Tich Joote 8:1-40
8 To Saulo ne oyie gi nekne.+
Kendo e chieng’no, sand maduong’ ne omuoch kuom kanyakla ma ne ni Jerusalem; jopuonjre duto ne okere e gwenge te mag Judea gi Samaria,+ mak mana joote.
2 Kata kamano, jomoko moluoro Nyasaye noting’o Stefano mondo gidhi giyike, kendo ne giywage ahinya.
3 Saulo to nochako sando kanyakla malit. Ne ojamonjo ot ka ot koywayo chwo gi mon oko kendo nochiwogi mondo otuegi e jela.+
4 Kata kamano, jopuonjre ma ne osekerego nodhi e pinje duto ka gilando wach maber mar Nyasaye.+
5 Koro Filipo ne odhi e dala* mar Samaria+ mi nochako yalonegi wach Kristo.
6 Oganda duto ne winjo gi chuny achiel gik ma Filipo ne wacho ka gichiko itgi kendo ne ging’iyo honni ma notimo.
7 Nikech ji mang’eny ne nigi jochiende, jochiendego ne ywak gi dwol maduong’ kae to giwuok kuom jogo.+ E wi mano, ne ochang ji mang’eny ma ne ong’ol kod pudhe.
8 Kuom mano, ji nobedo gi mor maduong’ e dalano.
9 Koro ne nitie ng’ato e dalano ma nyinge Simon, ma nosebedo ka timo gik moko gi teko mar jochiende komiyo oganda mar Samaria wuoro ahinya, kendo notimore owuon ni en ng’at ma nigi duong’.
10 Ji duto, chakre ng’at matinie mogik nyaka ng’at maduong’ mogik ne winje, kendo ne giwacho niya: “Jali e Teko mar Nyasaye miluongo ni Maduong’.”
11 Omiyo, ne gijowinje kendo wuoro nikech gik ma nosebedo kotimo kotiyo gi teko jochiende.
12 Kata kamano, ka ne giyie gi Filipo ma ne lando wach maber e wi Pinyruodh Nyasaye+ kendo e wi nying Yesu Kristo, ne obatisgi giduto chwo gi mon.+
13 Simon owuon bende ne oyie, to bang’ ka nosebatise, ne odhi nyime bedo gi Filipo;+ kendo nowuoro ahinya koneno honni kod tije madongo ma ne timore.
14 Ka joote ma ne ni Jerusalem nowinjo ni Samaria noserwako wach Nyasaye,+ ne gioro Petro gi Johana irgi;
15 mi ne gilor kuno kendo ne gilemonegi mondo giyud roho maler.+
16 Nikech nyaka chop kindeno roho ne pok olor ne ng’ato kuomgi, to gima nosetimnegi kende ne en batiso e nying Ruoth Yesu.+
17 Kae to ne giketo lwetegi kuomgi+ kendo jogo noyudo roho maler.
18 Koro ka Simon noneno ni joote keto lwetgi kuom ji to giyudo roho maler, nodwaro miyo jootego pesa,
19 kowacho niya: “An bende miyaeuru nyalono, mondo ng’at ma aketo lweta kuome oyud roho maler.”
20 To Petro nodwoke kama: “Fedhanigo mondo olal kodi, nimar iparo ni inyalo tiyo gi pesa mondo iyud mich ma Nyasaye chiwo nono.+
21 In ionge gi pok e migawoni, nimar chunyi ok oriere tir e wang’ Nyasaye.
22 Omiyo, lok chunyi iwe timni marachni, kendo ikwa Jehova,* ni ka nyalore to oweni nikech paro marachno.
23 Aneno ni in sum makech kendo in misumba tim ma ok kare.”
24 Simon nodwokogi kama: “Kwanauru Jehova* mondo gik muwachogi kik bi kuoma.”
25 Kuom mano, ka ne gisechiwo neno e okang’ mong’ith kendo ka ne giseyalo wach Jehova,* ne gichako dok ka gichomo Jerusalem, kendo ne gidhi ka gilando wach maber e gwenge mang’eny mag Jo-Samaria.+
26 Kata kamano, malaika mar Jehova*+ nowacho ne Filipo niya: “A malo idhi yo milambo e yo ma lor koa Jerusalem ka dhi Gaza.” (Mani en ndara manie thim motwo.)
27 Eka noa malo mi nodhi romo gi Ja-Ethiopia ma bwoch* ma ne nigi teko e bwo Kandes ruoth ma dhako mar Jo-Ethiopia, kendo en e ma ne ochung’ ne mwandu duto mag ruodhno. Jalo ne odhi Jerusalem mondo olem,+
28 to sano koro ne odok thurgi kobet e gari ma faras ywayo, kendo ne osomo bug janabi Isaya gi dwol maduong’.
29 Omiyo, roho maler nowacho ne Filipo niya: “Dhi machiegni gi garino.”
30 Filipo noringo nyaka e bath garino mi nowinjo ka Ja-Ethiopiano somo bug janabi Isaya gi dwol maduong’, mi nopenje kama: “Be adier iwinjo tiend weche misomogo?”
31 Nodwoko niya: “Kuom adier, ere kaka dawinj tiendgi ka ok ng’ato olerona?” Omiyo, nokwayo Filipo mondo oidh obed kode e garino.
32 Koro Ndiko ma noyudo osomo ne wacho niya: “Ne otere e kar yeng’o mana ka rombo, kendo ne ok onyal yawo dhoge mana ka nyarombo moling’ e nyim ng’at ma liele.+
33 E kinde ma ne ijare kitimone achaya, ne ok ong’adne bura makare.+ Gin ng’a gini ma biro hulo wach tieng’ne? Nimar ibiro keth ngimane e piny.”+
34 Eka jatelo ma Ja-Ethiopiano nowacho ne Filipo niya: “Asayi, nyisa ane, janabini wuoyo kuom ng’a? Dibed ni owuoyo kuome owuon, koso kuom ng’at moro machielo?”
35 Eka Filipo noyalone wach maber e wi Yesu kochako gi Ndikono.
36 Koro ka ne gimedo dhi, ne gichopo e yawo moro ma nigi pi, kendo Ja-Ethiopiano nowacho kama: “Ero ne! Pi ni kae; be nitie gima dimi kik batisa?”
37 *—
38 Eka nochiko ni ochung garino, mi Filipo gi Ja-Ethiopiano ne olor mi gidonjo e i pi, kendo Filipo ne obatise.
39 Ka ne giwuok e pi, mapiyo nono roho mar Jehova* notayo Filipo mondo odhi yore, mi Ja-Ethiopiano ne ok onene kendo, to ne odhi nyime gi wuodhe komor ahinya.
40 Kata kamano, ne ota Filipo nyaka Ashdod, kendo nowuotho e alworano koyalo wach maber e mier duto nyaka nochopo Kaisaria.+
Weche Moler Piny
^ Kata nyalo bedo, “dala moro.”
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Tiend Weche.
^ Som Apendiks A3.
^ Som Apendiks A5.
