Ruth 4:1-22
4 Boaz nodhi e dho ranga dala maduong’+ mobet kanyo. Noneno watgi ma nosewuoyo kuomecha+ ka kadho kanyo. Eka Boaz nowachone niya: “Ng’ane, bi ibed ane piny kae.” Nobiro mobet piny.
2 Boaz noluongo jodongo apar mag dalano+ mowachonegi niya: “Beduru piny kae.” Mi ne gibet piny.
3 Eka Boaz nowacho ne jalo+ niya: “Naomi ne oseduogo koa e piny Moab,+ kendo sani koro chune ni nyaka ous puoth Elimelek+ owadwa.
4 Omiyo, naneno ni onego anyisi wachno, kendo akwayi ni ing’iew puodhono e nyim jo man kae, kendo e nyim jodongwa.+ Kiyie ware, to ware. To ka ok ibi ware, to wachna mondo ang’e, nikech in e ma in gi ratiro mar ware mokwongo, e ka an.” Jalo nodwoke niya: “Abiro ware.”+
5 Eka Boaz nowachone niya: “Chieng’ ming’iewoe puodhono kuom Naomi to nyaka ing’iewe bende kuom Ruth Nya-Moab ma en chi liel, mondo nying ng’at mothono kik lal nono.”+
6 Jalo nodwoke niya: “Ka en kamano to ok anyal ware nimar di po ka aketho mwanduna awuon. Ber mondo ikaw kara iwar gino ma owinjore awar, nikech an ok anyal ware.”
7 E ndalo machon, ma e gima Jo-Israel ne timo sa ma gidwa waro kata loko gimoro. Ng’ato ne lonyo wuochene,+ kendo miyo wadgi mondo wachno obed gi teko.
8 Omiyo, jalo nolonyo wuochene kowacho ne Boaz niya: “Ero in e ma mondo ing’iew puodhono.”
9 Eka Boaz nowacho ne jodongo kod ji duto niya: “Un e jo ma oneno+ kawuononi ka ang’iewo kuom Naomi gik moko duto mag Elimelek gi mag Kilion kod mag Malon.
10 Bende, akawo Ruth Nya-Moab ma chi Malon obed chiega, mondo achung nying jal mothono e wi mwandune,+ mondo kik nyinge lal e kind owetene, kata kuom dhoodgi. Un e joneno kawuononi.”+
11 Eka jodongo kaachiel gi ji duto ma ne nie dho rangano nowacho niya: “Ee, wan joneno! Mad Jehova oguedh dhako ma donjo e odino mondo obed kaka Rahel kod Lea, mon ariyo ma nogero dhoudi mag Israel.+ Bende, mad iyud duong’ e Efratha+ kendo iyud pak mathoth e Bethlehem.+
12 Dhoodi bende ochal gi dhood Perez+ ma Tamar nonyuolo ne Juda kuom kodhi ma Jehova biro miyi gi dhakoni.”+
13 Kamano Boaz nokendo Ruth. Ne onindo kode mi Jehova noguedhe momako ich monyuolo wuoyi.
14 Kendo mond gweng’no nowacho ne Naomi niya: “Opak Jehova nimar osemiyi ng’at ma diwari kawuononi. Nying nyathini mondo obed gi huma e Israel!
15 Nyathini oseduogo chunyi, kendo enoriti ka iti, nikech chi wuodi moherini+ kendo moloyoni yawuoyi abiriyo e ma osenyuole.”
16 Naomi nokawo nyathino moting’e e kore kendo nobedo japite.
17 Mon wetene nomiyo nyathino nying. Ne giwacho niya: “Osenyuol ne Naomi nyathi ma wuoyi,” kendo ne giluonge ni Obed.+ En e wuon Jesse+ ma wuon Daudi.
18 Ma e anyuola mar Perez:+ Perez nonyuolo Hezron;+
19 Hezron nonyuolo Ram; Ram nonyuolo Aminadab;+
20 Aminadab+ nonyuolo Nashon; Nashon nonyuolo Salmon;
21 Salmon nonyuolo Boaz; Boaz nonyuolo Obed;
22 Obed nonyuolo Jesse;+ kendo Jesse nonyuolo Daudi.+
