Zekaria 11:1-17
11 “Yaye Lebanon, yaw dho uteni,Mondo mach owang’ yiendi mag sida.
2 Go nduru, yaye junipa, nikech sida osepodho;Oseketh yiende madongo!
Gouru nduru, un yiende madongo mag Bashan,Bungu ma ne opong’ gi yien osepodho piny!
3 Winjuru! Jokwath goyo nduru,Nimar duong’ ma ne gin-go oselal nono.
Winjuru! Nyithi sibuoche ruto,Nikech osekethi bungu motwere man bath Jordan.
4 “Ma e gima Jehova Nyasacha owacho, ‘Kwauru rombe monego oyang’,+
5 nikech jo ma ng’iewogi yang’ogi+ to ok kumgi, kendo jo ma usogi+ wacho ni, “Opak Jehova nikech abiro bedo jamwandu.” Jokwadhgi bende ok kechgi kata matin.’+
6 “‘Nimar ok anakech jo ma odak e piny kendo,’ Jehova owacho. ‘Abiro miyo ng’ato ka ng’ato opodh e lwet jabute kendo e lwet ruodhe; gibiro ketho piny, to ok abi resogi e lwetgi.’”
7 Eka ne achako kwayo rombe ma nonego oyang’+ e lou, yaye un rombe ma sandore e kueth. Omiyo, ne akawo ludhe ariyo, ne achako achiel ni Ng’wono, to machielo Riwruok,+ kae to ne achako kwayo rombe.
8 Kendo ne ariembo jokwath adek e dwe achiel, nikech chunya nojok kodgi, to gin bende ne ajogogi.
9 Bang’e ne awacho niya: “Ok abi dhi nyime kwayou. Mano ma tho, we mondo otho, to mano ma lal we mondo olal alala. To we mondo modong’ ocham ringre jowetegi.”
10 Eka ne akawo ludha ma nachako ni Ng’wono+ mi ature mondo aketh singruok ma ne atimo gi ogendni duto.
11 Omiyo, singruogno ne okethore mana chieng’no, kendo ka ne rombe ma ne sandore e kueth oneno wachno, ne gifwenyo ni mano nyaka bed wach Jehova.
12 Ne awachonegi niya: “Ka uneno ni ber, to kare chulauru; to ka ok kamano, kik uchula.” Eka ne gichula* fedha 30.+
13 Kendo Jehova nowachona niya: “Bolgi e kar keno, mano e nengo maduong’ ma ne giparo ni owinjore koda.”+ Omiyo, ne akawo fedha piero adekgo mi nabologi e kar keno man e od Jehova.+
14 Eka ne aturo ludha machielo ma ne iluongo ni Riwruok,+ mondo aketh wat ma ne nitie e kind Juda gi Israel.+
15 Eka Jehova nowachona niya: “Kaw gige tich mag jakwath manono.+
16 Nimar abiro weyo mondo jakwath moro ochung’ e piny. Ok nodew rombe ma tho,+ kata manyo rombe matindo, kata chango mohinyore,+ kata pidho rombe mangima. Kar mano, obiro chamo rombo machwe,+ kendo obiro kidho tiend rombe.+
17 Yaye, nobed malit ne jakwadha manono+ mosejwang’o rombe!+
Ligangla biro goyo bade kod wang’e ma korachwich.
Bade biro tal chuth,
Kendo wang’e ma korachwich ok nochak onen.”
Weche Moler Piny
^ Kata, “gipimona.”
