SIKURU KA UNENO!
Timbe Gero Mikelo gi Weche Siasa—Ang’o ma Muma Wacho?
Timbe gero mikelo gi weche mag siasa sani opong’o piny.
E piny Mexico, ne oneg josiasa madongo 39 e kinde yiero mar higa mar 2023-2024, ma en kwan ma malo ahinya kopim gi higni mamoko, kendo ne nitie timbe moko mag gero motudore gi siasa ma ne obuogo ji ahinya.
Machiegnini e pinje mag Ulaya, nitie timbe mag gero mang’eny ma ne otimore motudore gi weche mag siasa, moriwo nyaka temo nego prime minister mar Slovakia e dwe mar Mei tarik 15, 2024.
Jo Amerka nyocha obuok ahinya ka ne otem neg ker margi machon, Donald Trump e dwe mar Julai tarik 13, 2024.
Ang’o momiyo timbe gero motudore gi weche siasa tinde ng’eny? Be timbego biro rumo? Ang’o ma Muma wacho?
Nokor pogruok ma ne dhi betie nikech weche siasa
Muma nokoro ni kindewagi ma iluongo ni “ndalo mag giko,” ji mang’eny ne dhi bedo gi paro maricho ma ne dhi kelo ywaruok kod timbe mag gero.
“Kinde matek ahinya nobedie e ndalo mag giko. Nimar ji nobed . . . jo ma ok go erokamano, jo ma ok makre chuth gi jomamoko, . . . jo ma ok oikore loso winjruok moro amora, . . . jo mager, . . . jo andhoga, jo ma wigi tek, jo sunga.”—2 Timotheo 3:1-4.
Muma bende ne okoro ni tungni kaka ng’anyo mag temo golo jatelo e loch kod tungni mamoko ne dhi timore e kindegi. (Luka 21:9) Kata kamano, timbe mag gero kod ywaruok mikelo gi weche siasa ok bi siko nyaka chieng’.
Giko mar timbe gero mikelo gi weche siasa
Muma wacho ni Nyasaye biro golo sirkande mag dhano kae to oketo sirkande owuon manie polo.
‘Nyasaye manie polo nochung pinyruoth ma biro ng’injo pinjeruodhi mamokogi duto motiekgi chuth kendo noloch nyaka chieng’.’—Daniel 2:44.
Pinyruodh Nyasaye biro riwo ji kendo kelo kuwe e piny mangima.
Ruodh Pinyruodhno ma en Yesu Kristo iluongo ni “Ruodh Kuwe,” kendo ‘kuwe mobiro kelo nobed ma onge giko.’—Isaya 9:6, 7.
Kata mana sani, raia mag Pinyruodhno puonjore kaka ginyalo dak gi kuwe. Mano e momiyo Muma wacho niya: “Ginithedh ligengnigi obed kwer, kendo tongegi obed pand keyo. Oganda ok noting’ ligangla ne oganda machielo, ok ginichak gipuonjre lweny kendo.”—Isaya 2:3, 4.
Mondo iyud weche momedore, som sula ma wiye wacho ni “Ang’o ma Pinyruodh Nyasaye Biro Timo?” kae to ine vidio ma wiye wacho ni Pinyruodh Nyasaye En Ang’o?
Samoro Inyalo Hero Magi Bende
OHINGA MAR JARITO
Ang’o ma Pinyruodh Nyasaye Biro Timo?
Yesu nong’eyo ni Pinyruodh Nyasaye e sirkal kende ma biro tieko gik maricho. Ang’o ma Pinyruodh Nyasaye osetimo ma miyo wabedo gadier ni obiro tieko gik maricho?
SIKURU KA UNENO!
Tinde Ji Ok Ogeno Josiasa—Ang’o ma Muma Wacho?
Muma nyisowa ni wabed motang’ gi joma wageno wechegi kendo onyisowa ng’at ma inyalo gen ma biro kelo lokruok mosiko.
SIKURU KA UNENO!
Ang’o Momiyo Siasa Pogoga Ji Ahinya?—Ang’o ma Muma Wacho?
Weche mag siasa medo pogo ji e piny ngima. Muma nyisowa ni nitie jaloch ma nyalo tieko pogruok mosebedo e kind dhano, kendo riwogi kanyachiel.
OHINGA MAR JARITO
