Zekaria 12:1-14
12 Ote mapek:
“Wach Jehova e wi Jo-Israel,” Jehova owacho,Jal ma noyaro polo,+Ma noketo mise mar piny,+Kendo ma nochueyo much ngima e i dhano.
2 “Abiro miyo Jerusalem obed okombe* ma nomi ogendni duto mokiewo kodgi okwang’ ka jo momer; kendo wasigu biro lworo Juda gi Jerusalem.+
3 Chieng’no anami Jerusalem obed ka kidi mapek* ne ogendni. Ng’ato ang’ata ma biro ting’e biro hinyore;+ kendo ogendni duto manie piny biro chokore mondo gimonje.+
4 Chieng’no,” Jehova owacho, “Abiro goyo farese duto gi luoro maduong’, kendo jo ma oidhogi nolokre jonekni. Anarit* Jo-Juda, kata kamano, abiro miyo farese duto mag ogendni olokre mwofni.
5 Kendo jodongo mag Juda biro wacho kama e chunygi, ‘Jo modak Jerusalem yudo teko kokalo kuom Jehova Nyasachgi, ma en Nyasach oganda lweny.’+
6 Chieng’no anami jodongo mag Juda obed ka pado maliet manie yien, kendo kaka chuk mach e puoth tiang’,+ mi giniwang’ ji duto mokiewo kodgi yo koracham gi korachwich;+ kendo Jerusalem biro dok kare owuon, mi ji nodag kendo e dalano.+
7 “Jehova biro reso hembe mag Juda mokwongo, mondo duong’ mar od Daudi kod duong’ mar jo modak Jerusalem kik lo Juda.
8 Chieng’no Jehova biro bedo okumba ne jo modak Jerusalem;+ chieng’no kata ng’at ma yom yom* e kindgi nobed motegno ka Daudi, kendo dho od Daudi biro chalo ka Nyasaye, kendo ka malaika mar Jehova motelonegi.+
9 Chieng’no, abiro tieko ogendni duto ma nobi monjo Jerusalem.+
10 “Abiro olo chuny mar ng’wono kod sayo kuom od Daudi kod jo modak Jerusalem, kendo gibiro chomo wang’gi kuom ng’at ma ne gichuoyo,+ kendo gibiro ywak ka gigoyo nduru mana ka gima giywago wuoyi ma miderma; gibiro ywage malit mana kaka digiywag wuoyi makayo.
11 Chieng’no, ywak nobed malich e Jerusalem, mana kaka ji ne oywak Hadadrimon e Paw Megido.+
12 Kendo pinyno biro ywak, ot ka ot noywag kar kendgi; dhood Daudi noywag kar kendgi, kendo mondegi bende noywag kar kendgi; dhood Nathan+ noywag kar kendgi, kendo mondegi bende noywag kar kendgi;
13 dhood Lawi+ noywag kar kendgi, kendo mondegi bende noywag kar kendgi; dhood Shimei+ noywag kar kendgi, kendo mondegi bende noywag kar kendgi;
14 kendo dhoot ka dhoot modong’go biro ywak kar kende, mondegi bende noywag kar kendgi.
Weche Moler Piny
^ Kata, “bakul.”
^ Kata, “ka ting’ mapek.”
^ Kata, “Anaket wang’a,”
^ Kata, “ma chwanyore.”
