Jeremia 38:1-28
38 Koro, Shefatia wuod Matan, Gedalia wuod Pashur, Jukal+ wuod Shelemia, kod Pashur+ wuod Malkija, ne owinjo weche ma Jeremia ne wacho ne ji duto niya:
2 “Ma e gima Jehova owacho, ‘Ng’ato ang’ata modong’ e dalani biro tho gi ligangla, kech, kata tuo malich.+ To ng’ato ang’ata mochiwore e lwet Jo-Kaldea biro tony, kendo ngimane biro chalo ka gima oyako e lwet wasigu.’+
3 Ma e gima Jehova owacho, ‘Adier, ibiro chiw dalani e lwet jolweny mag ruodh Babulon, kendo obiro kawe.’”+
4 Jotelogo ne onyiso ruoth niya: “Wakwayi mondo oneg ng’atni,+ nikech kowuoyo kama to onyoso chuny jolweny kaachiel gi jo modong’ e dalani. Waneno ni ng’atni dwaro ni ji oyud masira, to ok kuwe.”
5 Ruoth Zedekia ne odwokogi niya: “Onge wach! Timuru gima uneno ni ber, nimar ruoth ok nyal geng’ou.”
6 Omiyo, ne gikawo Jeremia mi giwite e bugo moro matut. Bugono ne en mar Malkija wuod ruoth, kendo ne okunye e Laru mar Jarit.+ Noyudo bugono onge gi pi to mana chuodho. Ne giloro Jeremia gi tonde mi nochako nimo e chuodho.
7 Ebed-melek+ Ja-Ethiopia, jatich ma bwoch ma ne tiyo e od ruoth nowinjo ni jotelogo nosenyumo Jeremia e bugo. Noyudo ruoth obet e Ranga Benjamin,+
8 omiyo, Ebed-melek noa e od ruoth, mi odhi onyiso ruoth niya:
9 “Yaye ruodha, jogi osetimo gima ok ber kata matin! Gisenyumo janabi Jeremia e bugo ka ma kech biro negee, nikech onge chiemo modong’ e dala duto.”+
10 Eka ruoth ne ochiko Ebed-melek Ja-Ethiopia niya: “Kaw chwo 30 mondo udhi ugol Jeremia e bugono ka pok otho.”
11 Omiyo, Ebed-melek ne okawo jogo mi odhi kodgi nyaka e od ruoth. Ne gidonjo e ot moro ma ne nie bwo od keno.+ Ebed-melek nokawo otembechni kod lewni moko moti mi olorogi piny ne Jeremia e bugo kotiyo gi tonde.
12 Eka Ebed-melek Ja-Ethiopia nonyiso Jeremia niya: “Ket lewnigo e yuothi mondo tonde kik hinyi.” Jeremia notimo kaka ne onyise,
13 mi ne giywaye gi tonde mi gigole oko. Bang’ mano, ne otue Jeremia e Laru mar Jarit.+
14 Ruoth Zedekia ne ooro wach mondo oluongne Jeremia e rangach mar adek, ma ne nie od Jehova. To ka nosebiro ire, ruoth nowacho ne Jeremia niya: “Adwaro penji wach moro, to kik ipanda kata matin.”
15 Jeremia ne onyiso Zedekia kama: “Ka anyisi wach madier to ibiro nega. To ka ang’adoni rieko, ok ibi winja.”
16 Kuom mano, Ruoth Zedekia ne okuong’ore ne Jeremia aling’ling’ niya: “Akuong’ora gi nying Jehova, Nyasaye ma nochueyowa, ok abi negi, kendo ok abi chiwi e lwet jo ma dwaro negi.”
17 Eka Jeremia nowacho ne Zedekia niya: “Ma e gima Jehova Nyasach oganda lweny, Nyasach Israel owacho, ‘Ka ichiwori e lwet jotend ruodh Babulon to ibiro tony, kendo dalani ok bi wang’ gi mach. Adier ibiro tony kaachiel gi joodi.+
18 To ka idagi chiwori e lwet jotend ruodh Babulon, ibiro chiw dalani e lwet Jo-Kaldea, mi gibiro wang’e gi mach.+ Kendo ok ibi tony e lwetgi.’”+
19 Eka Ruoth Zedekia ne onyiso Jeremia niya: “Aluoro Jo-Yahudi moseringo modok ne Jo-Kaldea, nimar kochiwa e lwetgi to ginyalo sanda malit.”
20 To Jeremia nodwoke niya: “Ok nochiwi e lwetgi. Omiyo, akwayi, winj dwond Jehova mana kaka asenyisi, eka ok nonegi, kendo weche nodhini maber.
21 To kitamori chiwori e lwetgi, ma e gima Jehova osefwenyona:
22 “Mon duto modong’ e od ruodh Juda, ibiro gol mi ter ne jotend ruodh Babulon,+ kendo giniwach niya sa ma iterogi,‘Osiepeni ma ne igeno osewuondi mi giloyi.+
Gisemiyo tiendi onyumore e chuodho.
Giseringo mi giweyi.’
23 Gibiro kawo mondeni gi nyithindi duto mi giter ne Jo-Kaldea, kendo ok ibi tony e lwetgi. Ruodh Babulon biro maki,+ kendo in e mibiro miyo owang’ dalani.”+
24 Eka Zedekia ne owacho ne Jeremia niya: “Kik inyis ng’ato ang’ata wechegi, di po ka itho.
25 To ka jotelo owinjo ni awuoyo kodi, mi gibiro penji ni, ‘Wachnwae mbaka ma nugoyo gi ruoth. Kipandowa wach moro, to wabiro negi.+ Ruoth ne onyisi ang’o?’
26 Ibiro dwokogi niya, ‘Ne akwayo ruoth mondo kik oduoka e od Jehonathan, di po ka atho kuno.’”+
27 Bang’ kinde, jotelo duto mag ruoth nodhi ir Jeremia mi gipenje gima ne giwacho gi ruoth, to ne onyisogi mana kaka ruoth nosechiko ni owachi. Omiyo, ne ok ginyal timo gimoro nikech onge ng’at ma nowinjo gik ma nowacho gi ruoth.
28 Jeremia ne osiko e Laru mar Jarit+ nyaka chieng’ ma ne okaw Jerusalem. Chieng’ ma ne ikawo Jerusalem, pod noyudo ka en kuno.+
