Ne Jo-Rumi 3:1-31
3 To kare, Ja-Yahudi oloyo jomamoko gang’o, kata ere ber ma nyangu kelo?
2 Nitie ber mang’eny. Mokwongo, gin e ma ne omigi weche maler mag Nyasaye.+
3 Ang’o kare minyalo wach? Ka jomoko ne onge gi yie, be bedogi ma onge yie biro mono Nyasaye doko ja adiera?
4 Ooyo ngang’! To Nyasaye e ma mondo obed ja adiera,+ to dhano duto obed jomiriambo,+ mana kaka ondik niya: “Mondo oyud ni in ng’at makare e wecheni, kendo mondo ilo bura sa ma iyali.”+
5 Kata kamano, ka bedo jo ma ok kare miyo tim makare mar Nyasaye nenore ayanga, wanawach ang’o? Be Nyasaye timo gima ok kare sa ma onyiso mirimbe? (Awuoyo mana kaka dhano.)
6 Ooyo ngang’! Nimar ka en kamano to ere kaka Nyasaye ding’ad bura ne piny?+
7 To ka miriambo ma awacho osemiyo adiera mar Nyasaye onenore ayanga mondo oyudgo duong’, kare ang’o momiyo pod ing’adona bura kaka jaricho?
8 To ang’o momiyo ok wawach kaka jomoko ma riambo kuomwa wacho ni, “Watimuru gik maricho mondo eka gik mabeyo obi”? Bura mibiro ng’ad ne jogo en bura mowinjore kodgi.+
9 To kare wawach ang’o? Be waloyo jomoko? Ooyo ngang’! Nimar wasewacho ni Jo-Yahudi kaachiel gi Jo-Grik gin joricho;+
10 mana kaka ondik niya: “Onge ng’at moro amora makare, kata mana ng’at achiel;+
11 onge ng’at ma wach donjone; onge ng’at ma manyo Nyasaye.
12 Ji duto osebayo yo, giduto gisebedo jo ma nono; onge ng’at ma nyiso ng’wono, kata mana ng’at achiel.”+
13 “Dhogi chalo gi liel ma dhoge ni nono; giwuondo awuonda ji.”+ “Dhogi nigi sum mar thuol.”+
14 “Dhogi opong’ gi kuong’ kod sigu.”+
15 “Tiendegi reto mondo gichuer remo.”+
16 “Masira gi kethruok e mopong’o yoregi,
17 kendo pok ging’eyo yor kuwe.”+
18 “Ok giluoro Nyasaye kata matin.”+
19 Koro wang’eyo ni gik moko duto ma Chik wacho, owachogi kuom jo ma ni e bwo Chik, mondo eka dho ji duto oling’, kendo mondo piny duto obi ochung’ e kom-bura mar Nyasaye mondo okumgi.+
20 Omiyo, onge ng’at ma ibiro kwan ni en ng’at makare e nyime kuom luwo chik,+ nimar chik miyo wang’eyo richo.+
21 To koro tim makare mar Nyasaye osefwenyore+ mana kaka Chik kod weche Jonabi osenyiso,+ ok kokalo kuom rito chik,
22 to kokalo kuom yie kuom Yesu Kristo, tim makare mar Nyasaye chopo ne ji duto ma nigi yie. Ji duto chalre.+
23 Nikech ji duto osetimo richo kendo girem kuom duong’ mar Nyasaye,+
24 kendo kuom ng’wonone mogundho+ ikwanogi ni gin jo makare, ma en kaka mich ma giyudo nono+ kokalo kuom nengo ma Kristo Yesu nochulo mondo owargi.+
25 Nyasaye ne ochiwe kaka misango mar pwodho+ jo ma keto yie kuom rembe.+ Notimo mano mondo onyisgo owuon timne makare, nimar Nyasaye ne nyiso horuok kuom weyo richo ma ji notimo e ndalo machon.
26 Mano ne en ni mondo onyisgo timne makare+ e ndalo ma sani, mondo eka en owuon obed makare kata mana e sa ma okwano ni ng’at ma keto yie kuom Yesu en ng’at makare.+
27 To kara sunga en mar ang’o? Oonge gi kare. En kokalo kuom chik mane? Be en kuom timo gik ma chik dwaro?+ Ooyo ngang’, to en kokalo kuom chik mar yie.
28 Nimar wang’eyo ni ikwano ng’ato kare kuom yie, to ok kuom luwo chik.+
29 Be Nyasaye en Nyasach Jo-Yahudi kende?+ Donge en Nyasach ogendni mamoko bende?+ Ee, en Nyasach jo ma oa e ogendni bende.+
30 Nikech Nyasaye en achiel,+ obiro kwano jo ma oter nyangu ni gin kare+ kuom yie, kendo obiro kwano jo ma ok oter nyangu ni gin kare+ kuom yiegi.
31 Be mano koro nyiso ni chik ok ti nikech yiewa? Ooyo ngang’! Kar mano, wasiro chik.+
