Jeremia 7:1-34
7 Ma e wach Jehova ma nobiro ne Jeremia:
2 “Chung’ e dho ranga od Jehova mondo iland oteni, ‘Winjuru wach Jehova un Jo-Juda duto ma donjo gi dho rangeyegi mondo ukulru ne Jehova.
3 Ma e gima Jehova Nyasach oganda lweny, Nyasach Israel owacho: “Lokuru yoreu kod timbeu, eka anayienu udag kae.+
4 Kik ugen weche mag miriambo, kendo wacho ni, ‘Ma en hekalu mar Jehova, hekalu mar Jehova, hekalu mar Jehova!’+
5 Nimar ka uloko yoreu gi timbeu adier; ka uyalo buch ng’ato gi nyawadgi e yo makare;+
6 ka ok usando jodak, nyithi kiye, kod mond liete;+ ka ok uchuero remb jo ma onge ketho; kata luwo nyiseche mamoko ma biro mana hinyou uwegi;+
7 eka abiro yienu dak e pinyni, en e piny ma namiyo kwereu mondo gidagie nyaka chieng’.”’”
8 “To un usegeno mana weche mag miriambo,+ onge ohala ma wechego biro kelonu.
9 Ere kaka unyalo kwelo,+ neko, teroru, kuong’oru gi miriambo,+ chiwo misengni ne Baal,+ kendo luwo nyiseche manono ma ne ok ung’eyo,
10 kae to ubiro chung’ e nyima e ot miluongo gi nyinga kuwacho ni, ‘Ibiro reswa,’ ka konchiel to utimo timbe marichogo duto?
11 Ang’o momiyo useloko ot miluongo gi nyingani mondo obed rogo mar jomecho?+ An awuon aseneno mano gi wang’a,” Jehova owacho.
12 “‘To koro dhiuru Shilo+ ka ma ne akwongo yiero mondo nyinga obedie,+ mondo une gima ne atimone nikech richo mar joga Israel.+
13 To ne udhi nyime gi timbego,’ Jehova owacho, ‘kendo kata obedo ni ne awuoyo kodu nyadinwoya, to ne ok uwinjo.+ Ne asiko ka aluongou, to ne udagi dwoka.+
14 Omiyo, mana kaka ne atimo ne Shilo,+ e kaka abiro timo ne ot mugeno+ kendo miluongo gi nyingani.+ Kamano bende e kaka abiro timo ne piny ma ne amiyou kod kwereu.
15 Abiro riembou e nyima, mana kaka ne ariembo oweteu duto ma nyikwa Efraim.’+
16 “To in, kik ilem ne jogi. Kendo kik ikwaya wach moro kata saya e logi,+ nimar ok abi winji.+
17 Donge ineno gik ma gitimo e mier mag Juda kod e nderni mag Jerusalem?
18 Nyithindo moto, wuone kudho mach, to mine dwalo mogo mondo gilosgo kek ma gichiwo ne Ruoth ma Dhako mar Polo,*+ kendo gichiwo chiwo miolo ne nyiseche mamoko mondo gichwanyago.+
19 ‘Be giparo ni an e ma gihinya?’* Jehova owacho. ‘Donge gin e ma gihinyore kendo kelo wich-kuot kuomgi giwegi?’+
20 Kuom mano, ma e gima Jehova Wuon Loch Duto wacho, ‘Neuru! Abiro olo mirimba mager kae,+ abiro ole kuom ji kod le, kuom yiende manie pap kod gik ma lowo nyago. Gibiro wang’ kendo majno ok bi tho.’+
21 “Ma e gima Jehova Nyasach oganda lweny, Nyasach Israel wacho, ‘Keturu misengni miwang’o kuom misengni mamoko muchiwo, kendo ucham ring’ogo un uwegi.+
22 Nimar, chieng’ ma ne agolo kwereu e piny Misri, ne ok achikogi mondo gichiw misengni miwang’o kod misengni mamoko.+
23 To ma e chik ma ne amiyogi: “Winjuru dwonda, mi anabed Nyasachu to unubed joga.+ Wuothuru e yore duto ma achikou mondo weche odhinu maber.”’+
24 To ne ok giwinjo kata chiko itgi;+ kar mano, ne giluwo riekogi kod chunygi ma nopong’ gi richo,+ mi kar sudo nyime, ne gidok mana chien.
25 Ne gitimo kamano chakre chieng’ ma ne giwuok e piny Misri nyaka kawuononi.+ Omiyo, asebedo ka aoronu jotichna ma jonabi pile ka pile.+
26 To ne gidagi winja, kendo ne ok gichikona itgi.+ Kar mano, wigi ne tek, kendo ne gitimo madongo moloyo kata kweregi!
27 “Iniwachnegi wechegi duto,+ to ok giniwinji; iniluonggi, to ok ginidwoki.
28 Ibiro wachonegi ni, ‘Un e oganda ma nodagi winjo dwond Jehova Nyasachgi kod puonjne. Onge ng’ato ang’ata ma wacho adier e kindu nikech adiera oselalnu.’+
29 “Lieluru yie wiu maboyo,* kendo uwitgi mabor, ywaguru* e gode modong’ nono, nimar Jehova osedagi kendo obiro jwang’o tieng’ mosewang’o iyeni.
30 ‘Jo-Juda osetimo gik maricho e wang’a,’ Jehova owacho. ‘Gisechungo sanambegi makwero e ot miluongo gi nyinga, mondo gidwany oda.+
31 Gisegero kuonde moting’ore malo miluongo ni Tofeth manie Hoho mar Wuod Hinom,*+ mondo giwang’ie yawuotgi gi nyigi.+ Ne ok achikogi mondo gitim gima kamano, kendo chunya pok noparo timo kamano kata matin.’+
32 “‘Neuru! ndalo biro,’ Jehova owacho, ‘ndalo ma ok noluong kanyo ni Tofeth kata Hoho mar Wuod Hinom,* to ibiro luonge ni Hoho mar Nek. Gibiro yiko ji e Tofeth nyaka opong’, ma koro onge ka ma diyikie ng’ato.+
33 Ringre ogandani biro bedo chiemb winy ma fuyo e kor polo kod ondiegi mag piny, kendo onge ng’at ma biro riembogi.+
34 Abiro tieko mor gi ilo duto, kendo ok nochak owinj dwond miaha kod wuon kisera+ e mier mag Juda kod e nderni mag Jerusalem, nimar ibiro keth pinyno chuth.’”+
Weche Moler Piny
^ Nying ma nomi nyasaye ma dhako ma Jo-Israel ma nong’anyo ne lamo; onyalo bedo nyasaye ma ne konyo e weche nyuol.
^ Kata, “gichwanya; giwang’o iya.”
^ Yie wich maboyo ne nyiso ni ng’ato ochiwore ne Nyasaye kaka Ja-Nazir.
^ Kata, “weruru wende ywagruok.”
^ Som Tiend Weche, “Gehena.”
^ Som Tiend Weche, “Gehena.”
