Ne Jo-Rumi 8:1-39
8 Kuom mano, bura ok lo jo ma ni e winjruok achiel gi Kristo Yesu.
2 Nimar chik mar roho ma chiwo ngima ne jo ma ni e winjruok achiel gi Kristo Yesu,+ oseketou thuolo kuom chik mar richo kod mar tho.
3 Gima Chik ne ok nyal timo+ nikech ringruok ma nyap,+ Nyasaye notimo gino ka nooro Wuode owuon+ ka en gi ringruok ma chal gi ringruok mar richo,+ mondo ogol richo kong’ado ne richo bura e ringruok,
4 mondo wan ma wawuotho ka roho chikowa+ to ok ringruok, watim gik makare ma Chik dwaro.+
5 Nimar jo ma ringruok chiko keto pachgi kuom weche mag ringruok,+ to jo ma roho tayo keto pachgi kuom weche mag roho.+
6 Nikech keto paro kuom ringruok kelo tho,+ to keto paro kuom roho kelo ngima kod kuwe;+
7 nimar keto paro kuom ringruok kelo sigu gi Nyasaye,+ nikech ringruok ok bolre e bwo chik Nyasaye, to bende, adier ok onyal.
8 Omiyo, jo ma ringruok chiko ok nyal moro Nyasaye.
9 Kata kamano, ka roho mar Nyasaye odak e iu gadier, ok un jo ma ringruok chiko,+ to un jo ma roho tayo. Kendo ng’at ma onge gi paro kaka mar Kristo, ok en ng’ate.
10 Kata obedo ni ringreu tho nikech richo, ka Kristo ni e winjruok achiel kodu,+ roho chiwo ngima nikech ikwanou kaka jo makare.
11 Ka koro roho mar jal ma nochiero Yesu ka ogole kuom jo motho odak e iu, jalno ma nochiero Kristo Yesu ka ne ogole kuom jo motho+ bende nomi ringreu ma tho obed mangima+ kokalo kuom rohone modak e iu.
12 Omiyo, owetena, wan jogowi, to ok jogop ringruok ni mondo wadag ka ringruok chikowa;+
13 nimar ka udak ka ringruok chikou, to adier ubiro tho; to ka unego timbe mag ringruok+ kokalo kuom roho, unubed mangima.+
14 Nikech ji duto ma roho mar Nyasaye tayo gin yawuot Nyasaye adier.+
15 Nimar ok nuyudo roho ma ketou wasumbni kubedo gi luoro kendo, to nuyudo roho ma miyo ubedo yawuot Nyasaye, kendo kokalo kuom rohono wakok niya: “Abba,* Wuora!”+
16 Rohono riwore kanyachiel kod chunywa e chiwo neno+ ni wan nyithind Nyasaye.+
17 Ka kare wan nyithind Nyasaye, wabedo bende jo ma biro yudo pok ma Nyasaye osingo—adier wanayud gik ma Nyasaye osingo, to wanayudgi kanyachiel+ gi Kristo—tek mana ni wachandore kanyachiel kode+ mondo wan bende wayud duong’ kode.+
18 Nikech aneno ni chandruoge ma sani ok gin gimoro kopimgi gi duong’ ma ibiro el kuomwa.+
19 Nimar chuech rito gi siso ahinya kinde ma duong’ mar yawuot Nyasaye biro fwenyoree.+
20 Nikech ne oket chuech obedo kayiem nono,+ ok kuom dwarone owuon, to kuom dwach jal ma ne okete obed kamano, eka geno obedie
21 mondo chuech bende obi ogony+ oa e tuech mar tow, eka giyud thuolo ma nigi duong’ mar bedo nyithind Nyasaye.
22 Nimar wang’eyo ni chuech duto siko ka chur kanyachiel, kendo gin e rem kanyachiel nyaka sani.
23 Ok mano kende, to bende wan ma waseyudo nyak mokwongo ma en roho, ee, wan wawegi wachur e iwa+ ka warito ahinya kinde ma Nyasaye biro gonyowa a e ringrewa mondo wabed yawuote+ kokalo kuom nengo ma Yesu nochulo mondo owarwa.
24 Nimar ne oreswa ka ne wayudo genoni; to gima ineno gi wang’ ok en geno, nikech ka ng’ato oseneno gimoro, be pod ogeno yudo gino?
25 To ka wageno yudo+ gima ok wane,+ wasiko ka warite gi siso kendo watimo kamano gi sinani.+
26 Kamano bende, roho konyo e nyawowa;+ nimar sa ma ok wang’eyo kaka wanyalo hulo chandruok ma wan-go e lamo, roho owuon sayonwa kochur gi weche ma ok wahulo gi dhowa.
27 To jalno ma nono chuny ji+ ong’eyo tiend gima rohono wacho, nimar roho sayo e lo jo maler kaluwore gi dwaro mar Nyasaye.
28 Wang’eyo ni Nyasaye miyo tijene duto riwore kanyachiel mondo ber obedie ne ji duto mohere, ma gin jo ma oseluongo kaluwore gi dwarone;+
29 nikech jo ma Nyasaye nokwongo yiego, ne oyierogi motelo mondo giluw ranyisi mar kit Wuode,+ eka Wuodeno obed kayo+ e kind owete mang’eny.+
30 E wi mano, jo ma Nyasaye ne oseyiero motelogo+ e jo ma noluongo;+ kendo jo ma noluongogo, e jogo bende ma nokwano kaka jo makare.+ Gikone, jo ma nokwano kaka jo makarego, e jogo bende ma nomiyo duong’.+
31 To kare wanawach ang’o e wi wechego? Ka Nyasaye ni korwa, en ng’a ma biro kedo kodwa?+
32 Ka koro nochiwo kata mana Wuode owuon ne wan waduto,+ donge en kanyachiel gi Wuode gibiro kechowa kuom miyowa gik mamoko duto bende?
33 En ng’a ma biro donjo ne jo ma Nyasaye oseyiero?+ Nyasaye e Jal ma kwanogi kaka jo makare.+
34 En ng’a ma biro wacho ni bura oloyogi? Kristo Yesu e jal ma ne otho, ee, en e jalno ma ne ochier, entiere e bat korachwich mar Nyasaye,+ kendo osayonwa.+
35 En ng’a ma biro pogowa gi hera mar Kristo?+ Be en masira, koso chandruok, koso sand, koso kech, koso duk, koso gima nyalo kelo hinyruok, koso ligangla?+
36 Mana kaka ondik niya: “Tho ochomowa odiechieng’ duto nikech in; osekwanwa ka rombe monego oyang’.”+
37 Mopogore gi mano, wakalo e bwo gigo duto ka waloyogi chuth+ nikech jal ma noherowano konyowa.
38 Nimar an gadier chuth ni kata mana tho, kata ngima, kata malaike, kata loje, kata gik ma nitie sani, kata gik ma biro, kata gik ma nigi teko,+
39 kata bor, kata tut, kata chuech moro amora, ok bi pogowa gi hera mar Nyasaye manie Kristo Yesu Ruodhwa.
Weche Moler Piny
^ En dho Hibrania kata dho Aram ma tiende en “A Wuora.”
