Jeremia 52:1-34
52 Zedekia+ nobedo ruoth ka en jahigni 21 kendo nolocho kuom higni 11 kodak Jerusalem. Nying min mare ne en Hamutal+ nyar Jeremia ma Ja-Libna.
2 Nodhi nyime timo gik maricho e wang’ Jehova. Notimo gik maricho duto ma Jehoyakim notimo.+
3 Mirimb Jehova e ma nomiyo gigo duto otimore Jerusalem kod Juda nyaka nochopo ka ma nogologi e nyime.+ Bende, Zedekia ne ong’anyo ne ruodh Babulon.+
4 E odiechieng’ mar apar dwe mar apar, e higa mar ochiko mar loch Zedekia, Nebukadnezar* ruodh Babulon nobiro gi jolwenje duto mondo gimonj Jerusalem. Ne gilworo dalano mi gigero ohinga molwore.+
5 Ne gilwore nyaka e higa mar 11 mar loch Zedekia.
6 E odiechieng’ mar ochiko, dwe mar ang’wen,+ kech ne ger ahinya e dalano, kendo ne onge chiemo ma ji ne nyalo chamo.+
7 Gikone, jolwenj Babulon ne omuko ohinga mag dalano, mi jolweny duto ne oringo ma giwuok e dalano gotieno. Ne gikalo e dho rangach ma ne nie kind ohinga ariyo ma ne ni but puoth ruoth, ka giluwo yo ma dhi Araba.+ To noyudo Jo-Kaldea pod olworo dalano.
8 Jolweny ma Jo-Kaldea ne olawo Ruoth Zedekia,+ mi gijuke e paw Jeriko, kendo jolwenje duto ne oringo moweye.
9 Ne gimake mi gitere ir ruodh Babulon ma noyudo ni Ribla e piny Hamath, mi ong’adone bura kuno.
10 Ruodh Babulon ne onego yawuot Zedekia e wang’e. Bende, ne onego jotelo duto mag Juda e Ribla kanyo.
11 Eka ruodh Babulon ne otucho wenge Zedekia,+ kae to otueye gi nyororo mar mula, motere Babulon. Ne odak e od tuech nyaka chieng’ ma nothoe.
12 E odiechieng’ mar apar, dwe mar abich, e higa mar 19 mar loch Nebukadnezar* ruodh Babulon, Nebuzaradan jatend jorit ma ne tiyo ne ruodh Babulon ne obiro Jerusalem.+
13 Ne owang’o od Jehova,+ od ruoth, kaachiel gi udi duto ma ne ni Jerusalem. Bende, ne owang’o ute duto madongo.
14 Jolwenj Jo-Kaldea ma nobiro gi jatend jorit ne omuko ohinga duto ma nolworo Jerusalem.+
15 Nebuzaradan jatend jorit ne okawo moko kuom jo ma nodhier kod jo ma nodong’ e dalano, mi oterogi e tuech. Bende, ne okawo jo ma ne odok ne ruodh Babulon, kaachiel gi jotich molony ma ne pod odong’.+
16 Kata kamano, Nebuzaradan jatend jorit noweyo moko kuom jo modhier ahinya e dalano mondo giti e puothe mag mzabibu kendo chunogi gi tije mamoko.+
17 Jo-Kaldea ne omuko sirni mag mula+ ma nolosgo od Jehova mi giturogi matindo tindo. Ne giketho geche+ kod Nam+ mar mula ma ne nie od Jehova, mi gitero mulago duto Babulon.+
18 Bende, ne gikawo ndope, opewni, makas mag ng’ado otambi, bakunde,+ okombe,+ kod sende duto ma nolos gi mula ma ne itiyogo e hekalu.
19 Jatend joritno nokawo besende,+ gik ting’o mach, bakunde, ndope, gik chungo teyni,+ okombe, kod bakunde ma nolos gi dhahabu lilo kod fedha.+
20 Mula ma Ruoth Solomon ne otiyogo e loso sirni ariyogo, Nam, ruedhi 12+ ma ne irenjoe Nam, kod geche ma ne itiyogo e od Jehova, ne pek ahinya mokalo apima.
21 Sirnigo ne romre. Bor moro ka moro ne en bede* 18, tol ma ne nyalo lwore ne romo bede 12;+ lachne ne en kor lith lwedo ang’wen,* kendo iye ne ni nono.
22 E wi siro ka siro ne nitie gimoro ma chalo agulu mar mula; bor mar agulu achiel ne en bede* abich;+ ne olwore gi thiwni kod gik machalo komamanga molos gi mula. Siro machielo bende ne chalo kamano, kendo en bende ne oketne komamanga.
23 Bethe sirogo ne nigi komamanga 96; tiende ni ne nitie komamanga 100 ma nolworo agulnigo.+
24 Jatend jorit ne omako jadolo maduong’ ma nyinge ne Seraya,+ gi Zefania+ jalupne, kaachiel gi ji adek ma ne rito dhoudi.+
25 Bende, ne omako jatend jolweny ma ne tiyo e od ruoth, gi osiepe ruoth abiriyo ma pod ne nie dalano, kaachiel gi jagoro mar jatend jolweny, jal ma ne ndiko nying jo ma nonego obed jolweny, kod ji 60 ma pod ne nie dalano.
26 Nebuzaradan jatend jorit ne otero jogo duto Ribla ir ruodh Babulon.
27 Ruodh Babulon ne onegogi Ribla+ e piny Hamath. Kamano e kaka ne ogol Jo-Juda e pinygi motergi e tuech.+
28 Magi e jo ma Nebukadnezar* nomako motero e tuech. E higa mar abiriyo notero Jo-Yahudi 3,023 e tuech.+
29 E higa mar 18 mar loch Nebukadnezar,*+ ne okaw ji 832 e Jerusalem, motergi e tuech.
30 E higa mar 23 mar loch Nebukadnezar,* Nebuzaradan jatend jorit ne otero Jo-Yahudi 745 e tuech.+
Kuom mano, ji duto ma noter e tuech ne gin 4600.
31 Eka e odiechieng’ mar 25 dwe mar 12, ma ne en higa mar 37 nyaka ne ter Jehoyakin+ ruodh Juda e tuech, Evilmerodak ruodh Babulon nogonyo Jehoyakin ruodh Juda e jela.+ Mano e higa ma Evilmerodak nochakoe locho.
32 Ne owuoyo kode e yo mang’won, kendo ne oketo kom-lochne obedo gi duong’ moloyo mag ruodhi mamoko ma ne ni Babulon.
33 Omiyo, Jehoyakin ne olonyo lep jela, kendo ne ochiemo e od ruoth kuom ndalo duto mag ngimane.
34 Odiechieng’ kodiechieng’, ruodh Babulon ne miye chiemo nyaka chieng’ ma notho.
Weche Moler Piny
^ Iluonge bende ni Nebukadereza.
^ Iluonge bende ni Nebukadereza.
^ Bat achiel ne romre gi sentimita 44.5 (inj 17.5). Som Apendiks B14.
^ Kor lith lwedo achiel ne romre gi sentimita 1.85. Som Apendiks B14
^ Bat achiel ne romre gi sentimita 44.5 (inj 17.5). Som Apendiks B14.
^ Iluonge bende ni Nebukadereza.
^ Iluonge bende ni Nebukadereza.
^ Iluonge bende ni Nebukadereza.
