E dwe mar Mach higa 2020 ka ne World Health Organization olando ni tuo mar korona ne en tuo ma ne dhi landore e piny mangima, ji mathoth ne ok ong’eyo ni tuono ne pod dhi dhi nyime landore nyaka higa achiel bang’e. Ji tara gi tara moriwo nyaka Joneno mag Jehova moko oseyudo pek mathoth nikech tuoni. Kuom ranyisi nitie joma tuoni osenego, jomoko osebet kodak gi luoro, kendo osechocho ngima ji mang’eny ma moko kuomgi oselalo nyaka tijegi. Joneno mag Jehova osetimo chenro mane mondo gikony joma tuoni osemiyo ngima oridorenegi?

 Osechak Komiti Makonyo e Kinde Masiche mokalo 950 e piny mangima mondo ochiw kony ne owete gi nyimine ma tuo mar korona osemiyo obedonegi matek yudo kaka de gikonyre. Komitigi tiyo e bwo Komiti mar Jocheno mar Bura Matayo Joneno mag Jehova. Seche moko joma tuoni nomiyo ngimagi obedo matek ne yudo kony koa kuom owete gi nyimine ma a e alworagi, to seche moko Joneno mag Jehova ne yudo kony koa kuom sirkal. Komiti ma nosechakgo bende osechiwo kony e okang’ malach ne Joneno mag Jehova ma onge kaka de gikonyre.

 Kuom ranyisi, wane ane kaka weche nobet e piny Paraguay. Gaset moro nowacho ni “tuo mar korona nosemiyo ji mathoth odak kech e miechgi.” Kata kamano, Komiti Makonyo e Kinde Masiche e piny Paraguay noyudo osemiyo joot moko ang’wen kony moriwo chiemo, gige timo ler, kod mag lwok. Gik ma nomi ot ka ot ne nyalo romo siling’ 3,000 kama ma Kenya.

 En ang’o ma joma chiwo konygo timo mondo giritre ne tuo mar korona? Girwakoga mask kendo gikichore gi chien sama gin e kind ji. Bende, gitemo mondo ging’iew chiemo e kembe ma loso chiembgi kuonde maler kendo ma rito chike moket mag korona. Magi oriwo neno ni joma kelonegi gik moko orwako gik ma geng’o tuo mar korona, girito mtoknigi maler, gigoyo yath ma nego kute e mtoknigo, kendo gikano gik moko kama ler mosegoye yath. Kae to sama okel gik moko ne owetewa, joma okelo gigo ok chung’ machiegni gi owetewa ma kawo gik ma gikelogo.

 Chop Januar higa 2021, Komiti mar Jocheno nopwodho mondo oti gi pesa mohingo bilion 2.5 kama ma Kenya e chiwo kony e kinde tuo mar korona. Ofise mopogore opogore kod Komiti Makonyo e Kinde Masiche temoga matek mondo giti gi pesa e yo maber. Gitemoga mondo ging’iew gik moko kuom jouso ma uso mwandugi e bei moyueyo. Kuom ranyisi, e piny Chile owete nochano mondo ging’iew oganda moro miluongo ni lentils ma romo kilo 750 ma ne idhi ichiw kaka kony ne owetegi mamoko ma ne onge gi kaka de gikonyre. Kata kamano, bech ogandano nomedore nyadiriyo mana gie dwe achiel kende! Seche ariyo kama bang’ ka ne gisewinjore ni gidhi ging’iew ang’iewa ogandano gi bei ma malo kamano, ng’ama ne ousonegi ogandano nowacho ni kastambe moro owacho ni koro ok obi ng’iewo oganda ma ne osechiwo order. Kuom mano, kar mondo ne ousnegi gi bei ma ne gisewinjoree ma malocha, noyie usonegi ogandano gi bei ma ne iusegodo ka ne pok omed bei!

 Kata kamano, ka ne gibiro mondo gikaw oganda kaka ne gisewinjore, wuon duka nolokore kendo ne ok odwar usonegi oganda kowacho ni gin-gi mibadhi moro e tijgino mana kaka riwruoge mamoko bende nigo. Achiel kuom owete ma ne ni kanyo nolemo machuok gie chunye, kae to nowachone ni gisetimo nonro e kanyakla ka kanyakla kendo neno ni joma onge kaka de gikonyre kende e ma biro yudo konygo. Owetewago bende nolerone ni nikech ji a e kuonde mopogore opogore, kendo dwarogi be opogore opogore, gik ma idhi migi biro bedo mana gik ma gichando gadier. Gikone, ne gilero ne jausono ni Joneno mag Jehova tiyo gi pesa moyud kuom chiwo migolo gi chuny man thuolo kendo ok chulgi sama gitiyo tich moro amora. Wachno nomulo chunye ahinya. Jausono noyie gi bei ma ne gisewinjorecha, kendo ka owetego ne ochako dok ng’iepo ire, nogolo chiwo mar oganda maromo kilo 400.

 Lusu, miyo moro ma en chi liel ma a e piny Liberia, odak gi wedene moko abich. Chieng’ moro ka ne gimetho gokinyi kendo nono Ndiko mapile, nyakwar Lusu moro ma wuoyi ma ne en jahigni abiriyo, nofwenyo ni chiemo ma ne gin-go norumo. Nopenjo Lusu kama: “Koro wabiro chamo ang’o?” Lusu nowachone ni noselemo kokwayo Jehova mondo okonygi kendo ne en gadier ni Jehova ne dhi miyogi gima ne gidhi chamo. Chieng’no godhiambo, noyudo simu koa kuom jodong-kanyaklagi ka ginyise ni odhi oom chiemo moko. Lusu wacho kama: “Sani nyakwarano ong’eyo ni Jehova winjoga lamo mag ji nikech nodwoko lamona.”

 Miyo moro ma a Democratic Republic of Congo odak machiegni gi joot moro ma gin Joneno mag Jehova. Bang’ neno ka joodno yudo chiemo koa kuom Joneno wetene, nowacho kama: “Bang’ tuo marachni, wabiro bedo Joneno mag Jehova nikech gidewo owetegi gi nyiminegi e kinde ma tekgi.” Jaode nopenje niya, “Idwaro dhi bedo achiel kuom Joneno mag Jehova mana nikech ofuko achiel mar ochele?” En to nodwoke kama: “Ooyo ok en kamano, bag mar ocheleno konya ng’eyo ni ginyiso hera madier.”

 Joneno mag Jehova osebet ka konyo owetegi gi nyiminegi ma piyo e kinde mag tuo mar koronani nikech chiwo mugolo gi chunyu duto. Wadwokonu erokamano kuom chiwo mugolo kutiyo gi yore mopogore opogore moler e websait mar donate.pr418.com.