E kindewagi, Joneno mag Jehova yudo chiemb chuny e yor dijitol moloyo kinde moro amora mosekalo. Kata kamano, kuonde mang’eny e piny ngima, nengo intanet ni malo ma owetewa ok nyal ng’iewo. Owete moko to odak kuonde ma intanet siko ka lal, kuonde ma teko mar intanet ni piny, kata kuonde ma onge intanet chuth-chuth.

 Kata obedo ni weche tek kuondego kamano, thoth owetewa gi nyiminewago sani koro nyalo yudo buge ma dijitol kata ka intanet onge. Mano nyalore nade?

 Nitie sanduk mor matin miluongo ni JW Box mikowoga ne kanyakla ma ni kuonde ma onge intanet. Sandugno en gir keyo Wi-Fi. Ong’iewe e kambi moro, Migawo mar Kompyuta e Bethel oketone software ma tiyo kode, kendo iketonega buge ma dijitol kod vidio ma yudore e jw.org. Nengo sanduk achiel en gimoro siling’ 7,500 ma Kenya.

 Sama sandugno ochopo e Od Romo, owete gi nyimine tudoga simbegi gi tabledegi e yor Wi-Fi, kae to gitoko buge kod vidio. Kata mana joma nigi simbe ma nyachon kata ma nengogi ni piny pod nyalo tudogi e sandugno. To koro, ka kanyakla onge gi intanet kamano, kare ere kaka buge manyien medore e i JW Box? Kinde ka kinde, ofis oroga flasdisk moting’o gik manyien ma ni e jw.org, kae to kanyakla medo e JW Box. Nengo flasdisk achiel en gimoro siling’ 400 ma Kenya.

 Ere kaka JW Box osekonyo owetewa? Nathan Adruandra ma en wuoro modak e piny Democratic Republic of Congo wacho kama: “Kuom kinde malach, nasebedo ka atemo toko vidio mag drama miluongo ni ‘A Jehova, . . . Asegeno Kuomi’ kod Par Chi Lut. Kata kamano, notama, kendo mano ne nyosoga chunya ahinya. Sani to anyalo toko vidiogo e simba, kendo mano konyowa kaka jonyuol e puonjo nyithindwa e yo maber.”

 Owadwa moro ma konyoga kanyakla ma ni Nigeria e tiyo gi JW Box wacho kama: “Owete neno JW Box kaka mich makende mowuok kuom Jehova. Gimor ahinya ni sani ginyalo toko buge kod vidio ma ni e Gik Mwatiyogo e Puonjo Ji Muma.”

 Chop sani, osekow sandugego mokalo 1,700 ne owetewa e pinje mag Afrika, Oceania, kod South America, kendo itimo chenro mondo kowgi ne kanyakla mamoko mang’eny. To pesa mitimogo mago duto aga kanye? En chiwo ma wagologa mar siro tij piny mangima, ma ng’enyne igologa kokalo kuom websaitwa mar donate.pr418.com. Erourukamano maduong’ kuom chiwo magu.