Ne Jo-Rumi 11:1-36
11 Kuom mano, apenjo ni, be Nyasaye ne otamore joge?+ Ooyo ngang’! Nimar an bende an Ja-Israel, koth Ibrahim, moa e dhood Benjamin.
2 Nyasaye ok ne otamore joge ma nokwongo ng’eyo.+ Donge ung’eyo gima Ndiko wacho e wi Elija sa ma nosayo Nyasaye kodonjo ne Jo-Israel?
3 “Jehova,* gisenego jonabini, gisemuko kendo magi mag misengni, to an kenda e ma adong’, sani koro gidwaro nega an bende.”+
4 Kata kamano, Nyasaye ne odwoke nang’o? “Pod an gi ji 7,000, ma pok ogoyo chonggi piny ne Baal.”+
5 Omiyo, e ndalogi bende nitie jo manok modong’+ ma oseyier nikech ng’wono mogundho mar Nyasaye.
6 To ka noyiergi nikech ng’wono mogundho,+ kare koro ok en kokalo kuom gik ma ng’ato timo;+ nono to ng’wono mogundho mar Nyasaye dikoro ok en ng’wono mogundho.
7 Kare wawach ang’o? Israel pok oyudo gima gimanyo gi kinda ahinya, to jo moyier oseyude.+ Kata kamano, pach jomamokogo ne odinore,+
8 mana kaka ondik niya: “Nyasaye osemiyogi nindo matut,*+ bende osemiyogi wenge ma ok nen kod it ma ok winj nyaka chil kawuono.”+
9 Bende, Daudi nowacho kama: “Mad mesa mochan e nyimgi lokre obadho, gi otegu, kod gima chwanyogi, kendo kaka gima chulonegi kuor.
10 Mad mudho oim wengegi mondo kik ginen, kendo tokgi osik kodolore.”+
11 Omiyo, apenjo ni, be ne gichwanyore mi gipodho piny chutho? Ooyo ngang’! Kata kamano, chwanyruok margi nomiyo jo ma oa e ogendni mamoko oyudo warruok, mondo eka gibed gi nyiego.+
12 Ka koro chwanyruokgi nokelo gueth mogundho ne piny, kendo rem margi nokelo gueth mogundho ne jo ma oa e ogendni mamoko,+ kare gueth nobed mogundho ma romo nade ka kwan-gi ochopo chuth!
13 Koro, awuoyo kodu un jo ma oa e ogendni mamoko. Bedo ni an jaote moor ir ogendni,+ amiyo tija duong’+
14 mondo ane ka be anyalo miyo jo ogandawa obed gi nyiego, mi ares moko kuomgi.
15 Nikech ka wito Jo-Yahudi oko+ miyo jomamoko duto manie piny thuolo mar bedo gi winjruok maber gi Nyasaye, to nade ka ochako orwakogi kendo, donge mano biro kelonegi ngima ka gia e tho?
16 E wi mano, ka bath mogo mosedwal mikawo kaka nyak mokwongo ler, mogo mosedwalno duto bende ler; to ka mise yath ler, bedene bende ler.
17 Kata kamano, ka nong’ad oko moko kuom bede yadh zeituni, to un ne ochomu e kind bedene modong’, kata obedo ni un bede yadh zeituni mar bungu, kendo koro un bende useyudo ber manie mise mar yadh zeitunino,
18 kik ucha bede moseng’ad okogo. To ka uchayogi,+ ng’euru ni ok uting’o mise mar yath, to mise e ma oting’ou.
19 To unyalo wacho niya: “Ne ong’ad oko bedego mondo eka ochomwa kargi.”+
20 Mano en adier! Ne ong’adgi oko nikech ne gionge yie,+ to un sani uchung’ nikech un-gi yie.+ Kik ubed gi sunga, to beduru maluor.
21 Ka Nyasaye nong’ado oko bede zeituni wuon, un bende ok obi weyou.
22 Kuom mano, paruru ng’wono mar Nyasaye+ kod kum mare. Kum nobi kuom jo ma ne olwar,+ to ng’wono mar Nyasaye nobi kuomu, tek mana ni usiko e ng’wonone; nono to un bende ibiro ng’adu oko.
23 To gin bende ka gilokore mi giweyo bedo jo ma onge yie, ibiro chomgi e yadh zeitunino,+ nimar Nyasaye nigi nyalo mar duokogi mi ochomgi e yadhno kendo.
24 Nimar ka Nyasaye nong’adou oko kuom yadh zeituni mar bungu, kae to ochomou e yadh zeituni mopidh, ma en gima pile ok jatimre, mano kaka biro bet mayot moloyo mondo oduok kendo ochom bede ma chon ne ni e yadh zeituni mopidhno!
25 Owetena, ok daher ni mondo ubed kukia wach maler moumni+ mondo kik ubed mariek e wang’u uwegi: Pach Jo-Israel moko osedinore nyakonchiel, kendo mano biro dhi nyime nyaka chok kwan duto mar jo moa e ogendni mamoko,
26 kendo e yo ma kamano ibiro res Israel duto.+ Mana kaka ondik niya: “Jawar nobi kowuok Sayun+ kendo nomi Jakobo owe timbe ma ok nyis luoro Nyasaye.
27 Kendo mano e singruok ma atimo kodgi,+ e kinde ma abiro goloe richo oa kuomgi.”+
28 En adier ni ne gidoko wasik Nyasaye nikech ne gitamore winjo wach maber, kendo mano nokelonu ber. To bedo ni Nyasaye noyiero moko kuomgi nikech singo ma nomiyo kweregi, koro gibedo osiepene.+
29 Nimar Nyasaye ok bi ywago ang’e nikech mich mage kendo nikech jo ma noluongo.
30 Nimar mana kaka chon ne ok uwinj Nyasaye+ to sani osekechu+ nikech Jo-Yahudi notamore winjo Nyasaye,+
31 e kaka bende Jo-Yahudigo pok owinjo Nyasaye mi mano osemiyo okechu, mondo eka gin bende koro okechgi.
32 Nimar Nyasaye ne omiyo ji duto obedo jo ma otamore luwo chik,+ eka mondo okechgi giduto.+
33 Yaye, mano kaka gueth mag Nyasaye ogundho, gi riekone, kendo ng’eyone tut miwuoro! To mano kaka buchene mong’ado fwenyo tek, kendo yorene tek nono chuth!
34 Nimar “en ng’ano moseng’eyo pach Jehova,* kata ma nyalo ng’adone rieko?”+
35 Kata, “be nitie ng’at mosemiye gimoro, ma dwarore ni oduokne?”+
36 Nikech gik moko duto oa kuome, kendo gintie kokalo kuome, kendo nikech en. Mad obed gi duong’ nyaka chieng’. Amin.
