Ngeche 19:1-29
19 Ber bedo jachan to iwuotho e tim matir+Moloyo bedo mofuwo to iwacho miriambo.+
2 Ok ber bedo ng’at ma onge gi ng’eyo,+Kendo ng’at ma muomore, timo richo.
3 Fup ng’ato e ma ketho yorene,Kae to chunye sin gi Jehova.
4 Mwandu kelo osiepe mang’eny,To jachan ijwang’o kata mana gi osiepne.+
5 Janeno ma miriambo nyaka kum,+Kendo ng’at ma wacho mana miriambo lilo ok bi tony.+
6 Ji mang’eny temo mondo giyud ng’wono mar jachiwo,Kendo ji ohero mako osiep gi ng’at ma chiwo mich.
7 Owete jachan osin kode;+Osiepege to noringe ma rom nade?+
Kata otem sayogi, onge ng’at ma dwoke.
8 Ng’at ma yudo rieko ohero chunye.+
To ng’at mong’eyo pogo tiend wach, weche nodhine maber.+
9 Janeno ma miriambo nyaka kum,Kendo ng’at ma wacho mana miriambo lilo biro lal nono.+
10 Ok owinjore mondo ng’at mofuwo odag maber;To rach machal nade ka misumba locho e wi yawuot ruoth!+
11 Rieko miyo i ng’ato ok wang’ piyo,+Kendo oyudo duong’ koweyo ne ng’at mokethone.+
12 Ka ruoth okecho ochalo gi sibuor ma ruto,+To ka omor kodi ochalo gi tho manie lum.
13 Wuoyi mofuwo kelo masira ne wuon-gi.+Kendo dhako ma ralep chal gi ot ma chuer pile.+
14 Ot gi mwandu e pok ma wuoro weyo ne nyithinde,To dhako mariek a kuom Jehova.+
15 Samuoyo kelo nindo matut,To ng’at moluoro tich biro riyo kech.+
16 Ng’at ma luwo chik rito ngimane;+Ng’at ma ok dew yorene, biro tho.+
17 Ng’at ma kecho jachan holo Jehova,+To obiro chule* nikech gik mosetimo.+
18 Rie wuodi sa ma pod nitie geno,+Mondo kik kwani jaketho kotho.+
19 Ng’at ma nigi mirima mang’eny biro yudo chandruok;To kiware, initim kamano pile.+
20 Chik iti king’adoni rieko, yie mondo opuonji,+Eka inibed mariek kinde mabiro.+
21 Chuny ng’ato nyalo chano gik mathoth,To dwach Jehova e ma biro chopo.+
22 Ng’wono ma ng’ato nyiso miyo ji here;+Kendo bedo jachan ber moloyo bedo jamiriambo.
23 Luoro Jehova e ma tero ng’ato e ngima;+Ng’at ma ni kode nodag gi kuwe ma onge gima chande.+
24 Jasamuoyo luto lwete e bakul,To tero lweteno e dhoge tame.+
25 Chwad ja ajara,+ mondo ng’at ma ng’eyone tin obed mariek,+Kendo chiw siem ne ng’at ma winjo tiend wach, mondo ng’eyone omedre.+
26 Ng’at ma sando wuon-gi kendo ma riembo min-giEn wuoyi ma kelo wich-kuot kod achaya.+
27 Wuoda ka iweyo chiko iti ne puonj,Ibiro baro mabor kuom weche mag ng’eyo.
28 Janeno manono ochayo bura,+Kendo dho jaricho muonyo mana richo.+
29 Osekan bura ne jo ajara,+To kede iloso ne dier ng’e jo mofuwo.+
Weche Moler Piny
^ Kata, “guedhe.”
