Ka ne Lweny mar Ariyo mar Piny Ngima orumo e higa mar 1945, kuonde mang’eny e piny Germany nodong’ ka chal mana gunda. Taondege nokethore, skunde nodong’ nono, osiptende nokethore kendo ne ok giti, kendo mbom ma ne imuojoga bende nodong’ ka ni kamoro amora. E wi mago, chiemo bende ne nok, kendo mano nomiyo nengo chiemo oidho ahinya. Kuom ranyisi, joma ne uso chiemo e yor magendo ne uso blueband mar gram 500 gi pesa marom gi ma ng’ato ne nyalo tiyone kuom jumbe auchiel mondo e ka oyudi!

Moko kuom joma chal ma kamano noyudo ne gin Joneno mag Jehova ma nosebedo ka otue e jela kod e kembe misandoe ji nikech yiegi kuom higni mathoth. E higa mar 1945, nogonygi kendo ne giwuok kuro ka gin gi lwetegi nono mak mana lep jela ma ne girwako kende. Joneno mamoko bende gigegi nolal. Moko kuomgi ne ni kech ahinya kendo ne simga nyaka e chokruok.

Joneno mag Jehova ma ni e pinje mamoko nochiwo kony mar chiemo kod lewni mapiyo ahinya. Owete ma ni e ofis maduong’ ma ne ni Amerka nokwayo owete ma ofis ma Bern, e piny Switzerland mondo okony owete ma Germany. Ofis maduong’ nooro Owadwa Nathan H. Knorr mondo olim owete ma ni Europe. Noore mondo olos tudruok kod chenro maber ma ne dhi miyo kony ma ne ichiwgo ochop mapiyo.

Joneno mag Jehova ma ni Switzerland nochiwo chiemo, lewni, kod pesa gi chunygi duto. Gik ma ne gichiwogo ne oor Bern, kama ne idhi non-gie kendo chan-gie maber ka pok okowgi Germany. Joneno mamoko ma a e pinje moriwo Sweden, Canada, kod Amerka, bende nochiwo kony kendo mano nokelo ber mathoth ne Joneno ma ne ni Germany kod kuonde ma ne lweny oketho kaka Europe gi Asia.

Mana bang’ dweche machuok, ofis ma Switzerland noyudo chiwo mag kahawa, chak, sukari, cham, olembe motwo, alode, kaachiel gi ring’o kod rech miketoga e okebe. Chiwo mag pesa bende ne giyudo.

E wi mago, Joneno ma ni Switzerland nochiwo kilo 5000 mag lewni moriwo kode, lewni mag mine, kod sude. Gaset mar The Watchtower ma Januar 15, higa 1946 nowacho kama: “Owetego ne ok ochiwo mana gik ma ne gisetiyogo moti, to ne gichiwo gik mabeyo mogik ma ne gin-go. Ne gichiwore gadier mondo gikony owetegi man German.”

Joneno ma Switzerland bende nochiwo wuoch ma dirom tielo 1,000. Nonon wuochgo mondo one ka be nitie ma ne didwar ni olos ka pok okow. Owete gi nyimine ma Wiesbaden, e piny Germany, ma noyawo wuochgo mondo ginon-gi, nowuoro ahinya neno kaka ne gin wuoch mopogore opogore kendo ma pod beyo. Janeno moro nowacho kama: “An gadier ni onge duka minyalo yudoe lewni kod wuoch mopogore opogore mabeyo kamano e piny Germany.”

Owete gi nyimine ne odhi nyime golo chiwo ka ikowogi nyaka ka nochopo dwe mar Agost 1948. Joneno ma ne ni Switzerland nooro gik moko ma ne romo krede 444 ma kopim to ne romo kilo 25,000 ne owetegi man Germany. Mana kaka ne wasewacho, Joneno ma ne ni Switzerland bende ne gin moko kuom joma nooro chiwo ma nokonyo owete gi nyimine ma noyudo masira. E kindeno, kwan mar Joneno ma ne ni Switzerland ne nyalo romo ji 1,600. Kata obedo ni ne gitin kamano, pod ne gichiwo gi chunygi duto!

Yesu nowacho kama: “Ma e ma nomi ji duto ong’e ni un jopuonjrena ka un gi hera e kindu uwegi.” (Johana 13:34, 35) Hera nochwalo jotich Jehova mondo ochiw gik mabeyo mogik ma ne gin-go to ok mana gik ma giyudo. (2 Jo-Korintho 8:1-4) Barua moro ma noa Zurich nowacho ni “owete moko ma ne gombo konyo to ne onge gi gik ma di gikow, nochiwo pesa.”

Weche nobedo maber ne jotich Jehova ma ne ni Germany mapiyo kendo ne gichako winjo maber bang’ akwede kod lweny. Achiel kuom gimomiyo weche nochako bedonegi maber en nikech kony mag chiwo ma ne giyudo koa kuom Jokristo wetegi ma noherogi ahinya.