Injili mar Mariko 10:1-52
10 Noa kanyo modhi e gwenge mokiewo gi Judea man loka Jordan, mi oganda nochokore kendo ka ma ne entie. To kaka nojatimo, nopuonjogi kendo.+
2 Kae to Jo-Farisai nobiro temo Yesu mi ne gipenje ka be chik oyie mondo ng’ato oketh kend gi chiege.+
3 Nodwokogi kama: “Musa nochikou nade?”
4 Ne giwacho niya: “Musa noyie ni ng’ato nyalo ndiko barua* mar riembo chiege kendo ketho kend kode.”+
5 To Yesu nodwokogi niya: “Nondikonu chikno+ nikech chunyu matek.+
6 Kata kamano, kar chakruok mar chuech, ‘Nochueyogi dichwo gi dhako.+
7 Nikech mano, dichwo nowe wuon-gi gi min-gi,+
8 kendo ji ariyogo nobed ringruok achiel.’+ Omiyo, koro ok gin ji ariyo kendo, to gin ringruok achiel.
9 Kuom mano, gima Nyasaye oseriwo, dhano moro amora kik opogi.”+
10 Ka ne gin e ot kendo, jopuonjre nopenje wachno.
11 Nowachonegi kama: “Ng’at ma ketho kend gi chiege, mi okendo machielo, ochodo,+ kendo otimone richo,
12 to ka po ni bang’ ketho kend gi chwore, dhako otedo ne ng’at machielo, dhakono chodo.”+
13 Ji koro nokelone nyithindo matindo mondo omulgi, to jopuonjrene nogeng’ogi.+
14 Ka Yesu noneno mano, nobedo gi mirima mi nokonegi niya: “Weuru nyithindo matindogi obi ira; kik utem geng’ogi nimar Pinyruodh Nyasaye en mar jo ma kamago.+
15 Adier awachonu ni, ng’at ma ok rwak Pinyruodh Nyasaye kaka nyathi matin, ok nodonjie ngang’.”+
16 Noting’o nyithindogo e bedene, mochako guedhogi koketo lwetene kuomgi.+
17 Sa ma nowuok, ng’at moro noringo ire mogoyo chonge piny e nyime kendo penje niya: “Japuonj Maber, en ang’o ma nyaka atim eka ayud ngima mochwere?”+
18 Yesu nodwoke kama: “Ang’o momiyo iluonga ni ng’at maber? Onge ng’at maber mak mana ng’at achiel, ma en Nyasaye.+
19 Ing’eyo chike: ‘Kik ineki,+ kik ichodi,+ kik ikwel,+ kik ichiw neno mar miriambo,+ kik iti gi wuond e mayo jowadu,+ luor wuoru gi meru.’”+
20 Ng’atno nowachone kama: “Japuonj, mago duto aserito chakre tinna.”
21 Yesu nong’iye mi nohere mowachone ni, “Gimoro achiel e ma oremi: Dhi ius gik ma in-go kendo imigi jo ma odhier eka inibed gi mwandu e polo; kae to ibi ibed jalupna.”+
22 To nowinjo lit nikech dwokono, mi nodhi ka okuyo nikech ne en gi mwandu mang’eny.+
23 Bang’ ng’iyo koni gi koni, Yesu nowacho ne jopuonjrene niya: “Mano kaka donjo e Pinyruodh Nyasaye nobed matek ne jo ma nigi pesa!”+
24 To jopuonjrene nohum gi wechenego. Mi Yesu nokonegi kama: “Nyithinda, mano kaka donjo e Pinyruodh Nyasaye nobed matek!
25 Yot mondo ngamia okal e wang’ sandan moloyo jamwandu donjo e Pinyruodh Nyasaye.”+
26 To e ma pod ne gimedo wuoro ka giwachone* niya: “Ka en kamano, kare en ng’a minyalo resi?”+
27 Yesu nong’iyogi tir mokonegi kama: “Mano en gima ok nyalre ne dhano, to ok en kamano kuom Nyasaye, nimar gik moko duto nyalore kuom Nyasaye.”+
28 Petro nowachone niya: “Waseweyo gik moko duto mi waluwi.”+
29 Yesu nowachonegi kama: “Adier awachonu ni, onge ng’at moweyo ode, kata owetene, kata nyiminene, kata min-gi, kata wuon-gi, kata nyithinde, kata puothene, nikech an kendo nikech wach maber,+
30 ma ok bi yudo nyadi 100 momedore gie ndalogi—ute gi owete gi nyimine gi mine gi nyithindo kod puothe kaachiel gi sand+—kendo e ndalo ma biro,* ngima mochwere.
31 Ji mang’eny mokwongo nobed ma achien, to jo ma achien nobed mokwongo.”+
32 Koro ka ne gin e yo ka giidho gidhi Jerusalem, Yesu ne otelo e nyim jopuonjrene ma noyudo hum nono kendo jo ma ne luwogi nochako luor. Nokawo kendo ji Apar Gariyoka moterogi tenge, mi nowachonegi gik ma ne chiegni timorene niya:+
33 “Neuru! Waidho wadhi Jerusalem, kendo Wuod dhano ibiro chiw e lwet jotend-jodolo gi jondiko. Gining’adne buch tho kendo ginichiwe e lwet ogendni mamoko,
34 kendo jogo biro jare, gibiro ng’ulo olaw kuome, gibiro chwade, kendo gibiro nege, to bang’ ndalo adek obiro chier.”+
35 Jakobo gi Johana, ma gin yawuot Zebedi,+ nobiro ire mi giwachone kama: “Japuonj, dwaher kwayi mondo itimnwae gimoro.”+
36 Nopenjogi niya: “Ang’o ma udwaro ni atimnu?”
37 Ne gidwoke niya: “Yienwa wabi wabed kodi e pinyruodhi. Ng’at achiel e badi korachwich, to machielo e badi koracham.”+
38 To Yesu nowachonegi kama: “Ok ung’eyo gima ukwayo. Be unyalo madho okombe ma amadhoni, to be inyalo batisu gi batiso kaka ma ibatisagoni?”+
39 Ne gidwoke niya: “Wanyalo.” Eka Yesu nowachonegi niya: “Okombe ma amadhoni ubiro madho, kendo batiso ma ibatisagoni ibiro batisougo.+
40 Kata kamano, an ok e ma ayier jo ma bet e bada korachwich kata koracham, to nochiw kuondego ne jo ma oseiknegi.”
41 Ka jopuonjre apar mamokogo nowinjo wachno, mirima nomakogi gi Jakobo kod Johana.+
42 To Yesu noluongogi ire mowachonegi niya: “Ung’eyo ni joloch timore ruodhi e wi ji kendo gisando ji.+
43 Mano ok e kaka onego obed e kindu; to ng’at ma dwaro bedo maduong’ e kindu nyaka bed jatiju,+
44 kendo ng’at ma dwaro bedo mokwongo e kindu nyaka bed misumba jomamoko duto.
45 Nikech kata mana Wuod dhano nobiro, ok ni mondo ji otine, to mondo oti ne ji+ kendo mondo ochiw ngimane owar ji mang’eny.”+
46 Eka ne gidonjo Jeriko. To sa ma ne giwuok Jeriko ka en gi jopuonjrene kod oganda moro buora, Batimeo (wuod Timeo) ma ne en jakuecho ma muofu, nonwang’o obet e bath yo.+
47 Ka nowinjo ni mano ne en Yesu Ja-Nazareth, nokok niya: “Yesu, Wuod Daudi,+ kecha!”+
48 Ji mang’eny nokwere matek ni oling’, to en nomedo kok matek niya: “Wuod Daudi, kecha!”
49 Omiyo, Yesu ne ochung’ mowacho niya: “Luongeuru.” Mi ne giluongo muofuno ka giwachone niya: “Bed gi chir! Chung’; echa oluongi.”
50 Bang’ wito nangane ma oko, nochung’ piyo modhi ir Yesu.
51 Koro Yesu nopenje kama: “Ang’o midwaro ni atimni?” Muofuno nodwoke niya: “Raboni,* yaw wengena onen kendo.”
52 Mi Yesu nowachone kama: “Dhiyo. Yieni osechangi.”+ Eka gikanyono wengene noyawore,+ kendo noluwo Yesu.
Weche Moler Piny
^ Kata, “satifiket.”
^ Kata nyalo bedo, “ne giwuoyo e kindgi.”
^ Som Tiend Weche.
^ Tiende ni, “Japuonj.”
