Ne Jo-Filipi 2:1-30
2 Omiyo, ka nitie wach moro amora ma jiwowa kuom Kristo, kata hera ma duogo chuny, kata jiwruok mar chuny, kata dewo jomamoko gadier kendo kechogi,
2 miuru morna opong’ chuth ka ubedo gi paro achiel kendo gi hera achiel, ka ubedo e winjruok achiel chuth e paro achiel.+
3 Kik utim gimoro mondo upiem+ kata kuparo ni ubeyo moloyo jomamoko,+ to bolreuru ka ukwano ni jomamoko oloyou gi ber.+
4 Kik ung’i mana gik ma kelonu ber un uwegi,+ to ung’i bende gik ma kelo ber ne jomamoko.+
5 Sikuru ka un gi paroni kuomu, ma Kristo Yesu bende ne nigo,+
6 jal ma kata obedo ni ne en e kit Nyasaye,+ ne ok oparo mar mecho, tiende ni, mondo obed ma romre gi Nyasaye.+
7 Ooyo, noweyo duto ma ne en-go kendo nokawo kit misumba+ mi obedo dhano.+
8 E wi mano, ka nobiro kaka dhano, nobolore mi noluwo kaka Nyasaye ne chike nyaka e tho,+ ee, tho e yadh-sand.*+
9 Mano e momiyo Nyasaye ne omiye migawo ma malo moloyo,+ kendo nomiye nying moloyo nyinge mamoko duto,+
10 mondo e nying Yesu, ji duto ogo chonggi piny—jo ma ni e polo gi jo ma ni e piny kod jo ma ni e bwo lowo+—
11 kendo lep ka lep onego ohul ayanga ni Yesu Kristo en Ruoth,+ mondo Nyasaye Wuoro oyud duong’.
12 Nikech mano, un jo ma ahero, mana kaka kinde duto usebedo ka uluwo weche michikou, ok mana ka antiere kodu kende, to sani ma koro utimo moloyo ka aonge kodu, sikuru ka utiyo matek ne warruok maru, kutimo kamano gi luoro kod kirni.
13 Nimar Nyasaye e ma tegou komiyou teko kod gombo mar timo duto mohero.
14 Sikuru kutimo gik moko duto ma ok ung’ur+ kata mino wach,+
15 mondo ubed maler kendo ma onge bura, kubedo kaka nyithind Nyasaye+ ma onge ketho e kind tieng’ morochore kendo mobam,+ ma urienyie kaka ler e piny,+
16 kumako motegno wach mar ngima.+ Eka abedie gi gima dimiya mor chieng’no mar Kristo, ka ang’eyo ni ng’wech ma ne aringo kata tichna matek ne ok en kayiem nono.
17 To kata ka iola piny mana kaka chiwo miolo+ e wi misango+ kod tich maler* ma yieu osejiwou mondo utim, ail kendo amor kodu uduto.
18 E yo ma kamano, un bende onego ubed moil kendo mamor kanyachiel koda.
19 Koro an gi geno kuom Ruoth Yesu ni achiegni oronu Timotheo+ mondo chunya oduogi ka ayudo wach moa kuomu.
20 Nimar aonge gi ng’at machielo ma nigi chuny kaka ma en-go kendo ma biro dewou gadier.
21 Nikech jomamokogo duto manyo mana dwachgi giwegi, to ok mag Yesu Kristo.
22 To ung’eyo kaka en owuon nosechiwore mana kaka nyathi+ ma tiyo gi wuon mare, notiyo koda matek e miyo wach maber olandre.
23 Kuom mano, en e jal ma ageno oro iru mapiyo bang’ ka aseneno kaka weche biro bet koda.
24 Adier, an gi geno motegno kuom Ruoth ni an bende achiegni biro.+
25 To gie sani, aneno ni ber mondo aornu owadwa Epafrodito, ma en jatich wadwa ma wakedogo kanyachiel, en jal ma ne uoro, kendo en jatich ma konya e gik ma achando,+
26 nimar en gi siso mar nenou uduto, kendo en gi parruok mang’eny nikech ne uwinjo ni ne otuo.
27 En adier ni ne otuo mi both kotho; to Nyasaye ne okeche, to ok mana en kende, to an bende, mondo kik abed gi kuyo nyadiriyo.
28 Kuom mano, aore mapiyo ahinya mondo ka unene ubedie mamor kendo, mondo an bende kik abed gi parruok ahinya.
29 Omiyo, rwakeuru gi mor duto kaka itimoga ne jotich Ruoth, kendo umi jo ma chalo kamano duong’,+
30 nimar ne ochiegni tho nikech tich mar Kristo,* kochiwo ngimane mi both kotho, mondo okonya gi kony ma un uwegi ne ok unyal konyago nikech ne un mabor.+
Weche Moler Piny
^ Som Tiend Weche.
^ Kata, “tich mitiyo ne jomamoko.”
^ Kata nyalo bedo, “nikech tich Ruoth.”
