Jeremia 40:1-16
40 Wach Jehova ma ne obiro ne Jeremia bang’ ka Nebuzaradan+ jatend jorit ne ogonye Rama.+ Ne oyudo otere kuno kotueye gi nyororo kaachiel gi jomoko duto ma ne ogol Jerusalem kod Juda kitero e tuech e piny Babulon.
2 Eka jatend jorit nokawo Jeremia mowachone niya: “Jehova Nyasachi ne okoro ni masirani ne dhi biro e pinyni,
3 kendo Jehova osekelo masirano mana kaka ne owacho nikech ne uketho ne Jehova kendo ne utamoru winjo dwonde. Mano e momiyo masirani oseyudou.+
4 Kawuononi agonyo nyororo ma ne otuego lweteni. Ka ineno ni berni, bi wadhi Babulon, nimar abiro riti maber kuno. To ka ok idwar dhi koda, onge wach. Ne! Piny duto nie nyimi. Inyalo dhi kamoro amora mihero.”+
5 To ka ne Jeremia pod paro gima dotim, Nebuzaradan nowachone niya: “Dhi ir Gedalia+ wuod Ahikam+ wuod Shafan+ ma ruodh Babulon oseketo mondo oloch e wi mier duto mag Juda, mondo idag kode, kendo ibed gi jou; kata inyalo dak kamoro amora mihero.”
Eka jatend jorit ne omiye chiemo kod mich moko, kae to oweye mondo odhi.
6 Kamano, Jeremia ne odhi Mizpa+ ir Gedalia wuod Ahikam, kendo ne odak kode kuno kaachiel gi jo ma ne odong’ e pinyno.
7 Bang’ kinde, jotend jolweny moko kaachiel gi jolwenjgi ma ne ok ochiwore e lwet ruodh Babulon, ne owinjo ni ruodh Babulon noseketo Gedalia wuod Ahikam mondo oloch e wi piny Juda, kendo orit chwo, mon, gi nyithindo ma ne ok oter e tuech Babulon.+ Jo ma ne owego ne gin jo modhier moloyo e piny Juda.
8 Omiyo, jotend jolwenygo ne odhi Mizpa+ ir Gedalia. Ne gin Ishmael+ wuod Nethania, Johanan+ kod Jonathan yawuot Karea, Seraya wuod Tanhumeth, yawuot Efai Ja-Netofa, kod Jezania+ wuod Maakath. Ne gidhi kaachiel gi joggi.
9 Ka ne gichopo ire, Gedalia wuod Ahikam wuod Shafan ne okuong’orenegi kaachiel gi joggi niya: “Kik uluor tiyo ne Jo-Kaldea. Daguru e pinyni kendo uti ne ruodh Babulon, to weche biro dhinu maber.+
10 An to abiro dak Mizpa kendo anawuo e lou ka Jo-Kaldea obiro. To un chokuru divai, gi olembe e ndalo keyo, kod mo, mondo ukan-gi e kuonde keno magu, kendo udag e mier ma usekawo.”+
11 Kamano, Jo-Yahudi ma ne nie piny Moab, Amon, Edom kod pinje mamoko, ne owinjo ni ruodh Babulon ne oseweyo jo ma ne odong’ mondo odag adaga e piny Juda, kendo ni ne oseketo Gedalia wuod Ahikam wuod Shafan mondo oloch e wigi.
12 Omiyo, Jo-Yahudi duto ma ne oseke e pinje mamoko ne ochako duogo e piny Juda. Ne gidhi Mizpa ir Gedalia. Kendo ne gichoko divai kod olembe mang’eny ahinya.
13 Bang’e, Johanan wuod Karea kod jotend jolweny ma ne ok ochiwore e lwet ruodh Babulon, ne odhi Mizpa ir Gedalia.
14 Ne gipenje niya: “ Be ing’eyo ni Baalis ruodh Jo-Amon,+ oseoro Ishmael wuod Nethania mondo onegi?”+ To Gedalia wuod Ahikam ne ok oyie gi wachgino.
15 Eka Johanan wuod Karea nonyiso Gedalia ka gin Mizpa ling’ling’ niya: “We mondo adhi aneg Ishmael wuod Nethania kendo onge ng’at ma biro ng’eyo wachno. Ere gimomiyo diweye aweya mondo onegi? Donge mano nyalo miyo Jo-Yahudi ma oduogo iri oke mi ji duto modong’ e Juda rum?”
16 To Gedalia+ wuod Ahikam ne owacho ne Johanan wuod Karea niya: “Kik itim kamano nimar gima ia wacho e wi Ishmael en miriambo.”
