Wer Mamit Moloyo Wende Duto 5:1-16
5 “Asebiro e puotha,+Yaye nyamera, jaherana.
Asechoko manemane kod gik mang’we ng’ar.+
Asechamo peth kich kod mor kich;Asemadho divaina kod chaga.”+
“Chiemuru, osiepena!
Methuru kendo meruru gi weche hera.”+
2 “Nindo otera, chunya to neno.+
Awinjo ka jaherana dwong’o dhoot!
Ka owachona niya: ‘Yawna nyamera, yaye jaherana,Akucha, ionge kata mbala!
Yie wiya ng’ich nikech tho,Tho motieno omako yie wiya.’+
3 “‘Aselonyo kandhona.
Be onego arwake kendo?
Aseluoko tiendena.
Be onego alilgi e lowo kendo?’
4 Jaherana osegolo lwete e otuchi manie dhoot,Kendo koro chunya gombe matek.
5 Ne achung’ mondo adhi ayaw ne jaherana dhoot;Ka lwetena ndong’ mor manemane,Kendo mo ma ne nie lith lwetenaNe omienore e pata mar dhoot.
6 Ne ayawo ne jaherana,To ne ayudo ka oonge, ne osea.
Ne awinjo marach* ka ne ayudo ni osea.
Ne amanye, to ne ok ayude.+
Ne aluonge, to ne ok odwoka.
7 Jorit ma lworore e dala noromo koda.
Ne gigoya, ne gihinya.
Jorit ma ne rito e ohinga ne omaya abolana.*
8 Un nyi Jerusalem, kuong’renauru:
Ni ka uneno jaherana,To ubiro nyise ni hera nega.”
9 “Nyiswae gima jaheranino oloyogo jomamoko,Yaye in nyako ma jaber moloyo nyiri duto?
Nyiswae gima jaheranino oloyogo jomamokoMomiyo idwaro ni wakuong’reni kamano.”
10 “Jaherana jaber mapichni kendo osilwal;Fwenye yot kata mana e dier ji aluf apar.
11 Wiye en dhahabu, dhahabu maler mopwodhi.
Yie wiye bende fwayore ka it othith,Yie wiye rateng’ mana ka yie agak.
12 Wengene chal ka akuche manie tiend aora,Ma luokore e chak,Akuche manie bath yawo mopong’.
13 Lembe ber ka puoth maupe,+Puodho ma gik ma golo suya mamit ogaworee.
Dhoge chalo gi mau ma ndong’o mor manemane.+
14 Lith lwetene chalo dhahabu, orwakie kite mag krisolait.
Iye chalo gi tung liech mapoth momwonie kite mag safir.
15 Ogwendene chalo gi sirni moso e buche molos gi dhahabu maler.
Ochal gi Lebanon, ober ka yiende mag sida.+
16 Dhoge mit ka mor kich,Kendo gik moko te beyo kuome.+
Koro un nyi Jerusalem, ma e jaherana ma waherorego.”
