Zekaria 1:1-21
1 E dwe mar aboro, e higa mar ariyo mar loch Darius,+ wach Jehova nobiro ne janabi Zekaria*+ wuod Berekia ma wuod Iddo, niya:
2 “Mirima mager ne omako Jehova nikech kwereu.+
3 “Wachnegi kama, ‘Ma e gima Jehova Nyasach oganda lweny owacho: “‘Duoguru ira,’ Jehova owacho, ‘to anaduog iru,’+ Jehova Nyasach oganda lweny owacho.”’
4 “‘Kik ubed kaka kwereu ma jonabi machon ne osayo niya: “Jehova Nyasach oganda lweny wacho ni, ‘Lokreuru,* asayou, uwe yoreu maricho kod timbeu maricho.’”’+
“‘To ne gitamore chiko itgi kata dewo wechena,’+ Jehova owacho.
5 “‘To koro, kwereugo ni kanye? To be jonabigo nodak nyaka chieng’?
6 Kata kamano, donge kwereu noneno ka wechena kod chikena ma ne amiyo jotichna ma jonabi chopo kare, koso?+ Kendo mano nomiyo giduogo ira ka giwacho niya: “Jehova Nyasach oganda lweny osetimonwa mana kaka yorewa kod timbewa obet. Osetimo gima ne owacho.’”+
7 E odiechieng’ mar 24 dwe mar 11, tiende ni dwe mar Shebat,* e higa mar ariyo mar loch Darius,+ wach Jehova nobiro ne janabi Zekaria wuod Berekia ma wuod Iddo, niya:
8 “Ne aneno fweny moro gotieno, ka ng’at moro oidho faras makwar, kendo ne ochung’ e kind yiende mag murtel ma ne nie hoho. E tok ng’atno, ne nitie farese ma rokwere, ma robuoche, kod ma rochere.”
9 Omiyo, ne apenjo niya: “Ruodha, magi gin jomage?”
Malaika ma ne wuoyo koda ne odwoka kama: “Abiro nyisi ni gin ng’a gini.”
10 Eka ng’at ma ne ochung’ e kind yiende mag murtel ne owacho niya: “Magi e jo ma Jehova oseoro mondo owuoth koni gi koni e piny.”
11 Jogo ne owacho ne malaika mar Jehova ma ne ochung’ e kind yiende mag murtel niya: “Wasewuotho koni gi koni e piny, kendo ne! piny mangima oling’ mos kendo okuwe.”+
12 Eka malaika mar Jehova nowacho niya: “Yaye Jehova Nyasach oganda lweny, ibiro sin gi Jerusalem kod mier mag Juda nyaka karang’o?+ Nimar mirimbi osebedo kuomgi kuom higni piero abiriyogi.”+
13 Jehova nodwoko malaika ma ne wuoyo kodano gi weche mang’won kendo ma hoyo chuny.
14 Eka malaikano ne onyisa niya: “Wach matek ni, ‘Ma e gima Jehova Nyasach oganda lweny owacho: “Abiro kedo ne Jerusalem kod Sayun gi kinda, ee, anakednegi gi kinda ahinya.+
15 An gi mirima mager kod ogendni ma ok dew,+ nikech iya ne owang’ mana matin gi joga,+ kata kamano, gisemedonegi masira.”’+
16 Kuom mano, ma e gima Jehova owacho: ‘“Abiro dok Jerusalem mi akeche,+ kendo ibiro ger oda e iye,”+ Jehova Nyasach oganda lweny owacho, “kendo ibiro pim Jerusalem gi tond pimo.”’+
17 “Chak iwach matek ni, ‘Ma e gima Jehova Nyasach oganda lweny owacho: “Gik mabeyo biro mol e miecha; Jehova biro hoyo Sayun+ mi oyier Jerusalem kendo.”’”+
18 Eka ne ating’o wang’a mi aneno tunge ang’wen.+
19 Omiyo, ne apenjo malaika ma ne wuoyo koda niya: “Magi gin ang’o?” Ne odwoka kama: “Magi gin tunge ma ne okeyo Juda,+ Israel+ kod Jerusalem.”+
20 Eka Jehova nonyisa ji ang’wen molony e tij lwedo.
21 Napenje niya: “To jogi obiro timo ang’o?”
Nodwoka kama: “Magi e tunge ang’wen ma ne okeyo Juda ma onge kata ng’at ma ne nyalo ting’o wiye. Jogo nobi mondo okethgi, kendo turo tunge mag ogendni ma noting’o tungegi kuom piny Juda mondo gikeye.”
