Joshua 9:1-27
9 Ruodhi duto ma ne odak e piny motimo gode, gi Shefela, gi dho wadh Nam Maduong’,*+ gi nyim Lebanon ma gin kuonde man yo podho chieng’ mar Aora Jordan+ ne owinjo wechego, tiende ni ruodhi mag Jo-Hiti, Jo-Amori, Jo-Kanaan, Jo-Perizi, Jo-Hivi, gi mag Jo-Jebus.+
2 To ka ne giwinjo wechego, ne giriwore kanyakla mondo giked gi Joshua kod Jo-Israel.+
3 Jo ma ne odak Gibeon+ bende ne owinjo gik ma Joshua ne otimo ne Jeriko+ kod Ai.+
4 Omiyo, ne ging’ado rieko mondo giting’ chiembgi e ogunde moti oti, kendo giting’ divai e chupni mag pien moseyiech kendo obaw obaw, mi giketogi e pundegi;
5 bende, ne girwako wuoch moseyiech kendo mobaw obaw, lepgi bende ne oti. Makate duto ma ne giting’o ne otwo kendo ne ng’injore ang’inja.
6 Eka ne gidhi ir Joshua e kambi ma ne ni Gilgal+ ma ginyise en kaachiel gi jodong Israel niya: “Wawuok e piny moro mabor ahinya. Wakwayi ni isingri kodwa ni kuwe biro bedo e kindwa kodu.”
7 Kata kamano, jodong Israel nonyiso Jo-Hivi*+ ni: “Dwang’e nade ka un mana jo ma odak machiegni kodwa? Ere kaka dwasingrenu kamano?”+
8 Ne gidwoko Joshua ni: “Waikore bedo jotichni.”
Joshua to nopenjogi niya: “Un ng’a gini, to uwuok kanye?”
9 Ne gidwoke ni: “Wawuok e piny mabor ahinya+ mana nikech nying Jehova Nyasachi, nimar wasewinjo humbe, kendo wasewinjo gik moko duto ma ne otimo e piny Misri,+
10 bende wasewinjo duto ma ne otimo ne ruodhi ariyo mag Jo-Amor ma ne ni loka Aora Jordan. Ruodhigo ne gin Sihon+ ruodh Heshbon, gi Og+ ruodh Bashan ma ne ni Ashtaroth.
11 Omiyo, jodongwa kaachiel gi jopinywa duto nonyisowa niya: ‘Kawuru chiemo moromou ne wuoth mondo udhi uromnegi. Nyisgiuru niya: “Waikore bedo jotiju;+ omiyo wakwayo ni usingrunwa ni kuwe biro bedo e kindwa kodu.”’+
12 Makate ma unenogi ne wating’o ka liet mondo wacham e yo chieng’ ma ne wawuok mondo wabi warom kodu. To koro uneno gi wang’u kaka gitwo kendo ging’injore ang’inja.+
13 Chupni mag pien-gi bende ne nyien ka ne waketoe divai, to koro giseyiech.+ Lepwa gi wuochwa bende oseti nikech wuoth ma rabora.”
14 Ka ne jodong Israel owinjo kamano, ne gikawo moko kuom chiemogo mondo ging’i. Kata kamano, ne ok gipenjo Jehova gima onego gitim.+
15 Omiyo, Joshua nosingorenegi ni kuwe nobed e kindgi+ kendo ni ok obi negogi. Jotelo mag Jo-Israel bende nokuong’ore ni gibiro rito singruogno.+
16 To ndalo adek bang’ ka ne gisetimo singruok kodgi, ne giwinjo ni kare jogo ne odak mana machiegni kodgi, ne giwuok mana e alworano.
17 Omiyo, Jo-Israel nowuok modhi e miech jogo e odiechieng’ mar adek. Mierego ne gin Gibeon,+ Kefira, Beeroth, gi Kiriath-jearim.+
18 Kata kamano, Jo-Israel ne ok omonjogi, nimar jotend oganda nosekuong’ore ne jogo e nyim Jehova+ Nyasach Israel. Omiyo, oganda ne ochako ng’ur ne jotelogo.
19 Ka ne jotelogo owinjo ka oganda ng’ur, ne ginyisogi niya: “Nikech ne wakuong’ore ne jogi gi nying Jehova Nyasach Israel, ok oyienwa hinyogi.
20 Koro ma e gima wabiro timo: Ok wabi negogi mondo Nyasaye kik ol kuomwa mirimbe, nimar wasekuong’orenegi.”+
21 Jotelogo nomedo wacho niya: “Ok wabi negogi, to wabiro ketogi gibed jo bar yien kendo josomb pi ne oganda duto.” Mano e gima jotelogo nosingo ne oganda.
22 Koro Joshua noluongogi mopenjogi niya: “Ang’o momiyo nuwuondowa kuwacho ni, ‘Wawuok e piny mabor ahinya,’ to kare un mana jo ma odak machiegni kodwa ka?+
23 Chakre kawuono, un jo ma okuong’,+ kendo kinde duto unubed wasumbni ma baro yien kendo sombo pi mitiyogo e od Nyasacha.”
24 Ne gidwoko Joshua niya: “Ne watimo kamano nikech nonyiswa ni Jehova Nyasachi nochiko Musa jatichne mondo omiu pinyni duto kendo utiek ji duto modak e iye.+ Omiyo, ne waluor ni ubiro negowa,+ kendo mano e momiyo ne watimo kamano.+
25 Koro wan e lweti. Tim kodwa gima ineno ni ber kendo ni kare.”
26 Mi notimonegi makare, kendo ne oresogi mi Jo-Israel ne ok onegogi.
27 Kata kamano, chieng’no Joshua noketogi mondo gibed jo bar yien kendo josomb pi ne oganda,+ kendo gitim kamano ne kendo mar misango mar Jehova kamoro amora ma Nyasaye ne dhi yiero mondo kendono obedie.+ Kendo mano e tijgi nyaka kawuononi.+
