Joshua 17:1-18
17 Ombulu+ nolwar ne dhood Manase+ nikech ne en wuod Josef makayo.+ To nikech Makir,+ wuod Manase makayo kendo wuon Gilead ne en jalweny, ne omiye piny Gilead kod Bashan.+
2 Kae to ombulu nolwar ne yawuot Manase mamoko kaluwore gi anyuolagi. Ombulu nolwar ne yawuot Abiezer,+ yawuot Helek, yawuot Asriel, yawuot Shekem, yawuot Hefer, gi yawuot Shemida. Mago e joka Manase ma wuod Josef kaluwore gi anyuolagi.+
3 Kata kamano, Zelofehad+ ma wuod Hefer, ma wuod Gilead, ma wuod Makir, ma wuod Manase, ne ok onyuolo yawuoyi, ne onyuolo mana nyiri, kendo magi e nyingegi: Mala, Noa, Hogla, Milka, gi Tirza.
4 Nyirigo ne odhi e nyim Eleazar+ jadolo, Joshua wuod Nun, gi jotelo, ma giwacho niya: “Jehova e ma nochiko Musa mondo omiwa lowo e kind owetewa.”+ Omiyo, ne omigi lowo e kind owete wuon-gi mana kaka Jehova ne ochiko.+
5 Mopogore gi piny Gilead gi Bashan ma ne ni loka Aora Jordan, ne omed Jo-Manase pok apar mamoko mag lowo+
6 nikech ne opog ne nyige lowo kaachiel gi yawuote. Kendo piny Gilead ne opog ne yawuot Manase mamoko.
7 Tong’ mar Jo-Manase ne wuok Asher nyaka Mikmethath+ momanyore gi Shekem,+ kae to ne odhi yo milambo nyaka En-Tapua.
8 Tapua+ ne en piny Jo-Manase. Kata kamano, kama Tapua ne ogoyoe tong’ gi Jo-Manase ne en mar Jo-Efraim.
9 Tong’no ne lor nyaka Aora man Kana gi yo milambo. Ne nitie mier mag Jo-Efraim e kind mier mag Jo-Manase,+ to tong’ mar Jo-Manase ne ni yo nyandwat mar aora, kendo ne ogik e nam.+
10 Milambo mar pinyno ne en mar Jo-Efraim, to nyandwat ne en mar Jo-Manase, nam e ma ne en tong’ne.+ Tong’ ma nyandwat ne chopo Asher, to gi yo wuok chieng’ ne ochopo Isakar.
11 E piny Isakar gi mar Asher, ne omi Jo-Manase Beth-shean gi mier matindo molwore, Ibleam+ gi mier matindo molwore, Jo-Dor+ gi mier matindo molworogi, Jo-En-dor+ gi mier matindo molworogi, Jo-Taanak+ gi mier matindo molworogi, gi Jo-Megido gi mier matindo molworogi, kuonde adek motimo gode.
12 Mierego ne otamo Jo-Manase kawo; kendo Jo-Kanaan ne odhi nyime dak kuno.+
13 Ka ne Jo-Israel osebedo motegno, ne gichuno Jo-Kanaan mondo obed wasumbnigi,+ kata kamano, ne ok gigologi e pinyno chuth.+
14 Joka Josef nopenjo Joshua niya: “Ang’o momiyo imiyowa mana pok achiel mar lowo,+ to Jehova osebedo ka guedhowa nyaka chop sani kendo wang’eny?”+
15 Joshua nodwokogi niya: “Ka adier ung’eny, dhiuru ubet bunge mag Jo-Perizi+ gi Jo-Refaim+ mondo udagie, nimar kuonde motimo gode mag Efraim+ osebedonu madiny.”
16 Joka Josef nodwoke niya: “Piny motimo gode ok oromowa, to Jo-Kanaan duto modak e pap, matiende ni modak Beth-shean+ gi mier matindo molwore gi modak e Paw Jezreel,+ nigi geche mag lweny mochuog ligengni e tiendegi.+
17 Omiyo, Joshua nowacho ne joka Josef, ma gin Jo-Efraim gi Jo-Manase niya: “Ung’eny kendo un jo ma roteke, omiyo ok ubi yudo mana pok achiel mar lowo.+
18 Piny motimo gode bende nobed maru.+ Kata obedo ni en bungu, ubiro bete kendo obiro bedo giko mar lopu. Nimar ubiro golo Jo-Kanaan e pinyno kata obedo ni gin jo ma roteke kendo gin gi geche mag lweny mochuog ligengni e tiendegi.”+
