Injili mar Luka 15:1-32
15 Koro josol osuru duto kod joricho ne ochokore machiegni kode mondo giwinje.+
2 Jo-Farisai gi jondiko ne ng’ur ka wacho niya: “Ng’atni rwako joricho kendo ochiemo kodgi.”
3 Eka nogoyonegi ngero moro kama:
4 “En ng’a kuomu ma ka nigi rombe 100 to olalo achiel kuomgi, ok obi weyo 99 chien e thim, kae to odhi manyo achiel molalno nyaka oyude?+
5 To bang’ yude, okete e goke kendo obedo mamor.
6 Kochopo pacho, ochoko osiepene gi jo ma odak machiegni kode, kowachonegi niya: ‘Moruru koda, nimar aseyudo rombona ma nolal.’+
7 Awachonu ni, kamano bende e kaka mor mang’eny bedo e polo nikech jaricho achiel moloko chunye,+ moloyo jo ma kare 99 ma ok dwarre ni olok chunygi.
8 “Kata, ka dhako moro nigi drakma* apar to achiel olalne, donge obiro moko taya kendo yweyo ode ka omanye adimba nyaka oyude?
9 Kendo bang’ yude, oluongo osiepene* kod jo ma odak machiegni kode kowachonegi ni, ‘Moruru koda, nimar aseyudo drakma* ma nolalna.’
10 Kamano bende, awachonu ni, malaike mag Nyasaye bedo mamor kuom jaricho achiel moloko chunye.”+
11 Kae to nowacho niya: “Ng’at moro ne nigi yawuoyi ariyo.
12 To wuoyi matin nowacho ne wuon-gi ni, ‘Wuora, pogna mwandu monego obed maga.’ Omiyo, nopogo mwandune ne yawuote ariyogo.
13 Odiechienge manok bang’e, wuoyi matinno nochoko gige duto, mi nodhi e piny moro mabor, kendo kuro nokethoe mwandune kuom dak e ngima mar anjawo.
14 Ka nosetieko gik moko duto, kech maduong’ nosieko e pinyno mangima, kendo nochako chandore.
15 Eka nodhi nyaka ir achiel kuom jopinyno, mi jalo noore mondo odhi okwa anguche e pewene.+
16 Kendo wuoyino nogombo chamo opokla ma anguchego ne chamo, to onge ng’at ma ne omiye gimoro amora.
17 “Ka pache noduogo, nowacho kama, ‘Gin ji adi ma wuora ondiko tich kendo ma nigi chiemo mogundho, to an kech nega kae!
18 Abiro dok ir wuora mi awachne niya: “Wuora, asetimo richo ne polo kendo ne in bende.
19 Ok awinjora koro mondo oluonga ni wuodi. Keta abed achiel kuom jotichni.”’
20 Omiyo, noa malo modok ir wuon-gi. To ka pod ne en gi kama bor, wuon-gi nonene, mi ne okeche, kendo noringo mokwako wuodeno kendo nonyodhe gi mor.
21 Eka wuode nokone ni, ‘Wuora, asetimo richo ne polo kendo ne in bende.+ Ok awinjora koro mondo oluonga ni wuodi.’
22 To wuon mare nowacho ne wasumbnine kama, ‘Timuru piyo! keluru kandho maberie moloyo mondo urwakne kendo uket tere e lith lwete kendo urwakne wuoche e tiende.
23 Bende, keluru nyaruath machwe mondo uyang’ kae to wachiemuru kendo wabed mamor
24 nimar wuodani nosetho to koro ongima kendo;+ nolal to koro oseyude.’ Omiyo, ne gibedo mamor.
25 “Koro wuode maduong’ ne ni oko e puodho, to sa ma noduogo mochopo machiegni gi ot, nowinjo koko mar thum gi miel.
26 Omiyo, noluongo achiel kuom jotich, mi nopenje gima ne timore.
27 Nodwoke kama, ‘Owadu oduogo kendo wuonu oseyang’o nyaruath machwe nimar oduogo ka ongima maber.’
28 To mirima nomake kendo ne ok odwar donjo e ot. Eka wuon-gi nowuok oko mochako saye.
29 En nodwoko wuon-gi kama, ‘Kuom higni mang’enygi asebedo ka atiyoni mana ka misumba, kendo pok akethoga chikni kata mana dichiel, to e ma pok imiyaga nyadiel kata mana dichiel mondo amorgo gi osiepena.
30 To mapiyo bang’ ka wuodini ochopo, jal moseketho mwanduni gi mon ma chodo, iyang’one nyaruath machwe.’
31 Eka nokone ni, ‘Wuoda, kinde duto isebedo koda, kendo giga duto gin meki.
32 To nyaka ne wabed mamor kendo moil nikech owadu nosetho to koro ongima; nolal to koro oseyude.’”
