Mika 4:1-13
4 E ndalo mag giko,Ibiro gur motegno got ma od Jehova nitiere,+Enobed malo moloyo gode duto,Ibiro ting’e malo moloyo gode duto,Kendo ji mang’eny nodhiye.+
2 Ogendni mang’eny biro wacho niya:
“Biuru, wadhi e god Jehova,E od Nyasach Jakobo.+
Obiro puonjowa yorene,Mi wanawuoth e yorene.”
Nimar chik* nowuog Sayun,Kendo wach Jehova nowuog Jerusalem.
3 Obiro ng’ado ne ji mang’eny bura,+Enorie weche mag ogendni ma roteke man mabor.
Ginithedh ligengnigi obed kwer,Kendo tongegi obed pand keyo.+
Oganda ok noting’ ligangla ne oganda machielo,Ok ginichak gipuonjre lweny kendo.+
4 Ng’ato ka ng’ato nobed* e tiend yadhe mar mzabibu kod mar ng’ope,+Onge ng’at ma biro bwogogi,+Nimar dho Jehova Nyasach oganda lweny osewacho mano.
5 Oganda ka oganda nowuoth e nying nyasache,Wan to wanawuoth e nying Jehova Nyasachwa+ nyaka chieng’.
6 “E odiechiengno,” Jehova owacho,“Abiro choko jo ma ne wuotho ka ling’o,Abiro choko jo ma ne oke,+Kaachiel gi jo ma ne asando malit.
7 Abiro weyo moko kuom jo ma ne wuotho ka ling’o,+Kendo anami jo ma ne oriemb mabor obed oganda ma nigi teko;+To Jehova noloch e wigi e Got Sayun,Chakre sani kendo nyaka chieng’.
8 To in, ohinga mar kueth,Got mar nyar Sayun,+Enobini, ee, loch mokwongo nobini,+Pinyruoth mar nyar Jerusalem.+
9 Koro ang’o momiyo igo koko?
Donge in gi ruoth,Koso jang’adni rieko osetho,Ma koro in gi rem mana ka dhako ma muoch kayo?+
10 Ywagi kendo chur, yaye nyar Sayun,Mana ka dhako ma muoch kayo,Nikech kochakore sani, ibiro wuok e dala maduong’ mondo idhi idag e pap.
Ibiro dhi nyaka Babulon,+Kendo kuno e ma ibiro resie;+Kuno e ma Jehova biro ng’iewie e lwet wasiki.+
11 Ibiro chok ogendni mang’eny mondo oked kodi;Gibiro wacho ni, ‘We mondo odwanye,Nyaka wane kaka idwanyo Sayun.’
12 To ok ging’eyo pach Jehova,Ok ging’eyo dwache;Nimar obiro chokogi mana ka cham manyien mitero kar dino.
13 A malo mondo inyon-gi, yaye nyar Sayun;+Nimar abiro loko tungeni obed nyinyo,Kendo abiro loko tiendeni obed mula,Ibiro tieko ogendni mang’eny.+
Ibiro chiwo ne Jehova ohandgi ma ne giyudo e yor mibadhi,Kendo mwandugi inimi Ruoth madier ma locho e wi piny duto.”+
