Higa ka higa, moko kuom joma tiyo ne Jehova kuom thuologi duto e yore makende igweloga e Skul mar Gilead mitimoga e Watchtower Educational Center man Patterson, New York. a Skundni tiegoga jopuonjrego kaka ginyalo medo lony e migepe mopogore opogore ma gitimo e riwruok mar oganda Jehova. Tiegruok ma giyudo e skundno konyogiga tego kanyakla kod ofisewa ma ni kuonde mopogore opogore e piny mangima.

 Kuom adier, Skul mar Gilead en skul mokwako piny mangima. Kuom ranyisi, klas mar 147 ma notim e higa mar 2019 ne nigi jopuonjre 56 ma noa e pinje 29. Joma igweloga e Skul mar Gilead gin joma osebedo ka tiyo ne Nyasaye kuom thuologi duto e yore moko makende kaka Jo-Bethel, jorit-alwora, jomisonari, kata jopainia makende.

 Ichakoga tim ikruok chon kata ka pok jopuonjre mogwelgo ochako somo. Kuom ranyisi, Migawo mar Wuoth Manie Ofis Maduong’ ng’iewoga tiket mag ndege ne joma ogwel e skundno. Moro ka moro kuom jopuonjre ma nogwel e klas mar 147 mar Gilead nochulne tiket mar ndege ma ne tere Patterson kendo duoke thurgi. Tiket ka tiket nokawo pesa ma dirom siling’ 107,500 ma Kenya. Jopuonjre ma ne a e piny Solomon Islands ne nyaka ti gi ndeke ang’wen mondo e ka gichop Patterson, kendo bang’e ne nyaka giti gi ndeke adek ka gidok thurgi. Mano en wuoth mokalo kilomita 35,400! Nochul ne japuonjre ka japuonjre siling’ ma romo 230,000 ma Kenya ne wuodhno. Mondo Migawo mar Wuoth Manie Ofis Maduong’ okung pesa, gitiyoga gi program moro mar kompyuta e manyo tiket ma bechgi ni piny. To kata mana bang’ ka giseng’iewo tiket, program mar kompyutano pod dhiga nyime rango kuom jumbe kata dweche moko ka po ni bech tiketgo odok piny. Migawono bende tiyoga gi chiwo mag airline credits kod mileage mondo ging’iewgo tiket.

 Thoth jopuonjre dwarorega ni obed gi visa e ka oyienegi donjo e piny Amerka. Migawo mar Chike Manie Ofis Maduong’ konyoga jopuonjrego yudo visa. Yudo visa kod barupe mamoko nyalo kawo pesa ma dirom siling’ 51,000 ma Kenya kuom japuonjre ka japuonjre.

 Tiegruok ma jopuonjrego yudo kelonwaga ber mage? Hendra Gunawan en jaduong’-kanyakla ma wuok Southeast Asia. E kanyaklagi gin gi owadwa moro gi jaode ma nosedhi e Skul mar Gilead. Owadwa Hendra wacho kama: “Chon ne waonge gi jopainia mapile e kanyaklawa, kata kamano, bang’ ka owadwano gi jaode nobiro e kanyaklawa, kinda margi e tij lendo kod chuny ma ne gin-go nomiyo jomamoko obedo jopainia. Kindagino nomiyo achiel kuom nyimine e kanyaklawa odhi e Skul mar Joland-Injili mar Pinyruoth.”

 Owadwa Sergio Panjaitan ma ni e Bethel mar Southeast Asia tiyo kanyachiel gi owete gi nyimine mosedhi e Skul mar Gilead. Owadwa Sergio wacho kama: “Tiegruok ma ne giyudo e Skul mar Gilead ne ok okelonegi ber kendgi giwegi, to kata mana wan bende waseyudo ber kuom tiegruokgino. Ne gipuonjore weche mang’eny. Ok giling’ aling’a gi wechego mondo ginenre ka jo makende, kar mano, gijowachonwaga paro ma ne gipuonjore e skul. Mano osejiwowa kendo osemiyo wan bende wajiwo jomamoko.”

 Riwruokwa gologa pesa misirogo skundni kanye? Pesago wuokga kuom chiwo ma wagologa mar siro tij piny mangima, ma ng’enyne igologa kitiyo gi achiel kuom yore ma yudore e websaitwa mar donate.pr418.com. Erourukamano maduong’ kuom chiwo magu ma siroga skul moting’o jopuonjre ma a e piny mangimani.