Joneno mag Jehova puonjoga ji weche Nyasaye kendo chiwo kony e pinje mokalo 200. Kata kamano, kuom pinjego duto, pinje 35 kende e ma nigi nyalo mar siro tijegi giwegi. To nade pinje ma onge gi pesa moromo, gin gisiroga nade tijegi?

 Bura Matayo Joneno mag Jehova nonoga gik ma Joneno mag Jehova e piny ngima dwaro mondo gilam Jehova kendo giyal wach maber. Igoyoga bajet adimba kendo itiyo gi pesa e yo maber. Sama ofiswa ma ni e piny moro oyudo chiwo mang’eny moloyo ma gidwaro, gikowo chiwo momedorego mondo okony pinje ma nigi rem. Giluwo ranyisi mar Jokristo mokwongo ma ne konyo jowetegi ‘mondo romruok obedie.’ (2 Jo-Korintho 8:14) Jokristogo ne tiyo gi chiwo mang’eny ma ne gin-go e pong’o rem ma Jokristo wetegi ne nigo.

 Owetewa moyudo kony koa e ofise mamoko winjoga nade? E piny Tanzania ma ji mathoth yudoga mana pesa ma ok kal dola ariyo (kata siling’ 200 ma Kenya) e odiechieng’, chiwo ma noor koa e ofise mamoko nokonyo e loso kuonde ma nokethore e Od Romo mar Kanyakla ma Mafinga. Kanyaklano nondiko kama: “Nyaka ne losnwa Od Romo marwa, kwan mar joma biro e chokruogewa osemedore ahinya! Wagoyo erokamano ne riwruok mar oganda Jehova kaachiel gi owetewa e piny mangima kuom chiwo maggi mosemiyo sani walamo Jehova e ot ma jaber.”

 Tuo mar korona osemiyo moko kuom owetewa ma ni e piny Sri Lanka ok yud chiemo ma romogi. Moko kuomgi gin Imara Fernando kod Enosh wuode, ma pod en rawera matin. Kata kamano, chiwo ma a e pinje mamoko osemiyo giyudo gik ma gikonyorego. Ne giloso kad moro mi gindikoe wechegi: “Wagoyo erokamano maduong’ ne owete ma nonyisowa hera e kinde matekgi. Wamor ahinya bedo e riwruogni, kendo walamo mondo Jehova odhi nyime konyo owetewa e ndalo mag gikogi.”

 Bed ni owetewa odak kuonde ma chalo nade, pod giwinjoga maber sama gipogo ne jomamoko gigegi. Kuom ranyisi, Enosh noloso sanduk moro matin molutoega pesa mondo en be ogol chiwo mikonyogo joma ochando. Nyaminwa Guadalupe Álvarez bende nigi chuny ma kamano. Odak e piny Mexico e alwora moro ma ji manok ahinya e ma nigi yore mag yuto. Kata kamano, pod otemoga ahinya mondo ogol chiwo. Nondiko kama: “Adwoko ne Jehova erokamano kuom berne kod herane mosiko. Ang’eyo ni chiwo matin ma agolo ibiro riwo gi mag jomamoko mondo okonygo Jokristo wetena mochando.”

 Ofise ma kowoga chiwo ne pinje mochando bende morga ahinya sama gitimo kamano. Anthony Carvalho ma ni e Komiti mar Bad Ofis ma Brazil wacho kama: “Kuom higni mang’eny, pinje mamoko e ma ne konyowaga. Kony ma kamano nomiyo weche Nyasaye omedo dhi maber ahinya e pinywa. Sani to koro ok wan marach ahinya e weche yuto, kendo wan gi thuolo mar konyo pinje mamoko. Owetewa gi nyiminewa neno tij yalo wach maber kaka tich monego tim e piny ngima, kendo gitemo ahinya mondo gisir tijno kaka jolup Yesu.”

 Ere kaka Joneno mag Jehova nyalo konyo owetegi gi nyiminegi mochando? Ok en kuom oro pesa achiel kachiel e ofise Joneno ma ni e pinje mamoko, to ginyalo timo kamano kuom golo chiwo misirogo tij piny mangima. Ginyalo keto chiwogo e sanduge mondik ni “Tij Piny Mangima” ma yudore e Ute Romo, kata ginyalo oro chiwo kokalo kuom websaitwa mar donate.pr418.com. Wadwoko erokamano ahinya kuom chiwo ma kamago.