Ngeche 6:1-35
6 Wuoda, ka po ni isingori ni ibiro chulo ne nyawadu gowi,+Kata ka imoso* ng’at ma ok ing’eyo,+
2 Ka po ni singruokni oduodi,Mi weche ma ne dhogi owacho omaki,+
3 Wuoda, koro tim kama mondo igonyri,Nikech isepodho e lwet nyawadu:
Dhi ire mapiyo, ibolrine kendo ihombe.+
4 Kik iwe nindo oteri,Kendo kik inur.
5 Resri ka mwanda e lwet jadwar.
Kendo ka winyo e lwet jachik winy.
6 In jasamuoyo, dhi ir ochunglo;+Inon yoregi mondo ibed mariek.
7 Kata obedo ni gionge jatelo, jaloch, kata ruoth,
8 Gikano chiembgi e ndalo oro,+Kendo gichoko chiembgi e ndalo keyo.
9 In jasamuoyo, ibiro nindo aninda kanyo nyaka karang’o?
Ibiro chiewo karang’o mondo ia e nindo?
10 Inindie matin, ayula wang’ okwanyie matin,Idol lweti matin mondo iyue,+
11 Dhier biro monji ka jakuo,Kendo chandruok ka ng’at momanore gi gik lweny.+
12 Jaricho ma timo nono, wuotho awuotha kowacho weche mobam;+
13 Oning’o wang’e,+ otimo ranyisi gi tiende, kod lwetene.
14 Chunye opong gi richo,Kinde duto ochano timo richo,+ kendo othuwo ji.+
15 Omiyo, masira nobine apoya;Obiro rumo mapiyo nono ma onge ng’at ma dichange.+
16 Nitie gik moko auchiel ma Jehova osin-go;Ee, abiriyo ma chunye ojokgo:
17 Wang’ mopong’ gi sunga,+ lep mariambo,+ kod lwedo machuero remb jo ma onge ketho,+
18 Chuny ma chano gik maricho,+ kod tielo ma ringo ng’wech mondo otim richo,
19 Janeno mar miriambo, ma riambo seche te,+Kod ng’at ma thuwo owete.+
20 Wuoda, rit chike wuonu,Kendo kik icha puonj* mag minu.+
21 Tuegi e chunyi kinde duto;Tuegi e ng’uti.
22 Sa ma iwuotho, gibiro chiki;Sa ma inindo, gibiro riti;
Kendo sa ma ichiewo, gibiro wuoyo kodi.*
23 Nimar chik en taya,+Kendo chik en ler,+To siem ma imiyo ng’ato, en yo mar ngima.+
24 Gibiro riti kuom dhako ma timbene richo,+Kendo kuom lep mayom mar dhako ma jachode.+
25 Kik ber mare owuond chunyi+Kata weyo mondo wengene olombi,
26 Nimar ochot nyalo loko ng’ato jadhier,*+
To dhako ma terore tieko ngima ng’ato.
27 Be ng’ato diket chuk mach e kore ma ok owang’o lawe?+
28 Be ng’ato diwuoth e maka maliet ma ok owang’o tiende?
29 Kamano e kaka ng’at ma terore gi chi ng’ato chalo;Ng’ato ang’ata ma mulo dhakono nyaka yud kum.+
30 Ji ok cha jakuoKokwalo chiemo sa ma odenyo.
31 To ka oyude to obiro chulo nyadibiriyo;Obiro chiwo gik moko duto manie ode.+
32 Ng’ato ang’ata ma terore gi chi ng’ato oonge rieko;Ng’at ma timo kamano ketho ngimane owuon.+
33 Obiro yudo mana adhonde gi wich-kuot+Kendo wich-kuot moyudono ok noruchi.+
34 Nikech nyiego miyo dichwo bedo gi mirima mager;Ok obi nyiso ng’wono sa ma ochulo kuor.+
35 Ok obi yie gi chudo moro amora;Chunye ok bi kuwe kata kimiye mich maduong’ manade.
Weche Moler Piny
^ Tiende ni, singruok mitimo gi ng’ato sa ma iholo gimoro.
^ Kata, “chike.”
^ Kata, “puonji.”
^ Kata, “miyo ibed matin ka nengo makate.”
