Zekaria 5:1-11
5 Ne ating’o wang’a kendo, mi aneno buk moro modol ma fuyo.
2 Ne openja niya: “Ineno ang’o?”
Nadwoke kama: “Aneno buk modol ma fuyo. Borne en bede* 20 to lachne en bede 10.”
3 Eka ne owachona niya: “Ma e kuong’ ma dhi e wang’ piny duto, nikech ng’ato ang’ata mokwelo+ pok okum mana kaka ondik e bath bugni konchiel. Bende, ng’ato ang’ata ma kuong’ore gi miriambo+ pok okum mana kaka ondik e bath bugni komachielo.
4 Jehova Nyasach oganda lweny owacho ni, ‘An e ma aseore. Obiro donjo e od jakuo, kendo e od ng’at ma kuong’ore gi nyinga e yor miriambo; obiro bedo e odno kendo enotieke kaachiel gi yiendene kod kitene duto.’”
5 Eka malaika ma ne wuoyo kodacha ne obiro nyime monyisa niya: “Asayi, rang ane malo mondo ine gima dhicha.”
6 To ne apenje niya: “Gino en ang’o?
Nodwoka kama: “Gima dhino en atonga mar efa.”* Nomedo wacho niya: “Mano e kaka gichalo e piny duto.”
7 Raum molworore mar nyinyo ma ne oumo atongano ne oyawore, mi aneno dhako moro mobet e i atongano.
8 Kendo ng’atno nowacho niya: “Ma e Richo.” Eka ne oduoko dhakono e i atongano, mi odino dho atongano gi raum mar nyinyo.
9 Ne ating’o wang’a mi aneno mon ariyo ma fuyo e kor yamo ka biro. Ne gin gi buombe ma chalo gi mag winyo miluongo ni ogungo. Ne giting’o atongano, mi gidhigo malo e kind polo gi piny.
10 Eka ne apenjo malaika ma ne wuoyo kodano niya: “Gitero atonga mar efano kanye?”
11 Ne odwoka niya: “Gitere e piny Shinar*+ mondo ogerne ot kuno; to ka odno oseikore, ibiro kete ka ma owinjore kodeno.”
Weche Moler Piny
^ Bat achiel romre gi sentimita 44.5 (inj 17.5). Som Apendiks B14.
^ Iwuoyo kuom atonga kata okapu ma ne itiyogo e pimo efa. Efa achiel ne en lita 22. Som Apendiks B14.
^ Tiende ni, Babulon.
