Barua mar Juda 1:1-25
1 An Juda, misumba Yesu Kristo, kendo owadgi Jakobo.+ Andiko ne un jo moluongi,+ ma Nyasaye Wuoro ohero, kendo ma oserit ne Yesu Kristo:+
2 Ng’wono gi kuwe kod hera mondo omedrenu.
3 Un jo mahero, kata obedo ni ne atimo kinda ahinya mondo andiknu kuom wach warruok moriwowa kanyachiel,+ ne aneno ni ber mondo andiknu ka asayou, ni uked matek ne yie+ ma ne omi jo maler dichiel kendo mogik.
4 Gimomiyo atimo kamano en nikech nitie jomoko moseluchore mi gidonjo e kindu, kendo Ndiko noseyango chon ni ibiro ng’adnegi bura; gin jo ma ok oluoro Nyasaye, ma tiyo gi ng’wono mogundho mar Nyasachwa kaka gima girendorego mondo gitim timbe mag wang’-teko,*+ kendo ok gimakre gi Ruodhwa achiel kende, Yesu Kristo.+
5 Kata obedo ni ung’eyo malong’o wechegi duto, adwaro paronu ni nitiere oganda moro ma Jehova* noreso e piny Misri,+ to bang’e noketho jo ma ok nonyiso yie.+
6 Bende, malaike ma ok nomakore gi migawo ma ne gin-go chon, kendo ma nojwang’o kar dakgi mowinjore kodgi,+ oseketo e mudho mandiwa kendo otueyogi gi nyoroche mochwere ka girito bura mar odiechieng’ maduong’no.+
7 E yo ma kamano, Sodom gi Gomora kod mier ma nolworogi bende nodonjore chuth gi timbe madongo mag terruok,* kendo ne giluwo gombo mag ringruok mopogore gi ma ne ochuego dhano;+ nikech giyudo kum mar mach ma nyaka chieng’, oseketgi e nyimwa mondo gibednwa ranyisi ma miyowa siem.+
8 Kata kamano, jogi bende leko, gichido ringruok, gichayo joloch, kendo giwuoyo ka gichayo jo ma Nyasaye omiyo duong’.+
9 To ka Mikael,+ malaika maduong’+ ne yware gi Jachien e wi ringre Musa,+ ne ok ohedhore ng’ado ne Jachien bura kowuoyo kode e yor achaya,+ kar mano nowacho niya: “Jehova mondo okweri matek.”+
10 To jogi wuoyo e yor achaya kuom gik moko duto ma kuom adier ok ging’eyo.+ Kendo gichal mana kaka le ma ok ti gi paro, nimar gik moko duto ma jogi ong’eyo,+ ging’eyogi mana gi rieko monyuolgo dhano duto, to mago e gik ma gidhi nyime timo kendo gigo kethogi.
11 Yaye nobednegi malit nikech giseluwo yor Kain,+ kendo giserikni donjo e yo marach mar dwaro pok kaka Balam,+ kendo giseyudo kethruok nikech donjo e weche mag ng’anyo+ kaka Kora!+
12 Gin lwendni mopondo piny e bwo pi sa ma gichiemo kodu e nyasi magu,+ gin jokwath ma chiemo ka gionge luoro;+ gin boche polo ma ok kel koth, ma yamo tero koni gi koni;+ gin yien ma onge gi olemo e kinde ma yien duto nyagoe olemo, gisetho nyadiriyo,* jo mosepudh oko gi tiendegi;
13 gin apaka mager ma golo buoyo mar wich-kuotgi;+ gin sulwe ma onge yorgi, kendo mudho mandiwa oritogi nyaka chieng’.+
14 Ee, Enok ma en ng’at mar abiriyo koa kuom Adam,+ bende, nokoro wach kuomgi ka nowacho niya: “Neuru! Jehova* nobiro gi ogandane maler gana gi gana+
15 mondo ong’ad bura ne ji duto+ kendo kumo ji duto ma ok oluoro Nyasaye nikech timbegi maricho ma ne ok mi Nyasaye duong’, kendo nikech weche maricho ahinya ma jo ma ok oluoro Nyasaye nowacho kuome.”+
16 Jogi ohero ng’ur,+ gik ma gin-go ok romgi, giluwo gombogi giwegi,+ kendo dhogi opong’ gi pakruok, kendo giwuondo ji gi weche mamit mondo giyud gik ma gidwaro.+
17 To un jo ma ahero, paruru weche ma joote mag Ruodhwa Yesu Kristo nosewacho motelo,
18 kaka ne gijowachonu niya: “Jojar ji nobedie e kinde mag giko ka giluwo gombogi giwegi ma ok nyis luoro Nyasaye.”+
19 Mago e jo ma kelo pogruok,+ gin gi kido kaka mag le, gin jo ma roho mar Nyasaye ok ta.
20 To un jo ma ahero, gerreuru uwegi e yieu maler chuth, kendo uwuo gi Nyasaye e lamo ka roho maler tayou+
21 eka uritru e hera mar Nyasaye,+ sa ma urito Ruodhwa Yesu Kristo mondo okechu, ka un gi geno mar ngima ma nyaka chieng’.+
22 Bende, dhiuru nyime kecho+ jomoko ma nigi kiawa;+
23 resgiuru+ kugologi e mach. To udhi nyime kecho jomamoko, kutimo kamano kutang’, ka usin kata mana gi nanga moro amora ma ringruok osemieno.+
24 Koro kuom jal ma nigi nyalo mar ritou mondo kik uchwanyru kendo ma nyalo miyo uchung’ kuonge ketho moro amora+ e nyim duong’ne, gi mor maduong’,
25 ma en Nyasaye achiel kende ma Jawarwa kokalo kuom Yesu Kristo Ruodhwa, mad obed gi duong’ gi loch, gi nyalo, gi teko nyaka nene, sani, kendo nyaka chieng’. Amin.
Weche Moler Piny
^ E dho Grik en aselgeia. Som Tiend Weche.
^ Som Apendiks A5.
^ Som Tiend Weche.
^ Kata, “gisetho chuth.”
^ Som Apendiks A5.
