Joshua 16:1-10
16 Piny ma ne opog ne nyikwa Josef+ gi ombulu+ ne chakore Aora Jordan machiegni gi Jeriko nyaka pige man yo wuok chieng’ mar Jeriko, ne okwako thim kowuok Jeriko nyaka piny motimo gode mar Bethel.+
2 Tong’ mar pinyno ne wuok Bethel man Luz nyaka e tong’ mar Jo-Arki man Ataroth.
3 Kowuok kanyo, nochomo yo podho chieng’ kolor nyaka tong’ mar Jo-Jaflet, modhi nyaka e tong’ mar Beth-horon+ ma Mwalo mochop Gezer,+ kae to ne ogik e Nam.
4 Joka Josef,+ tiende ni, Jo-Manase gi Jo-Efraim nokawo pinygi.+
5 Ma e piny ma ne omi Jo-Efraim kaluwore gi dhoutgi: Tong’ mar pinygi gi yo wuok chieng’ ne chakore Ataroth-adar+ nyaka Beth-horon ma Malo+
6 nyaka e Nam. Chakre Mikmethath+ man yo nyandwat, tong’no ne lworo gi yo wuok chieng’ nyaka Taanath-shiloh gi Janoa.
7 Tong’no ne lor kowuok Janoa nyaka Ataroth gi Naara, mochop Jeriko+ kendo nogik Aora Jordan.
8 Kowuok Tapua,+ tong’no nochomo yo podho chieng’ nyaka e Aora man Kana, kendo nogik e nam.+ Ma e piny ma ne opogne Jo-Efraim kaluwore gi dhoutgi.
9 Jo-Efraim ne nigi mier mamoko e piny Jo-Manase;+ ne opognegi miergo duto gi gwenge molworogi.
10 Kata kamano, Jo-Efraim ne ok oriembo Jo-Kanaan ma ne odakga Gezer.+ Omiyo, Jo-Kanaan odak e kind Jo-Efraim nyaka kawuononi+ kendo gisebedo wasumbni Jo-Efraim.+
