Bed gi Osiepe Mondo Kik Iwinj ka In Kendi—Kaka Muma Nyalo Konyi
Chop higa mar 2023, ji mang’eny e piny ngima ne winjo ka gin kendgi, kendo jothieth ne neno ni onego gitimie gimoro mondo gitiek chandruogno. Be ginyalo tieko chandruogno?
Dr. Vivek Murthy ma wuok Amerka nowacho kama: “Sama ng’ato winjo ka en kende, mano nyalo kelone tuoche moko. ” Omedo lero kama: “Wanyalo loyo pekno.” E yo mane? “Kuom kawo okenge ma dwarore mondo wateg osiep manie kindwa gi jomamoko.” a
Ng’ato nyalo winjo ka en kende kata sama en e kind ji. Kata obedo ni nitie gik mang’eny ma nyalo miyo ng’ato owinj ka en kende, pod Muma nyalo konye. Muma oting’o paro moko mabeyo ma nyalo konyowa nyagore sama wawinjo ka wan kendwa. Okonyowa ng’eyo kaka wanyalo tego osiep manie kindwa gi jomamoko.
Puonj mag Muma ma nyalo konyowa
Bed ng’at mong’eyo wuoyo gi ji. Wuoyo maber ok en mana nyiso ji kaka iwinjo, to oriwo bende chiko it sama ng’at machielo wuoyo. Kaka imedo nyiso ni idewo jomamoko, e kaka osiep manie kindi kodgi biro medo bedo motegno.
Puonj mar Muma: “Kik ung’i mana gik ma kelonu ber un uwegi, to ung’i bende gik ma kelo ber ne jomamoko.”—Jo-Filipi 2:4.
Mak osiep gi ji mopogore opogore. Ikri loso osiep gi joma dongoni kata ma tindoni, bed ni giwuok e oganda kata piny mopogore gi mari.
Puonj mar Muma: “Yawuru chunyu.”—2 Jo-Korintho 6:13.
Mondo ing’e kaka inyalo medo tego osiep manie kindi gi jomamoko, som sula ma wiye wacho ni “Kutosheleza Tamaa Yetu ya Kuwa na Marafiki.”
a Buk miluongo ni Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
Samoro Inyalo Hero Magi Bende
PICHNI MIGORO E BOD
Osiep Madier en Osiep Machalo Nade?
Osiepe manono yudo yot, kata kamano, inyalo timo ang’o mondo iyud osiepe madier?
WECHE MAMOKO
Nyagruok gi Pek Minyalo Bedogo Kochuno ni Ibed Kendi
Sama in kendi, nyalo nenore ka gima yore mag ngima odinoreni te ma koro ok inyal bedo mamor, to mano ok en adier.
