Baruk ne osomonegi.
16 Bang’ ka ne gisewinjo wechego duto, ne ging’iyore ka giluor, kendo ne giwacho ne Baruk niya: “Nyaka wanyis ruoth wechegi duto.”
17 Eka ne gipenjo Baruk niya: “Nyiswa ane kaka ne indiko wechegi duto. Dibed ni Jeremia e ma ne wachoni wechego to indiko?”
18 Baruk nodwokogi niya: “Jeremia e ma ne owachona wechegi duto mi andikogi e bugno gi wino.”
19 Kae to jotelo ne owacho ne Baruk niya: “Dhi upondi, in kaachiel gi Jeremia kendo ng’ato ang’ata kik ng’e ka ma untie.”+
20 Eka jotelogo ne okawo buk modolno ma gikano e ot ma iye mar Elishama. Kae to ne gidhi e laru ir ruoth mi ginyise gik moko duto ma ne giwinjo.
21 Ruoth ne ooro Jehudi+ mondo odhi oomne buk modolno, mi Jehudi ne odhi oome e ot ma iye mar Elishama jagoro. Kendo ne osome ne ruoth kod jotelo duto ma ne ochung’ but ruoth.
22 Ne en dwe mar ochiko,* kendo ne oyudo ruoth obet ka oyo mach e ot ma ojabetiega ka piny ng’ich.
23 To ka Jehudi ne osetieko somo lain adek kata ang’wen kama, ruoth ne ng’ado kuonde mosesomogo gi pand jagoro kendo wite e mach. Ne otimo kamano nyaka Jehudi otieko somo buk modolno duto.
24 To ruoth kod jotichne duto ma ne owinjo kisomo wechego ne ok obwok, kata yiecho lepgi.
25 Kata obedo ni Elnathan,+ Delaya,+ gi Gemaria+ ne osayo ruoth ni kik owang’ buk modolno, ne ok owinjogi.
26 E wi mano, ruoth ne ochiko Jerameel wuod ruoth, Seraya wuod Azriel, kod Shelemia wuod Abdeel, mondo odhi omak Baruk jagoro kod Jeremia janabi, kata kamano Jehova ne opandogi.+
27 Kendo bang’ ka ruoth ne osewang’o buk ma ne oting’o weche ma Jeremia ne onyiso Baruk mondo ondiki,+ wach Jehova ne obiro ne Jeremia niya:
28 “Kaw buk machielo mondo indikie weche duto ma ne nie buk ma Jehoyakim ruodh Juda ne owang’ocha.+
29 Kendo iniwach ne Jehoyakim ruodh Juda ni, ‘Ma e gima Jehova owacho: “Isewang’o bugni, kendo isepenjo ni, ‘Ang’o momiyo ne indiko niya: “Ruodh Babulon nobi mi enoketh pinyni kendo tieko dhano kod le duto”?’+
30 Kuom mano, ma e gima Jehova owacho ni biro timore ne Jehoyakim ruodh Juda, ‘Onge wuode kata nyakware ma biro bet e kom-loch Daudi,+ kendo ibiro wit ringrene oko mondo wang’ chieng’ ogoye godiechieng’, kendo koyo mang’ich ochame gotieno.+
31 Abiro kume kaachiel gi nyikwaye kod jotichne duto nikech kethogi, kendo abiro kelonegi kaachiel gi jo ma odak Jerusalem gi Jo-Juda masiche duto ma ne awacho ni anakelnegi+ nikech ne gidagi winja.’”’”+
32 Eka Jeremia nokawo buk machielo momiyo Baruk wuod Neria jagoro,+ mi onyise weche duto ma ne nie buk ma Jehoyakim ruodh Juda ne owang’o.+ Kendo ne onyise weche moko momedore ma chalo gi mokwongoka.
Weche Moler Piny
^ Ma ne en dier dwe mar Novemba nyaka e dier dwe mar Desemba. Som Apendiks B15.
