Be inyalo paro wechegi: “Chon matin, keto chiemb chuny e Intanet mondo owete okawe kanyo ne nenore ka gima tek ahinya. To nade sani? Donge thothwa wuoro kaka di koro wayudo chiemb chuny e kinde tuo marachni ka di koro waonge JW Library? Kuom higni mang’eny, Jehova osebedo ka iko jotichne ne kinde matek kaka magi.” Mago gin moko kuom weche ma Owadwa Geoffrey Jackson nowacho e Ripot mar 6 mar Bura Matayo​—2020.

 Ere kaka Jehova osebedo ka ikowa? Ang’o ma notim mondo olos app mar JW Library? To ang’o mosebed kitimo mondo omed bere?

 E dwe mar Mei 2013, Bura Matayo nokwayo migawo mar MEPS Programming manie ofiswa maduong’ mondo gilos app moro moting’o Muma mar New World Translation ma notimne lokruok. Owadwa Paul Willies ma tiyo e migawo mar MEPS Programming wacho kama: “Chop kindeno pok ne walosoga app moro amora minyalo tigo e simu kata keto app moro amora kuonde ma apps mamoko yudoreega e Intanet. Kata kamano, ne waloso team kendo chungo tije moko, kae to ne watiyo gi owete ma ne ni e migepe mamoko mondo okonywa loso app ma nidwarono kod gik mamoko ma ne dwarore e iye. Ne walemo gi kinda, kendo Jehova nokonyowa ahinya. Bang’ dweche abich kende, noland app manyienni e romo mitimoga higa ka higa!”

 Pek machielo ma ne nitie ne en kaka ne wanyalo bero app ma ne walosono mondo obed laibrari moting’o buge mang’eny e dhok mopogore opogore. Chop Januar 2015, buge mang’eny ma ne igoyo kindeno e dho Kisungu koro ne yudore e app manyienno, kendo dweche auchiel bang’e, joma ne tiyo kode koro ne nyalo download buge e dhok mang’eny mopogore opogore.

 Chakre kindeno, owete osetemo bero JW Library e yore mopogore opogore. Kuom ranyisi, osemed vidio mang’eny e iye, kendo inyalo yudo buge kod vidio mitiyogo e chokruoge mana kuom diyo kare mar “Meetings.” Oselose e yo ma ka ng’ato dwaro timo nonro e ndiko moro, to onyalo yudo buge manie bug Timo Nonro kodiyo ndikono.

 App mar JW Library itiyogo e masinde ma dirom milion 8 odiechieng’ kodiechieng’, kod milion mokalo 15 dwe ka dwe! Ang’o ma dwarore ni otimga mondo JW Library oti maber e masindego? Owadwa Willies wacho kama: “Onge app milosoga ka ber chuth. Kinde ka kinde, wamedoga bero JW Library mondo tiyo kode omed bedo mayot. Nikech programbe ma riembo masinde mang’eny (operating systems) imedoga ber igi pile ka pile, wamedoga bero JW Library mondo omed tiyo e masindego maber. Bende, nikech buge kod vidio miketo e JW Library osebet ka medore ahinya, dwarore ni orite mondo osik ka otiyo maber.” Sani nitie buge ma dirom 200,000, vidio, kaachiel gi gik miwinjo (audio recordings) mokalo 600,000 e JW Library!

 Nitie gik ma dwarore ahinya mondo JW Library odhi nyime tiyo maber moloyo mana bedo gi kompyuta. Dwarore ni ong’iew laisens mag programbe mitiyogo e kompyutago. Laisens achiel kende nyalo kawo pesa ma dirom siling’ 150,000 ma Kenya higa ka higa. Migawo mar MEPS Programming tiyoga gi pesa ma dirom siling’ milion 1 ma Kenya higa ka higa mondo ging’iewgo simbe, tablede, kod kompyuta mopogore opogore ma gitemogago ka be JW Library momed ber iye biro tiyo maber e masindego.

 JW Library osekonyowa kungo pesa mang’eny ma ne watiyogago e goyo buge, riwogi, kendo kowogi kuonde mopogore opogore. Kuom ranyisi, e higa mar 2013, nogo kopi milion 12 mag bug Nono Ndiko Pile. Kata kamano, e higa mar 2020, nogo kopi mag bugno ma dirom milion 5 kende, kata obedo ni kwan mar jolendo nomedore gi ji 700,000. Ang’o momiyo nogo kwan mar buge matin to jolendo nomedore kamano? En nikech tinde owete gi nyimine mathoth somoga ndiko ma odiechieng’ e JW Library. a

 JW Library konyoga joma tiyo kode e yore mamoko mang’eny. Geneviève modak e piny Canada wacho ni tiyo gi JW Library osemiyo tinde otimo puonjruok mare mar Muma ma ok obare. Owacho kama: “Kiwacho awacha adier, ka di ne bed ni pod nyaka achokga buge ma apuonjorago okinyi kokinyi, ok apar ka di koro atimoga puonjruokna ma ok abara. To nikech koro an gi app makendeni e kompyutana, anyalo yudo gimora amora ma adwaro kanyo. Timo puonjruokna pile kamano osekonya tego yiena kendo sudo machiegni gi Nyasaye.”

 JW Library osekonyo ahinya-ahinya e kinde mag tuo mar korona. Charlyn modak e piny Amerka wacho kama: “Tuo mar korona mokwako piny ngima osemiyo pok aneno bugwa moro amora mogo manyien e otas kuom kinde mokalo higa achiel kama. Kata kamano, JW Library osemiyo wayudo chiemb chuny ma konyowa tego yiewa e kinde mowinjore, kendo wadwoko ne Jehova erokamano kuom mich ma jaberno.”

 Thothwa winjo kaka Faye modak e piny Philippines bende winjo. Owacho kama: “JW Library osekonya sudo machiegni gi Jehova. En e ma akwongoga some gokinyi. Awinjoga vidio kod gik miwinjo manie iye sama atimo tijena mapile. En e ma atiyoga kode e iko chokruoge. En e ma atiyoga kode sama aikora dhi puonjo ng’ato Muma. Anenoga vidio manie iye sa asaya ma an thuolo. Asomoga sula moko manie iye kata Muma sama an e lain ka arito gimoro. Kuom adier, en e app maberie mogik.”

 JW Library osekonyo bende e tijwa mar lendo. Kuom ranyisi, ka nyaminwa moro ma a e piny Cameroon ne ni e tij lendo, nodwaro tiyo gi ndiko moro ma noneno ka nyaminwa moro otiyogo jumbe moko matin ma nosekalo. Kata kamano, ne ok onyal paro kama ndikono yudoree e Muma. Owacho kama: “Gima ber en ni naparo wach achiel ma ne ni e ndikono. Nadhi e JW Library, kae to ayawo Muma mi amanyo wachno e i Muma kanyo. Mapiyo nono, nayudo ndiko ma ne adwarono. App maberni osekonya yudo ndiko mang’eny ma samoro wiya jawilgago.”

 Chiwo mugolo kutiyo gi yore mopogore opogore ma yudore e donate.pr418.com osekonyowa loso app mar JW Library, rite, kendo medo bere, mondo owete gi nyimine manie piny ngima oti kode. Erourukamano ahinya kuom chiwo magu.

1. Oktoba 2013​—Noland laibrarini ka en gi Muma mar New World Translation mar Kisungu ma noa timne lokruok

2. Januar 2015​—Nomedne buge mamoko mag Kisungu, kae to bang’e noket buge ma yudore e dhok mamoko bende

3. Novemba 2015​—Noket rangi mopogore opogore ma ng’ato nyalo bukogo kamoro mosomo

4. Mei 2016​—Nomed kare mar “Meetings”

5. Mei 2017​—Nomed nyalo mar ndiko weche e iye

6. Desemba 2017​—Nomed Muma mar Study Bible

7. Mach 2019​—Nomedne nyalo mar download gik miwinjo, tugo vidio achiel kaachiel e intanet, kendo somo buge ma yudore e bug Timo Nonro

8. Januar 2021​—Nomed gik mopogore opogore ma tiyo gi bugwa mar Inyalo Dak gi Mor Nyaka Chieng’!