Joshua 2:1-24
2 Joshua wuod Nun ne ooro ji ariyo ling’ ling’ ka gin Shitim+ mondo gidhi ginon piny. Nonyisogi kama: “Dhiuru unon piny, to ka ma onego unon moloyo en piny Jeriko.” Omiyo, jogo nodhi mochopo e od ochot moro miluongo ni Rahab,+ mi gibet kanyo.
2 Ne onyis ruodh Jeriko niya: “Ne! Chwo moko ma Jo-Israel obiro kawuono godhiambo mondo ginon pinywa.”
3 Bang’ winjo mano, ruodh Jeriko nooro wach ne Rahab kowacho niya: “Gol jo ma ne obiro e odi kae, nimar pinywa e ma gibiro nono.”
4 Kata kamano, dhakono nopando chwo ariyogo. Bang’ mano, nodwoko jogo niya: “En adier ni chwo ariyo ne obiro e oda kae, en mana ni ok ang’eyo ka ma ne giaye.
5 Ne giwuok kar sa ma iloroe rangach ka piny yuso. En mana ni ok ang’eyo ka ma gidhiye. Kata kamano, ka ulawogi mapiyo piyo, ubiro jukogi.”
6 (En to ne opandogi e tworo ma ne nie tado.)
7 Omiyo, jo ma ne ruoth oorogo ne olawo chwo ariyogo ka gichomo ka ma iyorogo Aora Jordan.+ To bang’ ka ne gisewuok, ne olor rangach.
8 Dhakono ne odhi irgi e tado ka pok gichako nindo
9 mowachonegi niya: “Ang’eyo ni Jehova biro miyou pinyni.+ Kibaji osegoyowa,+ kendo luoro maduong’* osemako jopinywa duto nikech un,+
10 nimar wasewinjo kaka Jehova noduononu pi Nam Makwar ka ne ua e piny Misri,+ kendo wasewinjo gima ne utimo ne ruodhi ariyo mag Jo-Amor, miluongo ni Sihon+ gi Og,+ ma ne unego loka Aora Jordan.
11 Ka ne wawinjo mago duto, chunywa ne oa kendo tekowa ne orumo nikech un. Adier, Jehova Nyasachu en Nyasach polo gi piny.+
12 Koro kuong’renauru gi nying Jehova ni ubiro nyisa ng’wono an kaachiel gi od wuora mana kaka an bende asenyisou ng’wono. Kendo miyauru ranyisi ma nyiso ni ubiro timo kamano.
13 Akwayou ni ures ngima wuonwa gi minwa, kod owetena gi nyiminena, kaachiel gi joodgi duto.”+
14 Eka jogo nonyise niya: “Owinjore wan e ma watho kar mondo un e ma utho! Ka ok ifulowa, wabiro nyisi ng’wono chieng’ ma Jehova nomiwae pinyni.”
15 Bang’ mano, ne olorogi piny gi tol ma ne otueyo e dirisane, nikech ode ne omakore gi ohinga mar dalano.+
16 Kae to nowachonegi kama: “Dhiuru e gode mondo upond kuro kuom ndalo adek, to bang’e ka jo ma lawou oseduogo eka udhi nyime gi wuoth.”
17 Jogo nowachone niya: “Wan wabiro timo kaka wasesingoreni, kendo ok wabi bedo gi buch remo,+
18 to mana ka itueyo tol makwar e dirisa ma wadwa lorgoni chieng’ ma wabiro tieko pinyu. Chokreuru gi wuonu, gi minu, gi nyithindu, kaachiel gi wede wuonu te e odni.+
19 To ka ng’ato ang’ata kuomu owuok e odni modhi oko, rembe nobed e wiye owuon, wan to ok wabi bedo gi buch remo. To ka gimoro otimo ng’ato ang’ata mosiko kodi e odni, rembe nobed e wiwa.
20 To ka ifulowa,+ kuong’ni ok bi makowa, kendo ok wabi bedo gi buch remo.”
21 Nodwokogi niya: “Mad timre mana kaka usewachono.”
Kamano, ne oweyogi mondo gidhi. Bang’e, ne otueyo tol makwarno e dirisa.
22 Omiyo, ne giwuok ma gidhi e gode kendo ne gibedo kuro kuom ndalo adek nyaka jo ma ne lawogi odok. Jo ma ne lawogigo ne omanyogi e wang’ yore duto, to ne ok giyudogi.
23 Chwo ariyogo ne oridore mong’ado aora mi gidhi ir Joshua wuod Nun, kendo ne giwachone gik moko duto ma ne otimorenegi.
24 Eka ne giwacho ne Joshua niya: “Jehova osemiyowa pinyno duto.+ Kuom adier, luoro osegoyo jogo duto ma tekogi orumo nikech wan.”+
Weche Moler Piny
^ Kata, “kihondko.”
