Jeremia 5:1-31
5 Wuoth e nderni mag Jerusalem.
Ng’i koni gi koni adimba.
Many e laru mage
Ka be diyud ng’at ma timo gik makare,Ma luwo adiera,+Eka abiro weyo ne dalano richone.
2 Kata ka gikuong’ore niya: “Akuong’ora gi nying Jehova!”
To pod gibiro kuong’ore gi miriambo.+
3 A Jehova, donge wang’i dwaro mana neno jo mohero adiera?+
Ne ichwadogi, to ne ok gibuok.
Ne itiekogi, to ne gitamore winjo puonjni.+
Wengegi ne tek moloyo lwanda,+Kendo ne gitamore lokore.+
4 To ne awacho e chunya niya: “Nyaka bed ni magi jochan.
Gionge rieko nikech ok ging’eyo yor Jehova,Kata buche ma Nyasachgi oseng’ado.
5 Koro, abiro dhi wuoyo gi jo ma nigi huma,Nimar nyaka bed ni ging’eyo yor Jehova adimba,Buche ma Nyasaye oseng’ado.+
Giduto ne giseturo jokMi gichodo tonde motueyogi.”
6 Mano e momiyo sibuor modak e bungu monjogi,Ondiek modak e thim siko kidhogi,Kwach kiyogi e miechgi.
Ng’ato ang’ata mowuok oko ikidho matindo tindo.
Nikech kethogi ng’eny;Timbegi maricho thoth.+
7 Ere kaka daweni richoni?
Nyithindi osejwang’a,Kendo gikuong’ore gi nying nyiseche manono.+
Ne amiyogi gik ma ne gidwaro,To ne giterore atera,Kendo ne gichokore e od jachode.
8 Gichalo gi farase ma gombo ohewo,Ng’ato ka ng’ato gombo chi wadgi.+
9 “Donge onego akumgi kuom gik ma kamago?” Jehova owacho.
“Donge onego achul kuor ne oganda ma kamano?”+
10 “Chadhuru puothene mag mzabibu mondo ukethgi,To kik ukethgi chuth.+
Ng’aduru bedene mochako twi,Nimar ok gin mag Jehova.
11 Od Israel kaachiel gi od JudaOsendhoga ahinya,” Jehova owacho.+
12 “Gisekwedo Jehova, kendo giwacho ni,‘Ok obi timo gimoro.*+
Onge masira ma biro yudowa;Ok wanane lweny* kata kech.’+
13 Yamo e mopong’o jonabi,Gionge gi wach* e igi.
Gibiro lal nono mana ka weche ma gikorogo!”
14 Kuom mano, ma e gima Jehova Nyasach oganda lweny owacho:
“Nikech jogi wacho wachno,Koro amiyo wechena obed ka mach e dhogi,+Kendo jogi nobed ka yien,Mi majno biro tiekogi.”+
15 “A in od Israel, eri akelonu oganda moro moa mabor,”+ Jehova owacho.
“En oganda mosiko.
En oganda mosebetie chakre chon,Oganda ma ok ung’eyo dhogi,Kendo ma wechegi bende ok uwinji.+
16 Ofukegi mag aserni chalo gi liel mong’amo dhoge;Giduto gin jolweny molony.
17 Gibiro tieko chambu kod makateu.+
Gibiro tieko yawuotu gi nyiu.
Gibiro tieko kwedhu gi jambu.
Gibiro tieko mzabibu magu gi ng’opeu.
Gibiro tieko miechu muchielo motegno kendo mugeno gi ligangla.”
18 “Kata mana e ndalogo, ok anatieku chuth.” Jehova owacho.+
19 “To ka gipenji ni, ‘Ang’o momiyo Jehova Nyasachwa osekelonwa gigi duto?’ Ibiro dwokogi ni, ‘Mana kaka ne ujwang’a mutiyo ne nyasaye ma wendo e pinyu, e kaka ubiro tiyo ne jomoko e pinygi.’”+
20 Land wachni ne od Jakobo,Kendo hule ne Juda, kiwacho niya:
21 “Winjuru wachni un jo mofuwo kendo ma weche ok donjnegi:+
Gin gi wengegi to ok ginen;+Gin gi itgi to ok giwinji.+
22 An Jehova apenjou kama, ‘Ere gimomiyo ok uluora?
Donge onego ukirni e nyima?
An e ma naketo kuoyo manie nam mondo ogeng’ nam,Tong’ mosiko ma pi ok nyal kalo.
Kata ka apaka mag nam ogingore to ok ginyal kadho;Kata ka giwuo matek, pod ok ginyal kalo tong’no.+
23 To jogi wigi tek, kendo chunygi oseng’anyona;Gisebaro ma gichako luwo yoregi giwegi.+
24 Kendo ok giwach e chunygi niya:
“Koro waluoruru Jehova Nyasachwa,Ng’at ma miyowa koth e kindene,Kodh chwiri gi kodh opon,Ng’at ma miyowa kinde mag keyo higa ka higa.”+
25 Timbeu maricho e mosegeng’o gigo kik binu;Richou osemonou yudo gik mabeyo.+
26 Nimar nitie jo maricho e kind joga.
Gibuto mana ka jochik winy.
Gichiko obadho ma neko,To dhano e ma gimako.
27 Mana kaka od winyo mopong’ gi winy,E kaka utegi opong’ gi mibadhi.+
Mano e momiyo gin gi teko kendo gimewo.
28 Gichwe kendo dendgi leny;Gipong’ gi richo.
Ok giyal kare buch nyithi kiye,+Mondo weche odhinegi maber;Ok ging’ad bura makare ne jochan.’”+
29 “Donge onego akumgi kuom gik ma kamago?” Jehova owacho.
“Donge onego achul kuor ne oganda ma kamano?
30 Gimoro marach kendo malich osetimore e pinyno:
31 Jonabi koro miriambo,+Jodolo tayo ji gi agoko.
Kendo mano e gima joga ohero.+
To ubiro timo ang’o ka giko ochopo?”
