Dwe ka dwe, waritoga gi siso program mopogore opogore kod vidio miketoga e JW Broadcasting. Kata kamano, owete gi nyimine mang’eny ma a e pinje mag Afrika ok nyalga neno programgo e Intanet. Nikech ang’o?

 Kuonde mang’eny e Afrika, Intanet thekoga. To kata kuonde ma Intanet nitie, kinde mang’eny odhiga mos, kata nengone tekga ahinya. Kuom ranyisi, chieng’ moro jarit-alwora moro e piny Madagascar ne otoko kata download program mar JW Broadcasting mar dwe moro achiel e cyber. Ne ochulo pesa mokalo siling’ 1,600 (ma Kenya), ma en osach juma achiel kuonde mang’eny!

 Kata obedo ni nitie pek kaka mago, ji tara gi tara e Afrika tinde neno program mag JW Broadcasting ma ok ochuno ni giti gi Intanet. Ere kaka mano nyalore?

 Chakre higa mar 2017, joma odak e pinje mag Afrika manie alwora mar sub-Sahara osebedo ka neno JW Broadcasting e chanel mar setlait ka gichwoye achiel kachiel e TV. Chanelno yudore nono ma onge chudo, kendo oyudore pile ka pile e dhok 16.

 Joneno mag Jehova chuloga kambi moro mar televison mondo onyis program mag JW Broadcasting e yor setlait. Setlaitno chopoga e pinje ma dirom 35 ma yudore e alwora mar sub-Sahara e Afrika. Gichuloga pesa mokalo siling’ milion 1.2 ma Kenya dwe ka dwe. Kinde ka kinde, ichuloga pesa momedore ka po ni wadwaro ni ginyis achiel kachiel (live) program moro ma dhi nyime e chanel mopogore. Mano miyoga owete mang’eny thuolo mar winjo chokruoge madongo kata chokruoge mamoko makende motudore gi limbe mar ofis.

 Ji mang’eny, moriwo nyaka joma ok gin Joneno mag Jehova nenoga chanel ma nyiso program mag JW Broadcasting e TV. Kata kamano, owete mang’eny onge gi nyalo mar ng’iewo gik ma dwarore mondo ng’ato otud setlait e ode. Mondo okony owete kaka mago, ne oket masindego e Ute Romo mokalo 3,670 mondo owete gi nyimine onega JW Broadcasting e Ute Romo. Nengo gigo kaachiel gi terogi e Od Romo achiel nyalo romo siling’ 7,000 ma Kenya ka po ni Od Romono nigi TV kata projekta. To ka po ni Od Romo onge TV kata projekta, nengo gigo nyalo chopo siling’ 53,000 ma Kenya.

 Owete gi nyimine mor ahinya gi chanelno. Jaduong’-kanyakla moro ma a e piny Cameroon nowacho kama: “Ochalo manna ma Nyasaye omiyowa e piny motwo.” Owadwa Odebode ma a e piny Nigeria wacho kama: “Wanenoga chanelno kaka joot didek e juma. Nyithinda ritoga kindego gi siso. Nitie seche ma gikwayaga mondo aketnegi chanel mar JW kata kinde ma ok wachano nene.” Rose ma bende odak Nigeria wacho kama: “Amor wacho ni chanel mar JW mineno e setlait osemiyo tinde ok anega chanel mag news ahinya kaka nanenoga chon. Kinde ma nanenoga news mag piny, iya ne wang’ga ahinya ka naneno gik ma ne timore, kendo blood pressure mara ne idhoga ahinya. JW Broadcasting to hoyoga chunya ahinya. En e chanel ma aheroga, kendo en gueth maduong’ moa kuom Jehova.”

 Jarit-alwora moro e piny Mozambique wacho ni oseket masinde mag setlait ma nigi chanelno e Ute Romo manie alworane. Owete gi nyimine manie kanyaklago chopoga e Od Romo chon mondo giyud thuolo mar neno JW Broadcasting e setlait ka pok chokruok ochakore.

 E chokruok moriwo pinje ma notim Johannesburg e piny South Africa e higa mar 2019, ne oti gi chanelno e tudo twege kuonde moko ochiko. Twegego ne gin twege madongo moriwo nyaka ma ne owadwa manie Bura Matayo ogolo. Owadwa Sphumelele manie Migawo Mochung’ ne Vidio e Bad Ofis ma South Africa wacho kama: “Chon ne watiyoga gi Intanet e nyiso twege kaka mago, to mano ne dwaro ni wati gi pesa mang’eny e chulo Intanet motegno. Chanel mar JW setlait konyowa e kungo pesa, kendo wan kode gadier.”

 Chiwo magu musirogo tij piny mangima e ma miyo owete gi nyimine mang’eny e Afrika neno JW Broadcasting e setlait. Wamor ahinya gi chiwo musebedo kugolo kutiyo gi yore mopogore opogore ma yudore e websaitwa mar donate.pr418.com.