Joneno mag Jehova dewo ahinya Jokristo wetegi. (1 Petro 2:17) Thothwa winjoga mana kaka nyaminwa Tannis modak e piny Kenya. Tannis wacho kama: “Agomboga ng’eyo gima timore ne owetena gi nyiminena e piny mangima.” Ere kaka Tannis kaachiel gi owete gi nyimine mamoko tara gi tara yudoga weche ma timore ne Jokristo wetegi kuonde mopogore opogore? Chakre higa mar 2013, wasebedo ka waketo weche ma timore ne owete gi nyimine e kare mar Weche Manyien e websaitwa mar jw.org.

 E kare mar Weche Manyien, nitie ripode mag Joneno mag Jehova e wi weche kaka Muma manyien mogol e dhok moro, tij chiwo kony kuonde ma masira otimore, tije mag gedo, kod weche mamoko madongo motimore e riwruogwa. Kanyo bende nitie ripode e wi owetewa gi nyiminewa motue e jela nikech yiegi. E wi mano, nitiere bende weche mosetimore ma jiwowa ahinya e wi kampen mag lendo, kod kaka notim Rapar. Jomage ma losoga weche manyien-go, to ere kaka gilosoga wechego?

 Migawo Mochung’ ne Weche Manyien e Ofiswa Maduong’ e ma losoga Weche Manyien e websaitwa. Migawono yudore e ofiswa maduong’ man Amerka, kendo otiyo e bwo Komiti mar Jocheno mar Bura Matayo. Nitie owete gi nyimine ma kwan-gi okalo 100 ma tiyo e migawono, kendo thothgi gin joma ochiwore tiyo tije bethel ka gin e utegi. Moko kuomgi gin jondiko, jotim nonro, jogoro, kod jolok dhok. Moko to tudorega gi jotich sirkal, jopuonj, kod jofwambo gi keyo weche. Nitie Migawo Mochung’ ne Weche Manyien e Ofise Mamoko mokalo 80 ma konyoga Migawo Mochung’ ne Weche Manyien e Ofiswa Maduong’.

 Sama idwaro los wach moro manyien, Migawo Mochung’ ne Weche Manyien e Ofiswa Maduong’ tudorega gi Migawo Mochung’ ne Weche Manyien e Ofisewa Mamoko. Bang’ ka owetewa oseyudo wach moro manyien, gitimoga nonro adimba mondo gibed gadiera gi wachno. Mano nyalo riwo penjo ji penjo moko kaachiel gi tudruok gi jolony. Bang’ ka giseyudo weche duto e wi wachno, gindikega maber, girieye, gisome nyadinwoya, giketone pichni, kae to gikowe ne Komiti mar Jocheno mondo opwodhe.

 Jokristo wetewa nenoga nade weche moket e kare mar Weche Manyien? Nyaminwa Cheryl modak Philippines wacho kama: “Aheroga chako odiechieng’ ka asomo weche manyien mosetimore e riwruok mar oganda Jehova kod joge.”

 Josombwa mang’eny wachoga ni nitie pogruok e kind gik ma gisomo e kare mar Weche Manyien e jw.org, kod gige fwambo gi keyo mamoko. Nyaminwa Tatiana modak Kazakhstan wacho kama: “Amor ni anyalo geno weche manyien manie jw.org. Gin weche madier.” Nyaminwa Alma modak Mexico wacho niya: “Kare mar Weche Manyien jiwaga ahinya kopim gi weche maricho ma ilando gi gige fwambo gi keyo mamoko.”

 Kare mar Weche Manyien ok oting’o mana weche migeno agena, to bende en gi weche ma tego yiewa. Owadwa Bernard modak Kenya wacho niya: “Kare mar Weche Manyien osekonya neno owete gi nyimine kaka joodwa, kata obedo ni gia kuonde mopogore opogore. Sama alamo, anyalo luongo nyingegi kendo kwayo Jehova mondo okonygi e chal mopogore opogore ma gikaloe.” Nyaminwa Bybron ma bende odak e piny Kenya wacho kama: “Amorga ahinya sama aneno sula ma wuoyo e wi Muma mogol e dhok moro! Sula kaka mago paronaga ni Jehova ok dew wang’ ng’ato ang’ata.”

 Kata mana weche manyien e wi Jokristo wetewa ma kalo e sand nyalo jiwowa ahinya. Nyaminwa Jackline modak Kenya wacho niya: “Sama aparo chir ma owetena gi nyiminena osenyiso, mano tegoga yiena ahinya. Atemoga nono gima osekonyogi nano. Asepuonjora ni gin mana gik ‘ma pile’ kaka lamo, somo Muma, kod wer, e ma osekonyogi chung’ motegno.”

 Nyaminwa Beatriz modak Costa Rica oheroga somo sula ma wuoyo e wi masiche motimore. Owacho kama: “Sulago osekonya neno kaka riwruogwa konyoga mapiyo owete gi nyimine moyudo masiche, kendo kaka gikonyogiga e yo mowinjore, kendo gi hera. Mano miyo abedo gadier ni ma e riwruok mar oganda Jehova.”

 To mano kaka wamor yudo weche manyien e wi gik ma timore ne Jokristo wetewa e piny mangima! Mano nyalore nikech chiwo magu musirogo tij piny mangima, ma thothne ugologa kutiyo gi donate.pr418.com. Erourukamano ahinya kuom chiwo magu.