Joshua 3:1-17
-
Jo-Israel ng’ado Jordan (1-17)
3 Joshua nochiewo gokinyi, kendo en kaachiel gi Jo-Israel duto ne giwuok Shitim+ ma gichopo Aora Jordan. Ne ginindo kuno ka pok ging’ado aora.
2 Bang’ ndalo adek, jotelo+ nowuotho e kambi duto
3 ka gichiko ji niya: “Ka uneno ka jodolo ma Jo-Lawi+ ting’o sandug singruok mar Jehova Nyasachu, chakuru wuoth mondo uluw sandugno.
4 Kata kamano, neuru ni bor manie kindu gi sandugno en bede 2,000.* Kik usud machiegni kode moloyo kanyo. Timuru kamano mondo eka ung’e yo ma onego uluw, nimar en yo ma pok nuluwo nyaka nene.”
5 Bang’ mano, Joshua nowacho ne oganda niya: “Pwodhreuru+ nimar kiny Jehova biro timonu honni malich miwuoro.”+
6 Eka Joshua nowacho ne jodolo niya: “Kawuru sandug singruok+ mondo utel ne oganda.” Omiyo, ne gikawo sandug singruok ma giwuok motelonegi.
7 Bang’e, Jehova nowacho ne Joshua niya: “Chakre kawuono, abiro miyi duong’ e nyim Jo-Israel duto+ mondo ging’e ni an kodi+ mana kaka ne an gi Musa.+
8 Chik jodolo moting’o sandug singruok niya: “Ka uchopo e dho Aora Jordan, to chung’uru.”+
9 Mi Joshua nowacho ne Jo-Israel niya: “Biuru mondo uwinj weche mowuok kuom Jehova Nyasachu.”
10 Kae to nomedo wacho niya: “Ma e gima biro nyiso ni un gi Nyasaye mangima e kindu,+ kendo ni obiro riembonu Jo-Kanaan, Jo-Hiti, Jo-Hivi, Jo-Perizi, Jo-Girgash, Jo-Amor, gi Jo-Jebus.+
11 Ne! Sandug singruok mar Ruoth mar piny ngima otelo mondo okwongnu donjo e Aora Jordan.
12 Koro yieruru chwo 12 kowuok e dhout Israel, uyier ng’ato achiel kuom dhoot ka dhoot.+
13 To sa ma tiend jodolo moting’o Sandug Singruok mar Jehova, ma en Ruodh piny mangima onyono anyona pi Aora Jordan ni i, pi Jordan ma wuok malo nowe mol ma biwre kamoro achiel ka ohinga.”+
14 Omiyo, ka ne ji owuok ka ma ne gigoyoe kambi mondo ging’ad Aora Jordan, jodolo ma ne oting’o sandug singruok+ notelo nyimgi.
15 Ka ne joting’ Sandug Singruok ochopo Jordan kendo jodolo ma ne oting’o Sandugno onyono anyona pi Jordan ni i, (nimar Aora Jordan pong’ga+ kinde duto mag keyo),
16 pi nochung’ gi yo ka malo mobiwore ka ohinga gi ka ma bor ahinya miluongo ni Adam man machiegni gi Zarethan. To koni, pi ma ne mol kochomo Nam Araba ma bende iluongo ni Nam Chumbi ne oduono. Pi nochung’ mi Jo-Israel nong’ado aorano gi ka ma omanyore gi Jeriko.
17 Jodolo ma ne oting’o sandug singruok mar Jehova nodhi nyime chung’ e dier Aora Jordan+ nyaka Jo-Israel duto ne otieko ng’ado aora ma ne oduonono.+
Weche Moler Piny
^ Mita ma dirom 890 (fut 2,920). Som Apendiks B14.
