Jeremia 42:1-22
42 Eka jotend jolweny duto, gi Johanan+ wuod Karea, gi Jezania wuod Hoshaya, kaachiel gi ji duto, chakre ng’at matinie mogik nyaka ng’at maduong’ mogik, nodhi ir
2 janabi Jeremia, mi giwachone niya: “Wasayi ni ikwanwa Jehova Nyasachi mondo onyiswa ng’wono. Wasayi ni ilam ne jo modong’gi, nikech chon ne wang’eny to koro wasedong’ manok+ mana kaka inyalo neno.
3 Mad Jehova Nyasachi onyiswa yo monego waluw, kod gima onego watim.”
4 Janabi Jeremia ne odwokogi niya: “Asewinjou! Abiro sayo Jehova Nyasachu mana kaka usekwayo ni atim; kendo abiro nyisou gimoro amora ma Jehova owachona. Ok abi pandou wach moro amora.”
5 Ne gidwoko Jeremia kama: “Jehova mondo obed janeno makare kendo madier ka ok watimo duto ma Jehova Nyasachi biro nyisowa kokalo kuomi.
6 Bed ni onyisi gima ber kata gima rach, wabiro winjo dwond Jehova Nyasachwa ma waori ire. Nimar ka wawinjo dwond Jehova Nyasachwa, to mano e ma biro miyo wadhi maber.”
7 Koro, bang’ ndalo apar, wach Jehova ne obiro ne Jeremia.
8 Omiyo, Jeremia noluongo Johanan wuod Karea kod jotend jolweny duto ma ne ni kode, kaachiel gi ji duto, chakre ng’at matinie mogik nyaka ng’at maduong’ mogik.+
9 Nowachonegi niya: “Ma e gima Jehova Nyasach Israel, ma ne uora ire mondo asanu kendo kwayonu ng’wono owacho:
10 ‘Ka uyie dhi nyime dak e pinyni, abiro gerou kar kethou, kendo abiro pidhou kar pudhou, nimar masira ma ne akelonu biro miyo abed gi kuyo.*+
11 Kik uluor ruodh Babulon, ma sani miyou luoro.’+
“‘Kik uluore,’ Jehova owacho, ‘nimar an kodu mondo akonyu, kendo resou e lwete.
12 Abiro kechou,+ kendo en bende obiro kechou mi oduoku e pinyu.
13 “‘To ka uwacho ni, “Ok wanadag e pinyni!” mi utamoru winjo dwond Jehova Nyasachu
14 kuwacho ni, “Wabiro dhi mondo wadag e piny Misri,+ ka ma ok wabi nenoe lweny, kata winjo tung’ ma luongowa e lweny, kata winjo kech,”
15 kara winjuru gima Jehova owacho, yaye Jo-Juda modong’. Ma e gima Jehova Nyasach oganda lweny, Nyasach Israel owacho: “Ka uramo ni udwaro dhi e piny Misri mondo udag kuno kuom kinde,
16 to ligangla muluorono biro jukou, kendo kech ma uluorono bende biro jukou, kendo unutho e piny Misri kuno.+
17 Ji duto moramo ni nyaka gidhi gidag e piny Misri ibiro neg gi ligangla, gi kech, kendo gi tuoche malich. Onge ng’ato ang’ata kuomgi ma biro tony kuom masira ma abiro kelonegi.”’
18 “Nimar ma e gima Jehova Nyasach oganda lweny, Nyasach Israel owacho: “Mana kaka ne aolo mirimba kod ich-wang’ kuom jo ma nodak Jerusalem,+ e kaka abiro olo mirimba kuomu ka po ni udhi e piny Misri. Unulokru gima bwogo ji, ji biro jarou, yanyou, kendo kuong’ou.+ Bende, ok unune kae kendo.’
19 “Jehova osesiemou, yaye Jo-Juda modong’. Kik udhi e piny Misri. Ng’euru ni asesiemou kawuononi,
20 ni kethou e ma biro kelonu masira. Nikech un e ma ne uora ir Jehova Nyasachu ni, ‘Dhi isanwa Jehova Nyasachwa, kendo wanatim gima Jehova Nyasachwa biro wacho.’+
21 Asenyisou gik moko duto kawuononi, to ok unuwinj dwond Jehova Nyasachu, kata timo gik ma oora mondo anyisu.+
22 Kuom mano, ng’euru maler ni unutho gi ligangla, gi kech, kendo gi tuoche ka ma ugombo dhi dakieno.”+
Weche Moler Piny
^ Kata, “osemiyo aywago ang’e.”
