Jeremia 37:1-21
37 Ruoth Zedekia+ wuod Josia nochako locho kar Konia*+ wuod Jehoyakim, nimar Nebukadnezar* ruodh Babulon nokete ruoth e piny Juda.+
2 Kata kamano, en gi jotichne kaachiel gi ji duto ne ok giwinjo wach ma Jehova ne oorogo janabi Jeremia.
3 Ruoth Zedekia ne ooro Jehukal+ wuod Shelemia kod Zefania+ wuod Maaseya jadolo ir janabi Jeremia niya: “Wakwayi ni isanwa Jehova Nyasachwa.”
4 Noyudo Jeremia odak adaka gi ji ka en thuolo, nimar ne pok okete e tuech.+
5 Koro Jo-Kaldea ma ne olworo Jerusalem nowinjo ni jolwenj Farao biro koa Misri.+ Omiyo, ne giweyo monjo Jerusalem.+
6 Eka wach Jehova nobiro ne janabi Jeremia niya:
7 “Ma e gima Jehova Nyasach Israel owacho, ‘Dhi ir ruodh Juda ma ne oori ira mondo iwachne niya: “Jolwenj Farao ma biro konyou kedo biro dok thurgi Misri.+
8 To Jo-Kaldea biro duogo mi gimonj dalani, kendo gibiro wang’e gi mach.”+
9 Ma e gima Jehova wacho, “Kik uwuondru kuwacho ni, ‘Jo-Kaldea ok bi monjowa.’ Nikech kuom adier, ginimonju.
10 Kata dabed ni unyalo kedo gi jolweny mag Jo-Kaldea ma jo ma ohinyore kende e modong’, pod jo ma ohinyorego nyalo a malo kendo wang’o dalani.”’”+
11 Bang’ ka jolwenj Jo-Kaldea noweyo monjo Jerusalem nikech ne giwinjo ni jolwenj Farao biro,+
12 Jeremia ne oa Jerusalem mi odhi ir joggi e piny Benjamin+ mondo oyud pokne.
13 To ka ne ochopo e Ranga Benjamin, jatend jorit ma nyinge Irija wuod Shelemia wuod Hanania ne omako janabi Jeremia mowachone niya: “Iseweyowa mi idhi riwori gi Jo-Kaldea!”
14 Kata kamano, Jeremia nodwoke niya: “Ooyo, ok nadhi riwora gi Jo-Kaldea.” To Irija ne odagi winje. Omiyo, ne omake mi otere ir jotelo.
15 Mirima nomako jotelogo+ mi gigoyo Jeremia kendo tueye+ e od Jehonathan jagoro. Odno ne oselok mobedo od tuech.
16 Ne gitueyo Jeremia e od tuech moro ma ne nie bwo lowo ma nodin matek, kendo ne obedo kuno aming’a.
17 Eka ruoth Zedekia ne ooro wach ni mondo okelne Jeremia e ode,+ kendo nopenje ling’ling’ niya: “Be nitie wach moro amora moa kuom Jehova?” Jeremia nodwoke ni, “Ee nitie, ibiro chiwi e lwet ruodh Babulon!”+
18 Kendo Jeremia nopenjo Ruoth Zedekia niya: “En ang’o marach ma asetimoni, gi jotichni, kaachiel gi ji duto momiyo utueya?
19 Ere jonabiu ma nokoronu wach ni, ‘Ruodh Babulon ok bi monjou, kendo ok bi monjo pinyni’?+
20 Koro asayi ni mondo iwinja, A ruoth. Yie iwinj kwayona. Kik iduoka e od Jehonathan+ jagoro, nimar ka adok kuno to anyalo tho.”+
21 Omiyo, Ruoth Zedekia ne ochiko ni mondo otue Jeremia e Laru mar Jarit,+ kendo ni omiye makate achiel pile ka pile koa kuom jolos makate.+ Ne gimiye makate nyaka ne makate orumo e dalano.+ Kamano, ne otue Jeremia e Laru mar Jarit.
