Joshua 23:1-16
23 Ndalo mathoth bang’ ka Jehova nosemiyo Jo-Israel kuwe+ kuom resogi e lwet wasigu ma ne olworogi, kendo Joshua koro ne en jaduong’ moti ahinya,+
2 Joshua noluongo Jo-Israel duto,+ gi jodonggi, gi jong’ad bura, kaachiel gi jotendgi+ mowachonegi niya: “Asebedo jaduong’ kendo koro ati ahinya,
3 to useneno gi wang’u gik moko duto ma Jehova Nyasachu ne otimo ne ogendni duto e lou, nikech Jehova Nyasachu e ma ne kedonu.+
4 Ne ariembo ogendni+ ma ne odak yo podho chieng’ chakre Aora Jordan nyaka Nam Maduong’* mi apogonugo+ ka atiyo gi ombulu.+ Nitie jo ma pod odak kanyo, kata kamano pinyno to en maru.
5 Jehova Nyasachu e ma ne oriembonugi+ ma gidhi mabor kodu, kendo nukawo pinygi mana kaka Jehova Nyasachu nosingonu.+
6 “Koro nyaka ubed gi chir mar luwo kendo timo duto mondik e bug Chik+ Musa ma ok ubaro korachwich kata koracham.+
7 Kendo kik uriwru ngang’ gi ogendni+ modong’ e kindu. Kik uluong kata mana nyinge nyisechegi,+ kendo kik ukuong’ru gi nyinge nyisechegi. Kik ulamgi kata kulorunegi.+
8 To makreuru motegno gi Jehova Nyasachu+ mana kaka usetimo nyaka kawuononi.
9 Jehova biro riembonu ogendni madongo kendo ma roteke,+ nimar nyaka chop sani onge kata ng’ato achiel mosekedo kodu moloyou.+
10 Ng’at achiel kende kuomu biro riembo ji aluf achiel,+ nikech Jehova Nyasachu e ma kedonu+ mana kaka nosesingonu.+
11 Omiyo, heruru Jehova Nyasachu+ mondo ubed motang’ kinde duto.+
12 “To ka ulokoru ma umako osiep gi ogendni modong’ e kindu,+ kendo ukendoru kodgi+ mi uloso wat kodgi,
13 ng’euru ni Jehova Nyasachu ok bi dhi nyime riembonu ogendnigo.+ Ginibednu kaka obadho, kendo kaka del michwadogo ng’eu,+ kendo kaka kuthe ma chuoyo wengeu nyaka urum e piny maber ma Jehova Nyasachu osemiyou.
14 “Neuru! Koro achiegni tho, kendo ung’eyo malong’o gi chunyu duto kod ngimau duto ni onge singo kata achiel kuom singo mabeyo duto ma Jehova Nyasachu ne osingonu ma pok otimore. Duto osetimore ka uneno gi wang’u. Kendo onge kata achiel morem.+
15 To mana kaka singo mabeyo duto ma Jehova Nyasachu nosingo ne otimorenu,+ e kaka Jehova nokelnu masiche duto ma ne owacho ni obiro kelo mondo otieku e piny maber ma Jehova Nyasachu osemiyouni.+
16 Ka uketho singruok ma Jehova Nyasachu ne otimo kodu, mi utiyo ne nyiseche mamoko kendo ukulorunegi, mirimb Jehova biro o kuomu+ mi ulal mapiyo nono e piny maber ma osemiyouni.”+
Weche Moler Piny
^ Tiende ni, Mediterania.
