Ne Jo-Rumi 9:1-33
9 Awacho adier kuom Kristo; ok ariambi, nimar nyalo ma chunya nigo mar pogo ber gi rach riwore koda e chiwo neno kuom roho maler,
2 ni an-gi kuyo maduong’ kod lit ma ok rum e chunya.
3 Nimar dine ahero ni mondo an e ma abed kaka ng’at mokuong’ ma opog gi Kristo e lo owetena ma gin wedena kuom ringruok,
4 kendo ma kuom adier gin Jo-Israel. Gin e ma ne Nyasaye omiyogi gibedo nyithinde,+ kendo nomiyogi duong’, gi singruoge,+ gi Chik,+ gi thuolo mar tiyone,+ kod gik ma ne osingo.+
5 Gin e ma ne gia kuom kwerewa machon,+ kendo kuomgi e ma Kristo nowuokie e yor ringruok.+ Nyasaye manie wi gik moko duto oyud pak nyaka chieng’. Amin.
6 Kata kamano, ok en ni wach Nyasaye orem. Nikech ok ji duto mowuok kuom Israel gin Jo-Israel gadier.+
7 Bende, ok en nikech gin koth Ibrahim e ma miyo giduto gibedo nyithinde,+ to mana kaka nondiki niya: “Kothi biro a kuom Isaka.”+
8 Tiende ni, jo ma gin nyithind Ibrahim e ringruok ok e ma bed nyithind Nyasaye gadier,+ to jo ma gin nyithind Nyasaye kokalo kuom singo ma nochiwo,+ ikwanogi kaka koth Ibrahim.
9 Nikech singono ne wacho niya: “Anaduog iri e kinde ma kama, kendo Sara nobed gi nyathi ma wuoyi.”+
10 To ok mana e kindeno kende, to bende ka Rebeka nomako ich mar rude koa kuom ng’ato achiel, ma en Isaka kwarwa;+
11 Nyasaye nosechano kaka ne odhi yiero ng’ato, to ok ne odhi timo mano nikech timbe mag ng’atno. To en owuon ne odhi yiero jal ma nodwaro luongo. Omiyo, ka pok ne onyuol rudego, bende, ka pok ne gitimo gimoro amora maber kata marach,
12 ne owach ne Rebeka kama: “Maduong’ nobed misumba mar matin.”+
13 Mana kaka ondik niya: “Nahero Jakobo, to nasin gi Esau.”+
14 To kare wawach ang’o? Be mano nyiso ni Nyasaye osetimo gima ok kare? Ooyo ngang’!+
15 Nimar owacho ne Musa kama: “Ananyis ng’wono ne ng’at ma adwaro nyiso ng’wono, to anakech ng’at ma adwaro kecho.”+
16 Omiyo, yiero mar Nyasaye ok otenore kuom dwach ng’ato, kata tich matek ma ng’ato timo, to otenore kuom Nyasaye ma nyiso ng’wono.+
17 Nimar Ndiko wacho ne Farao niya: “Ng’e ni gimomiyo aseweyi nyaka sani en ni mondo anyis tekona kokalo kuomi, kendo mondo nyinga olandre e piny duto.”+
18 Kuom mano, onyiso ng’wono ne ng’at modwaro, to oweyo jomoko mondo gibed gi chuny matek.+
19 Nikech mano, ng’ato nyalo penja kama: “Ang’o momiyo pod Nyasaye yudo ketho kuom ji? Nimar en ng’a ma nigi nyalo mar geng’o dwache?”
20 Yaye dhano, in ng’at manade ma didwokri gi Nyasaye?+ Be gima ochue gi lowo nyalo penjo ng’at mochueye ni, “Ang’o momiyo ne ichueya e yo ma kama?”+
21 Koso ok ung’eyo ni jachuecho nigi teko e wi lowo motiyogo,+ kendo ni onyalo chueyo gimoro amora koa kuom lowo achielno, kochueyo moro ne tich ma nigi duong’, to machielo ne tich ma ok nigi duong’?
22 Ere rachne ka Nyasaye ne oyiero mar nyiso mirimbe kendo miyo tekone ong’ere, to nonano ahinya gi gik mochue gi lowo mowinjore mana yudo kethruok?
23 To ka notimo mano mondo duong’ne mogundho ong’ere kuom gik mochue gi lowo mowinjore yudo ng’wono,+ ma ne oseiko motelogo mondo omigi duong’,
24 tiende ni, wan ma noluongowa, ok mana koa kuom Jo-Yahudi kende, to bende koa kuom ogendni mamoko.+ Ere rach ma notimo?
25 En mana kaka owachonwa e Hosea niya: “Jo ma ok joga,+ abiro luongogi ni, ‘joga,’ kendo dhako ma ok oher abiro luonge ni, ‘moher’;+
26 bende, kama ne owachnegie ni ‘ok un joga,’ kanyo bende e ka ma ibiro luonggie ni ‘nyithind Nyasaye mangima.’”+
27 E wi mano, Isaya kok matek e wi Israel kama: “Kata obedo ni nyithind Israel ng’eny ka kuoyo manie nam, mana jo ma nok modong’ e ma ibiro resi.+
28 Nimar Jehova* biro ng’ado ne piny bura, kotimo kamano chuth kendo mapiyo.”+
29 Bende, mana kaka Isaya nokoro niya: “Ka dine Jehova* Nyasach oganda lweny* ok oweyonwa kodhi, dikoro wachal gi Sodom, kendo dikoro wachal gi Gomora.”+
30 To kare wawach ang’o? Ni kata obedo ni ji moa e ogendni mamoko ne ok luw tim makare,+ ne gibedo jo makare e wang’ Nyasaye nikech yie;+
31 to kata obedo ni Israel ne luwo tim makare mar chik, ne ok gichopo gima chikno ne dwaro.
32 Nikech ang’o? En nikech ne giluwe, ok kuom yie, to mana kuom tim. Omiyo, ne gichwanyore e “kidi ma chwanyo ji”;+
33 mana kaka ondik niya: “Neuru! Aketo e Sayun kidi+ ma chwanyo ji kod lwanda maduong’ ma miyo ji chwanyore, to ng’atno ma keto yie kuome, ok obi ywago ang’e.”+
Weche Moler Piny
^ Som Apendiks A5.
^ Som Apendiks A5.
^ Mani ochung’ ne ogendni mag lweny mag polo.
