Jeremia 4:1-31
4 “Yaye Israel, ka iduogo,” Jehova owacho,“Ka iduogo iraKendo ka igolo sanamu magi makwero e nyima,Eka ok inibed ng’at ma bayo abaya.+
2 Kendo ka ikuong’ori gi adiera, gi bura makare, kendo gi tim makare niya,‘Akuong’ora gi nying Jehova!’Eka ogendni biro yudo gueth kokalo kuome,Kendo ginisungre nikech en.”+
3 Nimar ma e gima Jehova onyiso Jo-Juda kod Jo-Jerusalem:
“Pururu puotheu momewo,Kendo kik uchuo kodhi e kind kuthe.+
4 We mondo oteru nyangu nikech Jehova,Kendo uter chunyu nyangu,+Un Jo-Juda kod jo ma odak Jerusalem.
Mondo kik mirimba oliel ka mach magerMa onge ng’at ma nyalo nego,Nikech timbeu maricho.”+
5 Landeuru Juda, kendo huleuru Jerusalem.
Koguru kendo ugo tung’ e piny duto.+
Wachuru matek ni, “Chokreuru,Mondo waring e mier mochiel motegno.+
6 Chunguru bendera kochomo Sayun.
Manyuru kar bwok, kendo kik uchung’ achung’a,”Nimar akelo masira koa yo nyandwat,+ masira malich.
7 Osewuok oko ka sibuor moa e bungu;+Jal maketho ogendni osewuok.+
Osewuok ka ma odakie mondo oketh pinyu, kendo oweye kolich.
Ibiro keth miechu chuth kendo onge ng’at ma biro dakie.+
8 Kuom mano, rwakuru lep gunia,+Ywaguru,* gouru nduru,Nikech mirima mager mar Jehova pok oa kuomwa.
9 “E ndalogo,” Jehova owacho, “chuny ruoth biro tho,+Chuny jotende bende biro tho;Jodolo biro hum, to jonabi biro ng’eng’.”+
10 Eka nawacho niya: “Yaye Jehova Wuon Loch Duto! Adier isewuondo ogandani+ gi Jerusalem kiwacho ni, ‘Unubed gi kuwe,’+ to kara oseket ligangla e ng’utwa.”
11 E ndalogo ibiro wach ne ogandani gi Jerusalem niya:
“Yamo maliet nokuth koa e gode modong’ nono me thimEnotiek joga;*Ok nobi mondo opiedhi kata golo chilo.
12 An e ma nami yamo makutho matek oa kuondego.
Koro anahul buche ma abiro ng’adonegi.
13 Neuru! Enobi ka boche polo,Gechene chalo gi yamo mager.+
Farasene ringo matek moloyo otenga.+
Yaye piny lichnwa, nimar osekethwa!
14 Yaye Jerusalem, lwok richo manie chunyi mondo oresi.+
Ibiro siko kiparo gik maricho nyaka karang’o?
15 Nimar nitie dwol moro ma lando wach e Dan,+Kendo olando masira e gode mag Efraim.
16 Landeuru, ee, landeuru ne ogendni;Landuru gima dhi yudo Jerusalem.”
“Jorit* biro koa e piny moro man ka mabor,Gibiro goyo koko ne mier mag Juda.
17 Gimonje ka gilwore koni gi koni ka jorit ma rito puodho ma ok ochiel,+Nimar oseng’anyona,”+ Jehova owacho.
18 “Yoreu kod timbeu biro hinyou uwegi.+
To mano kaka masira moyudou lit,Nimar ochopo nyaka e chunyu!”
19 Yaye awinjo malit, awinjo malit!
Awinjo malit ahinya e chunya.
Chunya gwecho matek.
Ok anyal ling’,Nimar asewinjo ka tung’ ywak,Dwol ma nyiso lweny.*+
20 Ilando masira bang’ masira,Nimar pinyno duto osekethi.
Apo mana ka hembena osekethi,Matin nono, to lep hembena bende okethi.+
21 Nyaka karang’o ma abiro neno bendera ka kwadhore,Kendo winjo dwond tung’ ka ywak?+
22 “Nimar joga ofuwo;+Ok gidewa kata matin.
Gin nyithindo mofuwo ma weche ok donjnegi.
Gilony mana e timo gik maricho,To ok ging’eyo timo gik mabeyo.”
23 Ne arango pinyno, kendo ne! ne onge gimoro e iye.+
Ne arango polo, to ne onge gima ne rienyie.+
24 Ne arango gode madongo, kendo ne! ne giyiengni,Gode matindo bende ne tetni.+
25 Ne arango, kendo ne! ne onge ng’ato ang’ata,Kendo winy ma fuyo e kor polo noseringo.+
26 Ne arango, kendo ne! puodho maber noselokore thim,Kendo mieche duto nosekethi.+
Jehova e ma ne otimo mano,Nikech mirimbe ne ger.
27 Ma e gima Jehova owacho: “Piny duto biro dong’ nono,+To ok abi kethe chuth.
28 Ma e momiyo piny biro kuyo,+Kendo polo nolokre mudho.+
En nikech asewacho kendo aseng’ado kamano,Ok abi loko pacha, abiro timo mana kamano.+
29 Dwond joidh farese kod joba aserni,Miyo dala duto ringo.+
Gidonjo e bunge,Kendo giidho lwendni.+
Mier duto dong’ nono,Onge jo ma dak e igi.”
30 Koro nikech osekethi, ibiro timo ang’o?
Ne ihero rwako lewni makwar,Kendo dusori gi gige dhahabu,Kendo wiro wang’i gi rangi marateng’.
Ne idusori kayiem nono+Nikech jo ma ne gombi oseweyi;Koro gidwaro mana tieki.+
31 Nimar asewinjo dwol ma chalo gi mar dhako ma nigi rem,Dwol ma chalo gi mar dhako ma chandore konyuolo nyathine mokwongo,Dwond nyar Sayun ma gamo muya.
Owacho kama sa ma orieyo bedene:+
“Piny lichna, asenyosora nikech jonek!”
Weche Moler Piny
^ Kata, “Gouru koru.”
^ Kata, “Enotiek nyar joga.” Nyalo bedo ni wendni ne iwero sa ma ikecho ng’ato.
^ Kata, “Jong’icho.” Tiende ni, jo ma rito kinde mowinjore mondo gimonj dala moro.
^ Kata nyalo bedo, “Awinjo koko mag lweny.”
