E higa mar tijwa ma 2021, a tuo mar korona pod nodhi nyime landore e piny mangima. Mana kaka nolernwa e sula ma ne wacho ni “Chiwo Kony e Kinde Tuo mar Korona,” wasetiyo gi pesa b mang’eny ahinya kendo oselos komiti mokalo 950 makonyo e kinde masiche.

 Kata obedo ni tuono ne pod dhi nyime kamano, pod nitie masiche mamoko ma notimore apoya ma noyudo owetewa gi nyiminewa kuonde mopogore opogore e piny. E wi pesa ma notigo nikech tuo mar korona, Komiti mar Jocheno mar Bura Matayo nopwodho mondo oti gi pesa ma dirom siling’ milion 800 mondo okonygo e masiche mokalo 200 ma notimore. Ne ane kaka pesa ma nugolo notigo e chiwo kony e kinde masiche moko ariyo ma notimore machiegnini.

 Tarik 22, Mei 2021, Got Nyiragongo ma yudore e piny Democratic Republic of the Congo nochako puko mach. Majno noketho ute, skunde, kod kuonde mituomoe pi. Kata kamano, majno ok e chandruok kende ma noyudo jogo. Odiechienge moko bang’ ka godno nosemuoch, buru ma nigi sum nokwako taon mar Goma kendo ne nitie bende yiengni matindo tindo mag piny ma notimore. Chiegni nus mar joma nodak e taondno nonyis ni odar. Ji mang’eny nodar, kendo moko kuomgi nodhi e piny Rwanda.

 Moko kuom joma nodargo ne gin Joneno mag Jehova ma dirom 5,000. Majno nowang’o moko kuom utegi, kendo moko kuom joma ne odargo nokwal gigegi. Komiti Makonyo e Kinde Masiche e piny Rwanda kod Democratic Republic of the Congo notudore mondo gine kaka ne ginyalo konyo owete gi nyiminego. Ofiswa ma Congo (Kinshasa) nowacho kama e wi achiel kuom komiti makonyo e kinde masiche: “Kata obedo ni weche ne tek e taon mar Goma, kendo kata ka ne pok onyis ji ni odar, komitino nochako chiwo chiemo, pi, gige nindo, kod lewni.” E taon moro ma owete gi nyimine ma kwan-gi okalo 2,000 nochokore, komiti moro makonyo e kinde masiche noloso hembe, kendo ne gichiwo mask mi gilero ne owete gi nyimine yore ma ne ginyalo geng’ogo landruok mar tuo mar korona kod kolera.

 Kata ka dweche adek pok norumo, owetego noyudo osechiwo ochele mokalo kilo 6,000, mok oduma kilo 6,000, mor chiedo kilo 3,000, kod pi lita 3,000. Mondo gikung pesa, ofis ma pinyno nochano mondo ging’iew chiemo mang’eny moa e pinyno kar ng’iewo chiemo ma nengogi tek moa e pinje ma oko.

 Nyaminwa moro ma mach ma nopukoreno noketho ode manyien nowacho kama: “Wachno nonyoso chunywa kendo ne wawinjo malit ahinya.” Kata kamano, joode noyudo kony e yor ringruok kod chuny. Nyaminwano wacho kama: “Jehova nokonyowa mi wayudo gik ma ne wachando. Waseneno kaka Jehova konyowa ting’o ting’ ma wan-go, kendo mano nomiyo weche obedonwa ma berberie.”

 Weche mag yuto ok osebedo mayot e piny Venezuela kuom higni mang’eny. Owete gi nyimine manie pinyno odak matek ahinya. Chiemo nok kendo mahundu bende osemedore ahinya. Kata kamano, riwruok mar oganda Jehova pok ojwang’ogi.

 E higa mokalo mar tijwa, noti gi pesa mokalo siling’ milion 150 e ng’iewo kendo kowo chiemo kod sabunde ne owete gi nyimine ma nochando. Ofiswa ma Venezuela nowacho kama: “Ok en tich mayot kowo chiemo ma dirom kilo 130,000 kuonde duto e pinywani dwe ka dwe, kendo neno ni chiemogo ochopo e lwet owete ma chandore.” Owetego temoga matek mondo gikow chiemo ma ok kethre piyo. Ofisno medo kama: “Wang’iewoga chiemo mang’eny dichiel kendo e kinde ma nengo odok chien. Kae to wakowoga chiemogo ka watiyo gi yore mag wuoth ma ok kaw pesa mang’eny.”

 Owadwa Leonel ma tiyo e komiti makonyo e kinde masiche e piny Venezuela ohero migawono ahinya. Owacho kama: “Tijni en tich makende ahinya. Osetega ahinya chakre ne jaoda tho nikech tuo mar korona. Asebedo modich e konyo owete gi nyimine ma chandore. Kendo aseneno kaka Jehova chopo singone ni ok obi jwang’o joge.”

 Achiel kuom owete ma noyudo kony, chon ne tiyo e komiti makonyo e kinde masiche. Owacho kama: “An e ma koro nadwaro ni okonya. Ne ok okonywa mana gi gige ringruok kende, to owetego nokonyowa, an gi jaoda mondo wabed gi chuny mokue. Ne gidewowa, ne gihoyowa, kendo ne gijiwowa.”

 Masiche moko timorega apoya. Kata kamano, kinde mang’eny, riwruok mar oganda Jehova chiwoga kony mapiyo, to mano en nikech chiwo magu mugolo ma siro tij piny ngima. Moko kuom yore mopogore opogore mag golo chiwo oler e websaitwa mar donate.pr418.com. Wagoyonu erokamano ahinya kuom chiwo magu.