Ne Jo-Galatia 5:1-26
5 Omiyo, Kristo osegonyowa mondo wayud thuolo ma kamano. Kuom mano, chung’uru motegno,+ kendo kik uwe mondo otueu e jok mar wasumbni kendo.+
2 Neuru! An Paulo, awachonu ni, ka oteru nyangu, onge ber mubiro yudo kuom gima Kristo osetimo.+
3 Awacho kendo ka an gadier ni, ng’at ma oter nyangu nigi ting’ mar timo duto ma Chik dwaro.+
4 Usepogoru gi Kristo, un ma utemo ni okwanu jo makare kokalo kuom chik;+ useweyo ng’wonone mogundho.
5 Wan to warito gi siso bedo jo makare, ma en gima nyalore mana kokalo kuom roho maler kod yiewa.
6 Nimar kuom jo ma ni e winjruok achiel gi Kristo Yesu, bedo ng’at moter nyangu kata ng’at ma ok oter nyangu ok en gimoro,+ to yie ma tiyo kuom hera e ma konyo.
7 Ne oyudo uringo maber.+ En ng’a ma nogeng’ou dhi nyime luwo adiera?
8 Jal ma noluongou ok e ma ne oloko pachu kamano.
9 Thowi matin yienyo mogo duto.+
10 An gadier chuth ni un, ma un e winjruok achiel gi Ruoth,+ ok ubi bedo gi paro mopogore; to ng’at ma wuondouno,+ kata bed ni en ng’a, enoyud kum mowinjore kode.
11 Owetena, ka po ni pod ayalo wach tero nyangu, kare ang’o momiyo pod isanda? Ka pod ayalo wach tero nyangu, kare koro wach yadh-sand* ma ayalo ok bed gima kelo chwanyruok.+
12 Daher ni jo ma temo chandou kamano orore giwegi.*
13 Owetena, ne oluongu mondo ubed thuolo; kata kamano, kik uti gi thuolono kaka yo mar luwo gombo mag ringruok,+ to kokalo kuom hera, tiuru ne joweteu.+
14 Nimar Chik duto osechopo* e chik achiel niya: “Nyaka iher wadu kaka iherori iwuon.”+
15 Kata kamano, ka usiko ukayoru kendo ukidhoru e kindu uwegi,+ nonreuru ahinya mondo kik utiekru chuth.+
16 To awachonu ni, Dhiuru nyime wuotho ka roho chikou+ to ok ubi timo timbe ma luwore gi gombo mag ringruok ngang’.+
17 Nimar ringruok gi gombone kedo gi roho, to roho kedo gi ringruok; bende, gik moko ariyogi kwedore, kendo mano miyo ok utim gik moko sie mudwaro timo.+
18 E wi mano, ka roho e ma tayou, koro ok un e bwo chik.
19 Koro timbe mag ringruok nenore ratiro, kendo gin terruok,*+ tim ma ok ler, tim wang’-teko,*+
20 lamo mar sanamu, timbe-juok,+ sigu, dhawo, nyiego, mirima mager, ywaruok, pogruok, kidienje,
21 ich-lit, mer,+ nyasi mopong’ gi koko, kod gik ma kamago.+ Asiemou motelo kuom wechego, mana kaka ne asesiemou ni jo ma ong’iyo gi timo gik ma kamago ok bi yudo pok e Pinyruodh Nyasaye.+
22 Mopogore gi mano, olembe ma roho nyago gin hera, mor, kuwe, horuok, ng’wono, ber,+ yie,
23 muolo, kod ritruok.+ Onge chik ma kwedo gik ma kamago.
24 E wi mano, jo ma gin mag Kristo Yesu oseguro ringruok e yath kanyachiel gi gombone kod dwache.+
25 Ka wadak ka roho chikowa, wadhiuru nyime wuotho bende e yo mowinjore gi kaka roho chikowa.+
26 Kik wabed jo ma ketore ni beyo moloyo jomamoko,+ ka wajiwo piem e kind ji,+ kendo ka wabedo gi ich-lit gi jowetewa.
Weche Moler Piny
^ Som Tiend Weche.
^ Kata, “obed bwoch,” mano ne dhi mayogi ratiro mar luwo chike ma gin giwegi ne gijiwo.
^ Kata nyalo bedo, “inyalo ket.”
^ E dho Grik en porneia. Som Tiend Weche.
^ E dho Grik en aselgeia. Som Tiend Weche.
