Injili mar Johana 9:1-41
9 Ka noyudo okalo, noneno ng’at moro ma ne onyuol muofu.
2 Kendo jopuonjrene nopenje niya: “Rabi,+ en ng’a ma notimo richo momiyo ne onyuol ng’atni muofu? En e ma notimo richo koso jonyuolne?”
3 Yesu nodwokogi kama: “Ng’atni ne ok otimo richo, kata jonyuolne, to en ni mondo tije Nyasaye onenre ayanga kuom ng’atni.+
4 Nyaka watim tije Ng’at ma ne oora ka piny pod odiechieng’;+ otieno biro ma onge ng’at ma nyalo tiyo.
5 Ka pod an e piny, an e ler mar piny.”+
6 Bang’ ka nosewacho wechego, nong’ulo olaw piny mi onyuasogo lowo, kae to nomieno lowono e wang’ ng’atno+
7 mowachone niya: “Dhiyo mondo ilwok wang’i e yawo mar Siloam” (ma iloko ni, “Ma Oor”). Mi nodhi molwoko wang’e kendo noduogo koneno.+
8 Eka jo alworano kod jo ma chon ne nene kokuecho nopenjore niya: “Donge mani e ng’at ma ne jabedo piny ka kuechocha, koso?”
9 Moko ne wacho kama: “Mani e en.” Moko to ne wacho niya: “Ooyo ngang’, to ochal kode.” Ng’atno to ne wacho kama: “An e en.”
10 Omiyo, ne gipenje niya: “Kare, ere kaka wang’i oyawore?”
11 Nodwokogi kama: “Ng’at miluongo ni Yesu e ma ne onyuaso lowo mi omieno e wengena mowachona ni, ‘Dhi Siloam ilwok wang’i.’+ Omiyo, ne adhi mi alwoko mi aneno.”
12 Ne gipenje kama: “Ng’atno ni kanye?” Nodwokogi niya: “Ok ang’eyo.”
13 Ne gitero ng’at ma ne en muofuno ir Jo-Farisai.
14 Chieng’ Sabato+ e ma Yesu ne onyuasoe lowo mi oyawo wenge ng’atno.+
15 Omiyo, Jo-Farisai bende nopenjo ng’atno mondo onyisgi kaka wang’e noyawore. Nodwokogi kama: “Jalo nomieno lowo e wengena, kae to nalwoko mi achako neno.”
16 Eka moko kuom Jo-Farisai nowacho niya: “Ma ok en ng’at moa kuom Nyasaye, nikech ok orit chik Sabato.”+ Jomoko ne penjo niya: “Be jaricho nyalo timo honni kaka magi?”+ Kuom mano, ne nitie ywaruok e kindgi.+
17 Omiyo, ne gipenjo ng’atno kendo niya: “Nikech in e ma oseyawo wang’i, ang’o ma inyalo wacho kuome?” Ng’atno nodwoko kama: “En janabi.”
18 Jo-Yahudi ne ok oyie ni ng’atno ne en-ga muofu to bang’e ne ochako neno. Omiyo, ne giluongo jonyuolne.
19 Eka ne gipenjogi kama: “Be ma wuodu, ma uwacho ni ne onyuol muofu? Obet nade ni sani oneno?”
20 Jonyuolne nodwoko niya: “Wang’eyo ni en wuodwa kendo ne onyuole muofu.
21 To kaka wang’e oyawore to ok wang’eyo; kata ng’at ma noyawo wang’e ok wang’eyo. Penjeuru. En ng’at maduong’. Nyaka owuo mana e loye owuon.”
22 Jonyuolne nowacho kamano nimar ne giluoro Jo-Yahudi,+ nikech noyudo Jo-Yahudi osewinjore ni ng’at moyie ni Yesu en Kristo, ibiro riemb e sunagogi.+
23 Mano e momiyo jonyuolne nodwoko niya: “En ng’at maduong’. Penjeuru.”
24 Kendo ne giluongo ng’at ma chon ne en muofuno mi giwachone niya: “Mi Nyasaye duong’; wang’eyo ni ng’atno en jaricho.”
25 To en nodwoko kama: “Kata ka en jaricho ok ang’eyo. Gima ang’eyo en ni, ne an muofu to sani aneno.”
26 Eka ne gipenje niya: “Ang’o ma ne otimoni? Ne oyawo wengeni nade?”
27 Nodwokogi kama: “Donge asewachonu, to pod ok uwinj? Ang’o momiyo udwaro winjo wachni kendo? Koso un bende udwaro bedo jolupne?”
28 Nikech mano, ne gijare niya: “In japuonjre ng’atno, to wan, wan jopuonjre Musa.
29 Wang’eyo ni Nyasaye osewuoyo gi Musa; to ng’atno, ok wang’eyo kama oaye.”
30 Nodwokogi kama: “Kuom adier, en gima iwuoro ahinya ni ok ung’eyo ka ma oaye, to en e ma noyawo wengena.
31 Wang’eyo ni Nyasaye ok winj joricho.+ Kata kamano, ng’at moluoro Nyasaye kendo timo dwache, owinjo.+
32 Chakre nene, pok nowinjie ni ng’ato oyawo wenge ng’at ma nonyuol muofu.
33 Ka dine bed ni ng’atno ok oa kuom Nyasaye, onge gima dotimo.”+
34 Gin ne gidwoke kama: “Ne onyuoli e richo, ere kaka diketri ni ipuonjowa?” Mi ne giriembe oko!+
35 Yesu nowinjo ni ne giriembe, to bang’ yude, nopenje niya: “Be iketo yie kuom Wuod dhano?”
36 Ng’atno nodwoko kama: “To ruoth, jalo en ng’a mondo aket yie kuome?”
37 Yesu nokone niya: “In isenene kendo kuom adier jal ma wuoyo kodini e ng’atno.”
38 Nowacho kama: “Ruoth, ayie kuome.” Mi ne okulorene.
39 Eka Yesu nowacho niya: “Ne abiro mondo Nyasaye ong’ad ne piny bura, mondo jo ma ok nen onen,+ to jo ma neno obed muofni.”+
40 Jo-Farisai ma ne ni kode nowinjo wechego, mi ne gipenje niya: “Itemo wacho ni wan bende wan muofni, koso?”
41 Yesu nodwokogi kama: “Ka da bed ni un muofni, dikoro uonge richo. To koro un uwacho ni, ‘Waneno.’ Richou siko.”+
