Ywagruok 4:1-22
א [Aleph]
4 To mano kaka dhahabu ma ne ler koro ok rieny!+
To mano kaka kite maler+ okere e nderni duto manie dala!+
ב [Beth]
2 Yawuot Sayun ma bergi ne chal gi dhahabu maler,Koro chalo mana gi agulni mag lowo,Gik ma jachuecho e ma oloso!
ג [Gimel]
3 Kata mana bwe be dhodhoga nyithinde,Nyar joga to osebedo makwiny+ mana ka udo manie thim.+
ד [Daleth]
4 Lew nyathi ma dhoth omoko e dande nikech riyo oloye.
Nyithindo kwayo makate,+ to onge ng’at ma miyogi kata mana ng’injo.+
ה [He]
5 Jo ma yande chamo chiemo mamit koro nindo mana e nderni nikech kech negogi.+
Jo ma ne rwako lewni makwar+ koro onindo mana e pidhe mag buru.
ו [Waw]
6 Kum ma nyar joga oyudo, duong’ moloyo kum ma Sodom noyudo nikech richone,+Ne otiek Sodom ka diemo wang’, onge ng’at ma ne nyalo konye.+
ז [Zayin]
7 Jo-Nazir+ mage ne ler moloyo theluji, ne gin rochere moloyo chak.
Ne gikwar moloyo kite mag korol; ne girieny ka kite mag safir.
ח [Heth]
8 To tinde gin rotenge ti;Onge ng’at ma nyalo fwenyogi e nderni.
Gidhero ma koro gidong’ choke lilo;+ gichalo yien motwo.
ט [Teth]
9 Jo ma ne otho gi ligangla ne ber berie moloyo jo ma ne kech onego,+Nimar kech ne oyweyogi mi otiekogi nikech ne onge cham e puothe.
י [Yod]
10 Mon ma ne ng’won osetedo nyithindgi giwegi.+
Nyithindgigo nobedo chiembgi e ndalo ma ne masira omako nyar joga.+
כ [Kaph]
11 Jehova osenyiso ich-wang’ne;Oseolo mirimbe mager.+
Kendo omoko mach e Sayun mowang’o misene.+
ל [Lamed]
12 Ruodhi mag piny kod ji duto ma ne odak e piny ne ok parNi jasigu ne nyalo donjo e dho rangeye mag Jerusalem.+
מ [Mem]
13 Mano notimore nikech richo mag jonabine kod ketho mag jodolone,+Ma ne chuero remb jo makare ma ne odak e iye.+
נ [Nun]
14 Giwuotho awuotha e nderni ka muofni.+
Gimienore gi remo,+Onge ng’at ma nyalo mulo lepgi.
ס [Samekh]
15 Ji ne goyonegi koko niya: “Dhiuru kucho! Uchido! Suduru mabor! Suduru mabor! Kik umulwa!”
Gionge kuonde dak kendo gibayo abaya.
Ogendni wacho niya: “Ok ginyal dak kodwa.+
פ [Pe]
16 Jehova owuon e ma osekeyogi;+Ok nochak odewgi kendo.
Ji biro chayo jodolo,+ kendo ok ginidew jodongo.”+
ע [Ayin]
17 Wengewa koro oseol ka wamanyo ng’at ma dikonywa to onge.+
Ne wamanyo kony kayiem nono kuom oganda ma ne waparo ni ne nyalo konyowa.+
צ [Tsade]
18 Giselawowa kuonde duto+ ma koro ok wanyal kata wuotho e laru magwa.
Thowa osechopo; ndalowa chiegni rumo, gikowa osekayo machiegni.
ק [Qoph]
19 Jo ma ne lawowa ne ringo ng’wech moloyo otenga ma fuyo e kor polo.+
Ne gilawowa e gode; ne gibutonwa e thim.
ר [Resh]
20 Osemak ng’at mowir mar Jehova,+ muya ma wayueyo, mokete e bur maduong’ ma ne gikunyo,+Ng’at ma ne wawacho kuome niya: “Wabiro dak e bwo tipone e kind ogendni.”
ש [Sin]
21 Yaye nyar Edom modak e piny Uz, bed mamor kendo moil.+
In bende okombeno biro choponi,+ mi inimadhe mimer kendo ji none dugi.+
ת [Taw]
22 Yaye nyar Sayun, kum ma ne omiyi nikech richoni osechopo e gikone.
Ok obi teri e tuech kendo.+
To in, yaye nyar Edom, obiro kumi.
Obiro elo richoni.+