Joshua 5:1-15
5 Ka ne ruodhi duto mag Jo-Amor+ ma ne ni yo podho chieng’ mar Aora Jordan kaachiel gi ruodhi duto mag Jo-Kanaan+ ma ne odak but nam owinjo kaka Jehova ne oduono ne Jo-Israel Aora Jordan ma ging’ado aorano, luoro nomakogi+ ma tekogi orumo nikech Jo-Israel.+
2 Eka Jehova nowacho ne Joshua niya: “Los pelni mag kite mondo itergo Jo-Israel nyangu+ kendo mar ariyo.”
3 Omiyo, Joshua noloso pelni mag kite moterogo Jo-Israel nyangu ka gin Gibeath-haaraloth.+
4 Gimomiyo Joshua noterogi nyangu en nikech chwo duto ma ne owuok Misri, tiende ni tieng’ mar jolweny duto, ne osetho e thim.+
5 Ji duto ma ne owuok Misri ne oter nyangu. Kata kamano, nyithindo duto ma ne onyuol bang’e e thim ka Jo-Israel ne osewuok Misri to ne pok oter nyangu.
6 Jo-Israel nowuotho e thim kuom higni 40+ nyaka oganda duto ma ne otamore winjo dwond Jehova ne otho, tiende ni tieng’ duto mar jolweny ma ne owuok Misri.+ Jehova nokuong’ore ne tieng’no ni ok gibi neno piny+ mopong’ gi chak kod mor kich+ ma Jehova ne osingo ne kwerewa ni nomiwa.+
7 Kuom mano, Nyasaye ne oketo nyithindgi mondo okaw kargi.+ Joshua notero nyithindogo nyangu nikech ne ok otergi nyangu e kinde ma ne gin e wuoth.
8 Ka ne gisetieko tero ogandano duto nyangu, ne ok giwuok e kambi nyaka ne gichango.
9 Bang’ mano, Jehova nowacho ne Joshua niya: “Kawuono asegolonu wich-kuot mar Jo-Misri.” Mano e momiyo iluongo kanyo ni Gilgal+ nyaka kawuononi.
10 Jo-Israel nodhi nyime goyo kambi Gilgal, kendo e dweno, ne gitimo Pasaka tarik 14+ godhiambo e paw Jeriko.
11 Ka ne gisetieko timo Pasaka, kinyne ne gichako chamo chiemo ma pinyno onyago. Kendo chieng’no ne gichamo makate ma ok oketie thowi+ kod cham molodi.
12 Manna ne ogik chakre chieng’ ma ne Jo-Israel ochako chamoe chiemb pinyno. Jo-Israel ne ok ochako oneno manna kendo.+ E higano, ne gichako chamo chiemo ma ne nyak e piny Kanaan.+
13 Ka ne Joshua ni machiegni gi Jeriko, nopo koneno ng’ato+ kochung’ e nyime gi ligangla.+ Joshua nodhi mopenje niya: “In korwa, koso in kor wasikwa?”
14 To ng’atno nodwoko Joshua niya: “Ooyo ngang’. An ruodh oganda lweny mar Jehova.”+ Ka Joshua nowinjo kamano, ne opodho auma mowachone niya: “Ikelona wach mane, ruodha?”
15 Ruodh oganda lweny mar Jehova nowacho ne Joshua niya: “Lony wuocheni, nimar ka ma ichung’ieno en ka maler.” Gikanyono, Joshua nolonyo wuochene.+
